Read Oku Ɛyf 25 Bible Online

Ɛyf 25 - Oku bible

Ɛyf 25

¹Nɛy se lu ka Festus nè kɛɛnmen ɛyfɛl, əbchii chia əbtal, əb lòò se Saesalea, è kok se Jolesalem.

²Ghele mbiy se ghɛ́ ntaŋlee, nɛ̀ chɛɛse ghele Juus selee gwiy è se béétê nsak yɛ ghene somsen Bool se wen lone ge,

³Əb ko giamten ghene, ɛ́ tinse Bool se Jolesalem é sak wen fo. Nè lu dî nɛ ɛ́ taŋmen ge ɛ́ guo Bool ɛ jii è yuy.

⁴Festus fise ge: Bool lu ɛ kengɛye nchak ɛ Saesalea, nɛ mɛ se mɛ ngeŋ shi se kase se fiile fo.

⁵Loo lu ge əb nè lô nɛɛy kenəə kebee, mɛ nɛ̂y chio é ghele mbiy nə ghɛne gwiy fo, è teem è gham wen.

⁶Festus gese chii fo ka əbchii ɛyfaame kene ɛyvəm è me lòò è chio ɛ Saesalea. Əbtəke yio, əb diom ɛ ndaa nsak è lam ge é gwiy nɛ̀ Bool.

⁷Bool gwiy, ghele Juus ghɛ ɛ́ nè lòòn ɛ Jolesalem teem ɛ wen ɛybee è kɛɛte se toy əbnəə əbtaa ɛ wen əbghun wɛ nè lòó ghene jia din əbluuye ten.

⁸Bool me taŋle əbchio ə wen ge: Mɛ báà jas nchile ghele Juus, è jia nɛɛy kenəə kebee ɛ ndaa-ɛykokse, kene se əbfon ə Lûm.

⁹Festus se kɛŋe se jofse ɛykek se ghele Juuse, è me bif se Bool ge: Wɛ̀ lɛ koŋe se kok se Jolesalem é mɛ sak nsak ə yiɛ fo-a?

¹⁰Bool fise ge: Mɛ tiy ɛ leenen ɛ ɛytiye nsak nə əbfone Lûm nɛ lu fo ghaa ɛ́ sak mɛ. Wɛ̀ ke se əbluuy ge mɛ báà nɛɛy kenəə kebee se ghele Juuse.

¹¹Lòò yɛ lu nɛ mɛ jas nchil, è nɛɛy kenəə kɛ lòó ɛ́ yúy mɛ se ten, é mɛ jia yɛ lɛk ɛykuo. Dî nɛ loo yɛ lu ge əbluuye wiy ɛ əbnəə ghan wɛ ghene toyen mɛ so, é wel jia vii mɛ se ghene keghoo. Mɛ lone ge ɛ́ chiase nsak ə yom se əbfon ə Lûm.

¹²Festus ghene ghɛ́ ntef nə wene chinen əbtuu, è me suuy se Bool ge: Ka wɛ̀ lonen ge ɛ́ chiase nsak ə yiɛ se əbfon ə Lûm, fene wɛ̀ ndu se wen.

¹³Nɛy se lu əbliy əblee əbfon Aglibba ghene Belnis gwiy ɛ Saesalea se fiisene Festus.

¹⁴Ghene chii fo se əbchii se ɛydio. Festus me nyiŋse nsak ə Bool se əbfon ɛyshiɛ è se suuye ge: Wel əblee lu fɛn ɛ kengɛye nchak wɛ Felis nè loo lòò è vəse.

¹⁵Mɛ nɛy ndu ɛ Jolesalem ghele mbiy se ghɛ́ ntaŋlee, ghene chɛɛse ghele Juuse Judea se toye əbnəə ɛ wen əbghun se ɛydio, lone ge mɛ suuy ɛ́ yuy wen.

¹⁶Mɛ suuy se ghene ge ghele Lûme sɛɛ jia beeme ge ɛ́ yúy wel nɛ əb bɛɛy ghàà teem ɛytiy ə nsak ghene ghel ghɛ ɛ́ toyen wen, è taŋle əbchio wen.

¹⁷Ghene nɛy gwiy fɛn mɛ jia gese jefse əbliy, əbtəke bvəse è yio mɛ me diom ɛ ndaa nsak è suuy ge ɛ́ gwiy nɛ̀ wen.

¹⁸Ghele nsak nə wene loole è jia din kenəə kɛ kè lòó mɛ yɛ kwaate ge lu kenəə kɛ ɛ́ toyen wen se ten.

¹⁹Ghene nè toye wen se kenəə kɛ kum jii yɛ ghene koksen Feyin ɛ ten, gese toye wen kum wel əblee wɛ əb nè kuomen nɛ̀ ɛ́ toŋte ge Jesus, dî nɛ̀ Bool suuye ge əb lu əbtaa.

²⁰Ka nè lòó mɛ jia keele se lii ɛ məme kenəə ghan, mɛ bif se Bool ge sɛ lòó əb ndu ɛ Jolesalem ɛ́ sak wen fo se əbnəə ghan wɛ ɛ́ toyen wen se ten-a?

²¹Dî Bool suuy ge ɛ́ vəse yi ɛ nchak é əbfon ə Lûm nɛy sak nsake yi. Mɛ me suuy ge ɛ́ lem wen ɛ ndaa nchak se chin ka mɛ nɛ̂y kiile nsan se tinse wen se əbfon ə Lûm.

²²Aglibba me suuy se Festus ge: Mɛ koŋe se yio kenəə kɛ wel vine suuyen nɛ̀ əbtuule ə wome. Festus fise ge: Wɛ̀ nɛ̂y yiote se wen ɛ likebvəchi.

²³Əbtəke bvəs è yio, Aglibba ghene Belnis se gwiye nɛ̀ kewel tefone, nɛ ɛ́ təme əmnkfəm se ghene əbghun. Ghene nè lii gwiye ɛ ngay fo ghene ghɛ́ ɛyghoŋe gese nɛ̀ chɛɛ sɛ ntɛk foo. Festus me lam ge ɛ́ gwiy nɛ̀ Bool.

²⁴Əb me suuy ge: Əbfon Aglibba gese nɛ̀ ghel ghɛ ɛ́ luun fɛn ɛjim, ghɛn yɛn wel vin. Lu wen wɛ ghele Juus ghɛ ɛ luun fɛn gese nɛ̀ se Jolesaleme yese gwiyen zəəmen se mɛ ge ɛ́ lu se yuy yuyén.

²⁵Dî mɛ jia yɛn kenəə kɛ əb nɛɛyen kɛ lòó ɛ́ yúy wen se ten. Əb nè toŋmen ge ɛ́ chiase nsak ə yi se əbfon, mɛ me beeme se tinse wen se Lûm.

²⁶Mɛ bɛɛy ghàà yɛ ki kenəə kɛ lòó mɛ nyak se əbfon ə Lûm kum wen. Mɛ me gwiy nɛ̀ wen se ghɛn naa se wɛ̀ əbfon Aglibba ge wɛ̀ loote kiynen nsak ə wen ka mɛ keele ka mɛ nyak se əbfon ə Lûm.

²⁷Ke wiy ɛ titiy ge mɛ yɛ tinse wele nchak se əbfon loote dine wiy kejas ə wen.