Read Oku Ɛyf 24 Bible Online

Ɛyf 24 - Oku bible

Ɛyf 24

¹Əbchii chia əbtan, Ananias wɛ ketuu se ghɛ́ ntaŋlee chio ɛ Saesalea ghene ghe chɛɛ selee gese nɛ̀ wel ɛysake nsakse əblee nɛ ɛ́ toŋte ge Teltullus. Ghene chio dî, è me ndu è yɛn Goveno Felis è nyiŋse kenəə nsak nə Bool se ntiɛ.

²Ɛ́ jaŋ Bool, Teltullus me kɛɛte se taŋ əbnəə Bool, è suuy ge: Babɛy Felis, wɛ̀ lu nɛ wɛ̀ sakmen ghɛs ɛ jii ɛyjuŋ, əmnyiaŋe se lu ɛ ketum fɛn se əbtəm, əbnəə kubsen se ɛydio wɛ əb nɛɛyen ketum kine se kuye nduu ɛ mbiy.

³Ghɛs lu nɛ ɛ́ fiisen ɛysak ə yiɛ jii sejim, əblik əbjim è se chɛkle wɛ̀ naa se ŋaŋ.

⁴Mɛ báà se kɛŋe se yiɛ əbliy ə viɛ se ɛydio è se lone ge wɛ̀ yiote kentime kenəə kɛ ghɛse suuy.

⁵Ghɛs yɛnmen ge wel vin lu wel əbbee, əb shike əmlaa lose əbchio ɛ məm nə ghele Juuse mbi ɛyjim. Əb lu wele mbiy se kenon kɛ ɛ́ toŋten ge Nazalenes.

⁶Əb nè lô se kɛŋe se bese ndaa-ɛykokse: Ghɛs koo wen è se kɛŋe se sak ka ɛysake yɛ́se dinen.

⁷Dî ketuu ɛyghoŋ kɛ Lisias too, è fii wen se ghɛs se kediak,

⁸è lam ge ghɛs ghɛ ɛ́ ghamen wen gwiy ɛ wɛ̀ ɛyshiɛ. Wɛ̀ loo lii ɛ wene kenəə, è yɛn ge əbnəə əbjim wɛ ghɛse suuyen kum wen lu əbluuy.

⁹Ghele Juuse chinten è gham Bool ge əbnəə wɛ ɛ́ suuyen kum wen lu se əbluuy.

¹⁰Goveno nɛy kwas Bool ge əb suŋnen əb me suuy ge: Mɛ ke ge wɛ̀ sakmen ketum kin se ngukse se ɛydio, mɛ se saŋle se teem ɛ wɛ̀ ɛyshiɛ se yɛ taŋle əbchio ə wom.

¹¹Wɛ̀ loo bifte, é wɛ̀ yio ge ke bɛɛy ghàà lun əbchii njio-sebaa ɛyvəm ka mɛ koken ɛ Jolesalem se kokse Feyin.

¹²Ghele Juuse nè báà yɛn nɛ mɛ beke mbek ghɛse ghele, kene lose əbchio ɛ ngay ɛyjim, kene ɛ ndaa-ɛykokse kene ɛ kelik kelee ɛ ntɛk,

¹³nɛ lòó ghene jia din əbluuy əbnəə ghan wɛ ghene toyen mɛ so se wɛ̀.

¹⁴Mɛ beeme kenəə kɛ ghene suuyen bek ge mɛ kokse Feyin fɛ ɛbaa-ɛbaa ə ghɛse nè koksen ɛ jii yɛ ge mɛ jumte jii yɛ ghene suuyen ge ɛy báà se lu ɛ titiy. Dî ko foo ɛytem se nchil sɛ Moses nè nyaken gese nɛ̀ əbnəə wɛ ghɛ́ ntum nə Feyine nè nyaken.

¹⁵Mɛ gese ki ɛybeeme ghɛɛ-ghɛɛ ka ghel ghine kiin ge Feyine náà lose ghel ɛjim se ɛykuo, luun ɛ titiy nɛ̀ ghɛ ɛ́ wiyen ɛ titiy.

¹⁶Mɛ me se mome əbliy əbjim se yɛ ki ɛytem ɛylanene ɛyshiɛ nə Feyine gese nɛ̀ se ɛyshiɛ nə ghele.

¹⁷Nè lu ka ngukse nè chianmen nɛ mɛ báà ndu se Jolesalem, mɛ chî yɛn ge mɛ ndu nɛ̀ əbkaa se fo se ghel ə ghome se gese se taŋle ntaŋle.

¹⁸Nɛ lu əbliy wɛ mɛ taŋle ntaŋle ɛ ndaa-ɛykokse wɛ ghele Juuse ghɛ nè loon ɛ Asia nè yɛnen mɛ kɛn ka mɛ suun kensuu è mɛyse. Nè lu dî nɛ ngose wel wiy fo, nɛ ghele kume wiy əbchio.

¹⁹Dî nɛ ghel ghɛ ɛ́ nè luun fo, lu ghele Juus ɛlee ghɛ ɛ́ nè lòòn ɛ Asia. Ghel nɛ̂ ghi kè lu se yɛ lu fɛn se ghame mɛ ɛ́ wɛ̀ ɛyshiɛ ɛ lefɛ ghene nè lô yɛn nɛ mɛ jas.

²⁰Buu dî ghel ghin ghɛ ɛ́ tiyen fɛn suuy yi kejas ə kom kɛ ghene nè yɛne ɛ əbliy wɛ mɛ nè tiyen ɛ ɛytiye nsak.

²¹Buu yi ge ɛ́ yɛ lu kenəə kemok kɛ mɛ nè jaŋen è suuy ɛ ghene məm ge: Ghɛne sake mɛ lan bek ge mɛ ki ɛybeeme ge ɛnkfə náà loole se ɛykuo.

²²Felis yióté, è me chite nsak, bek ka əb nè loote keen Jii yɛ kum Jesus è suuy ge: Mɛ nɛ̂y tenen nsak ə yiɛ nɛ ketuu ɛyghoŋ kɛ Lisias gwiymen.

²³Əb me lam ge wele mbiy ɛyghoŋ əblee liɛ Bool è chia è fen, dî è ko yɛ vəse wen nɛ əb lu se wene ngeŋ, è fo jii é ghel ɛyjɛl nə wen yɛ foo naa ghɛ se wen kɛ əb shiin.

²⁴Əchii loo chia, Felis ghene wiy ə wen Dlusilla wɛ wele Juus gwiy. Felis lam ɛ́ gwiy nɛ̀ Bool, əb yio ka Bool suŋnen kum ka lòó wel vii ɛytem se Jesus Christ əbghun.

²⁵Se lu ka Bool nè suŋnen nduun kum ɛychii ɛyjuŋe, nɛ̀ ka lòó wel ghal ngeŋ ə wen gese nɛ̀ kechii kɛ Feyine náà sak ghel ɛjim ɛ ten, Felis me se fane è me suuy ge: Yɛɛ nduu se leenen, mɛ nɛ̂y kooy əbliy, è toŋte wɛ̀.

²⁶Nè lu dî nɛ əb kwaate ge Boole fó əbkaa se yi, è me se moote ko jaŋe wen nɛ̀ ghene wen kfənte kenfiɛl.

²⁷Kɛn dì, kɛn dì, ngukse chia sebaa, Bolsius Festus kok ketiɛ Goveno kɛ Felis nè luun ɛ ten. Felis loo kɛŋ se jofse ɛykek ghene ghele Juuse, è me vəse Bool ɛ ndaa nchak.