Read Oku Ɛyf 26 Bible Online

Ɛyf 26 - Oku bible

Ɛyf 26

¹Aglibba me suuy se Bool ge: Lòó wɛ̀ taŋle əbchio viɛ ɛ leenen. Bool nase keghoo è fek, è me kɛɛte se taŋle əbchio wen ge:

²Mbɛɛ, mɛ lu nɛ mɛ yɛn ge mɛ ki ɛshiɛ ɛjuŋe se yɛ tiy ɛ wɛ̀ ɛyshiɛ lan se taŋle əbchio ə wom kum əbnəə əbjim wɛ ghele Juuse toyen ɛ mɛ əbghun.

³Mɛ suuy lɛ bek ge wɛ̀ loote ke nchiine ghele Juus ɛyjim, gese ke əbnəə wɛ ghene gufnen se ten. Mɛ me se lone ge wɛ̀ kul ɛytem è yiote kenəə kɛ mɛ suuy.

⁴Ghele Juus ɛjim ke nchiine ə yom, kɛɛte se ka mɛ nè kuyen se wan əbtɛlɛ ɛ ghɛse ketum gese nɛ̀ se Jolesalem.

⁵Ghene nè se ke mɛ se əbtəm, nɛ̀ ghene kè koŋe se suuy əbluuy é ghene fiɛl ka mɛ nè shiin wele kenone Falisee kɛ ke nè loote lɛmen tesak ə Feyin.

⁶Mɛ me se tiy ɛ ɛytiye nsak lan nɛ lu bek ka mɛ chiyten ɛykak yɛ Feyine nè kaken ɛbaa ɛbaa ghɛs so.

⁷Lu ɛykak nɛ̂ yin yɛ tekfəə tɛse ghene tɛ njio-sebaa ɛyvəme chiyten se kiile, kokse Feyin nɛ nchuy gese nɛ ntəke. Mbɛɛ, lu ɛykak nɛ̂ yin yɛ mɛ chiyten yɛ ɛy nɛɛyen mɛ se ki nsak ghɛse ghele Juuse.

⁸Lu bek ghɛ wɛ wel se ghɛne báà se yɛne ge Feyine lose ghel se ɛykuo?

⁹Mɛ se mɛ ngeŋ nè lô beeme sɛy ge ke lu ɛ titiy ge mɛ nɛɛy naa ghɛ kɛ lòó mɛ nɛɛy se buuse ɛyghel ə Jesus wɛ Nazalet.

¹⁰Nɛ mɛ nè lô se nɛɛy di ɛ Jolesalem. Əbtuu ghɛ́ ntaŋlee nè lô fo əbtaawe san mɛ vii ghele Feyin se ndaa nchak se ɛydio. Ɛ́ nè loo lu ge ɛ́ yúy wel, mɛ tokte ge ɛ́ yúy.

¹¹Mɛ nè lóó mɛ yɛ jɛle lii ɛ ngayse ɛyjem sejim nəkse ghel, kane ge ghene maa Jesus. Mɛ nè yafse ɛytem se ghene naa se ŋaŋ, bii ɛvəə ghen nduu chine se ntɛke sɛ əbtum əblee.

¹²Nè lu bek kii nɛ̂ kine kɛ mɛ nè fiin ŋwaale se ghele mbiy nə ghɛ́ ntaŋlee yɛ ɛy nè foon əbtaawe se mɛ ge mɛ ndu ɛ Damaskus.

¹³Mbɛɛ, mɛ loo ndu ɛ jii nɛ shi ka chuy tiysen, è yɛn ɛyban ka ɛy lòòn ɛ ɛyyio, liake chia chuy, ɛy liak è kaale ghɛse ghele ngoo nə mɛ è tas.

¹⁴Ghɛs fɛyke se ntiɛ naa ɛjim. Mɛ yio nɛ giɛ ə wel suuye se mɛ əblam ə Heblu ge: Sool, Sool, wɛ̀ nəkse mɛ lɛ bek ghɛ? Wɛ̀ lɛmse ngeŋ ə yiɛ ka kembɛɛybiy kɛ ɛ́ tinten nɛ̀ mbàŋ nɛ̀ kɛ tiɛle mbàŋe ten.

¹⁵Mɛ me bif ge: Lu wɛ̀ ndɛ Báàba? Báàba fise ge: Lu mɛ Jesus wɛ wɛ̀ nəksen.

¹⁶Loole è teem ɛ yio. Mɛ kè gwiye se yɛne wɛ̀, se lɛme wɛ̀ ka wel ɛyfɛl nə mɛ, é wɛ̀ yɛ fekte kenəə kɛ wɛ̀ yɛnen lan kum mɛ, gese nɛ̀ əbnəə wɛ mɛ bo bɛɛyen se yɛ din se wɛ̀.

¹⁷Mɛ nɛ̂y boyse wɛ̀ se keghoo nə ghele Juuse gese nɛ̀ se keghoo nə ghel əbtum ghɛ mɛ tumen wɛ̀ se ghene.

¹⁸Wɛ̀ nɛ̂y yiase ɛshiɛ ghen ka ghene fəy se mbi nfiine è kase gwiy se ɛyban. Ghene nɛ̂y vəse kediak ə Satan è lii se kɛ́ Feyine, è fo ɛytem se mɛ é Feyine lɛyse mbeese ghen. Ghene nɛ̂y me yɛ ki kelik ɛ məm nə ghel ghɛ Feyine siysenmen.

¹⁹Mbɛɛ, ka Jesus nè gwiyen ɛyyio è yɛn mɛ, mɛ ko me se nɛɛy kɛn ka əb nè suuyen,

²⁰è kɛɛte ɛ Damaskus se fekte kum wen è ndu è chin ɛ Jolesalem. Mɛ nè jɛle fekte ɛylake Judea ɛyjim gese nɛ̀ əbtum əblee ge ghene kubsen tetem ə ghene è fiile se Feyine è yɛ nɛɛy əbnəə ka ghel ghɛ ɛ́ kubsenmen.

²¹Bek kii nɛ̂ kine-a, ghele Juuse koo mɛ ɛ ndaa-ɛykokse è se kɛŋe se yuy.

²²Dî Feyine se fii mɛ əbliy əbjim è kok è chin lan vin. Mɛ me se tiy fɛn lan teefe ntum ə yom se ghel ɛghakene gese nɛ̀ ɛtɛlɛɛ, nɛ̀ mɛ fekte nɛ lu kenəə kɛ Moses ghene ghele ntum nə Feyine nè suuyen ge kɛ náà gan.

²³Nɛ ke lu ge Vi wɛ Feyine nè Yiosene náà yɛn ngɛk, è yɛ lu wele mbiy se loole se ɛykuo, è fekte ge ɛybane shi se ghele Juuse gese nɛ̀ ghel əbtume.

²⁴Ka Bool nè taŋlen əbchio wen se din ge yi báà nɛɛy mbee, Festus me waame se wen ge: Bool, wɛ̀ jake jaken-a? Wɛ̀ yiɛkenmen ŋwaale se ŋaŋ ɛy nɛɛy wɛ̀ se jake.

²⁵Bool fise se wen ge: Babɛy Festus, mɛ báà se jake jaken. Mɛ suuy nɛ lu kɛn əbluuy.

²⁶Əbfon ke əbnəə vin əbjim, nɛ mɛ suŋnen se wɛ̀ ɛ tɛtɛ, ke keen ge kenəə wiy kɛ wɛ̀ maan bek ge ɛ́ báà nɛɛy əbnəə nɛ vin ɛ kenlete.

²⁷Əbfon Aglibba, ɛ́ sɛ lu nɛ ɛ́ bééme ghele ntum nə Feyin-a? Mɛ ke ge ɛ́ lu nɛ ɛ́ beeme.

²⁸Aglibba suuy se Bool ge: Wɛ kwaate ge lòó wɛ̀ nɛɛy é mɛ yɛ lu wel əbbeemen kɛn se feleeŋese əbliy lɛ-a?

²⁹Bool suuy ge, kene əbliye diaf, kene əb təmse, fene mɛ jeme ge Feyine nɛɛy é əbfon ghene wel əbjim wɛ əb yioten kenəə kɛ mɛ suuyen lan yɛ lu ka mɛ. Dî nɛ mɛ báà se kɛŋe ge ɛ́ kul wen nɛ̀ nchakse ka mɛ lɛ.

³⁰Əbfon ghene Goveno, nɛ̀ Belnis gese nɛ̀ ghel ghɛ ɛ́ nè luun fo me loole è se fəye.

³¹Ghene fəy è ndu è chinen əbtuu è suuy ge: Wel vine báà nɛɛy kenəə kɛ lòó ɛ́ yúy wen yuyén kene kɛ lòó ɛ́ vii wen ɛ nchak se ten.

³²Aglibba me suuy se Festus ge kè buu nɛ wel vin liɛ nsak ə wen se əbfone wɛ Lûm fene ɛ́ kè lô vəse wen.