Read Oku Ɛyf 23 Bible Online

Ɛyf 23 - Oku bible

Ɛyf 23

¹Bool me tuŋ ɛyshiɛ ɛ ghel ghɛ ɛ́ nè luun ɛ ndaa nsak ɛyghun è suuy ge: Ghone-nyii, ɛytem ə yome lu ɛylanen kum ɛychii ə yom ɛ ɛyshiɛ nə Feyine se kok se chin ɛ kechii kɛ́ lane.

²Ananias wɛ ketuu se ghɛ́ ntaŋlee me lam ge ghel ghɛ ɛ́ nè tiyen ɛ Bool ɛybee tɛl Bool kɛn ɛ əbchio.

³Bool me suuy se wen ge: Nɛ̂y tɛl Feyine wɛ̀, wɛ̀ keke ka əbghune ndaa wɛ ɛ́ yiosen əb se jofe kɛn ɛbɛy ɛbɛy. Wɛ̀ diom fɛy, è se sake mɛ ka nchile dinen, dî ko kole nchil, ka wɛ̀ suuyen ge ɛ́ tɛl mɛ.

⁴Ghel ghɛ ɛ́ nè báksen se Bool suuy se wen ge: Wɛ̀ dì tɛyle nɛ lu ketuu se ghɛ́ ntaŋlee wɛ luun wele Feyin.

⁵Bool fise ge: Ghone-nyii, mɛ kè báà se ke ge lu ketuu se ghɛ́ ntaŋlee. Ɛ́ nyak ɛ ŋwaale-Feyin ge: Ghàà wɛ̀ suuy kenəə kebee kum wel wɛ əb saken ghɛn.

⁶Bool keele ge ghene ɛlee lu ghɛ́ kenone Saddusee, nɛ ɛlee lu ghɛ́ kenone Falisee, è me suuy ketaan ɛ ndaa fo ge: Ghone-nyii, mɛ lu wele kenone Falisee, nɛ̀ ba ə wom ghene no ə wom lu ghele kenone Falisee. Mɛ me se lu ɛyshiɛ nə ghɛ́ nsake bek ge mɛ ki ɛybeeme ge ɛnkfə náà loole se ɛykuo.

⁷Əb suuy kii nɛ̂ kine ɛ leghɛ ghɛ́ kenone Falisee ghene ghɛ́ kenone Saddusee mɛ kɛɛte ɛyyol ghele me se lu fo əbnkakten ɛ əbnkakten.

⁸Ɛ́ nè yole dì bek ge ghɛ́ kenone Saddusee nè báà se bééme ge ɛnkfə yî loole se ɛykuo gese beeme wiy ge kelee lu ge nchiyse-ndaa nə Feyine, gese maa kenəə kɛ kum keyioy se nkan, dî nɛ ghɛ́ kenone Falisee beeme əbnəə nɛ̂ vin əbjim.

⁹Ɛyyol yi taate taaten, ndintese tesak selee sɛ́ kenone Falisee teem ɛ ɛyyio è suuy ketaan ge: Ghɛse báà yɛn kejas ə wel vin. Ɛ lefelee fene keyioy kene nchiy-ndaa-Feyin ɛylee lu nɛ ɛy suŋnen se wen.

¹⁰Ghene yol è chia keleŋ, ketuu se ghɛ́ ɛyghoŋe se fane ge lòó ɛ́ sayte Bool sayten è me lam ge ghel ə wene chio fo è fii Bool se ghene è gwiy so se yi ndaa ɛyfɛl.

¹¹Nɛy se lu nɛ̀ ntəke, Báàba teem ɛ Bool ɛybee è suuy se wen ge: Kul ɛyteme, ka wɛ̀ suŋnenmen ɛ Jolesalem kum mɛ, lu nɛ wɛ̀ tiy se suŋnen sɛy dì ɛ Lûm.

¹²Əbtəke yio, ghele Juus ɛlee taŋ ntaŋ, è laa kelek ge ghene jia nɛy yiɛ kefaa kene nəə kenəəne buu ge ghene yúyté Bool.

¹³Ghel ghɛ ɛ́ nè taŋen ntaŋ nɛ̂ yin nè chia kefaa kɛ əmmkɛɛk.

¹⁴Ghene me ndu se ghele mbiy se ghɛ́ ntaŋlee gese nɛ̀ chɛɛse è suuy ge: Ghɛs laamen kelek kebee ge ghɛse jia nɛ̂y ləmte kefaa keyiɛne buu ge ghɛs yuymén Bool.

¹⁵Ke me se lu ge, ghɛne ghe chɛɛse tinse ntum se ketuu se ghɛ́ ɛyghoŋe ge əb tinse Bool se ghɛn fefse ge ghɛne kɛŋe se loote se keele kenəə kɛ kum nsak ə wen. Ghɛse yɛ lu kebaaten se yuye wen nɛ əb bɛɛy ghàà gwiy è chin fɛn.

¹⁶Ɛ́ taŋ dî wan ə jɛmte Bool yio, è ndu ɛ ndaa ɛyfɛl nə ghɛ́ ɛyghoŋ, è fekte se Bool,

¹⁷Bool me toŋte wele mbiy ɛyghoŋ əblee è suuy se wen ge: Liɛ wándɛ nsum vin è ndu so se ketuu ə kɛne bek ge əb ki kenəə se suuy se wen.

¹⁸Əb me liɛ wán vi, è lii so se ketuu ə ghene è suuy ge: Bool wɛ wele nchak kè toŋte mɛ è suuy ge mɛ liɛ wándɛ nsum vin è gwiy so se wɛ̀ bek ge əb ki kenəə se suuy se wɛ̀.

¹⁹Ketuu ɛyghoŋ ki ghal wen se keghoo, ghene wen bak əbghun, əb bif se wen ge: Wɛ̀ kɛŋe se suuy gee ghɛ san?

²⁰Əb me suuy ge: Ghɛ́ mbiye nə ghele Juuse siysemen ge ɛ́ bvəs è lon ge wɛ̀ tinse Bool se ghene fefse ge ɛ́ kɛŋe se loote se biinene kenəə kɛ kum wen.

²¹Yɛɛ ke se beeme kenəə kɛ ghene suuy bek ge, ghele guo wen ɛ jii chia əmmkɛɛk, nɛ ɛ́ laamen kelek ge ghene jia ləmte kefaa keyíɛ́ne kene kenəəne buu ge ghene yúyté Bool. Ghene baatemen è se chiyte kenəə kɛ wɛ̀ suuy.

²²Ketuu ɛyghoŋ ki chiise se wen ge: Ghàà suuy se wel ge wɛ̀ suuymen kenəə ten se mɛ. Əb chiise dì è suuy se wen ge: Yɛɛ nduu.

²³Əb yese, è toŋte ghele mbiy ɛyghoŋ nə wen ɛlee ɛbaa, è suuy ge: Ghɛn bááté ghel ɛyghoŋ ɛyviɛ ɛybaa, nɛ̀ ghɛ́ nyamse əmnkok əmsaamba gese nɛ̀ ghɛ́ teghoŋe ɛyviɛ ɛybaa sɛy é ghene ndu ɛ Saesalea ɛ chuy buumok nɛ̀ ntəke lan.

²⁴Ghɛn fó nyamse əmnkok se Bool, è liɛ wen è jɛl so nyiaŋ è ndu so se Goveno Felis.

²⁵Əb suuy dì è nyak ŋwaale se Felis ge:

²⁶Lu mɛ Klaudius Lisias, mɛ nyake ŋwaale yin se wɛ̀ Babɛy Felis wɛ Goveno, mɛ chakte wɛ̀.

²⁷Ghɛ́ mbiye nə ghele Juus nè koo wel vin è se kɛŋe se yuy, mɛ yio ge əb ki əbtaawe wele Lûm è liɛ ghɛ́ ɛyghoŋ, ghɛse ghene too fo, è fii wen.

²⁸Mɛ me liɛ wen è ndu so se ghene ndaa nsak bek ka mɛ nè kɛŋen se keele ge ɛ́ sɛ toy wen se ghɛ-a?

²⁹Ɛ́ biinen, è me yɛn ge kenəə kɛ ɛ́ toyen wen se ten lu kum nchil ɛylak nə ghen nɛ əb báà nɛɛy kenəə kɛ lòó ɛ́ yúy wen yuyén kene è vii wen se nchak.

³⁰Wel nɛy nyiake è suuy san ge, ghele Juus ɛlee kalmen əmnaŋ se yuye wen. Mɛ me tinse wen se wɛ̀ kaŋ ɛymok, è lam ge ghel ghɛ ɛ́ toyen əbnəə ɛ wen əbghun gwiy sɛy se wɛ̀ è suuy kenəə kɛ ghene kiin kum wen.

³¹Ghel ɛyghoŋ ghii me nɛɛy kɛn ka ketuu ə ghene suuyen, è liɛ Bool kɛn ɛ ntək fo, è ndu nɛ̀ wen ɛ Antibatlis.

³²Əbtəke yio, ghel ɛyghoŋ ghɛ ɛ́ nè jɛ́len nɛ̀ kevəə kase fiile se ndaa ɛyfɛl, ghɛ́ nyamse əmnkoke me se nduu ghene ghe Bool.

³³Ghene ndu è chin ɛ Saesalea, fo ŋwaale yi se Goveno è me vii Bool se wen ə keghoo.

³⁴Əb jaŋ ŋwaale yi, è bif se Bool ge: Wɛ̀ lu wele wɛ̂ ghááy? Əb fise ge, mɛ lu wele Silisia,

³⁵əb yio dî, è me suuy se wen ge: Mɛ nɛ̂y lii se wɛ̀ kenəə əbliy wɛ ghel ghɛ ɛ́ toyen wɛ̀ gwiyen. Əb suuy dì è me lam ge ɛ́ lɛm Bool ɛ ntok yɛ Helod nè baklen, è yɛ chiy.