Read Oku Ɛyf 27 Bible Online

Ɛyf 27 - Oku bible

Ɛyf 27

¹Nɛy se lu ka ɛ́ nè liɛmen ge ghɛse diaŋ se Itali, ɛ́ me vii Bool ghene ghele nchak ɛlee se keghoo nə Julius wɛ wele mbiy se kenon ɛyghoŋe kɛ́ ntoke Lûme.

²Ghɛse ghene me lii se kenək ɛ Adlamittium nɛ ke nè shi se lòò se yɛ jɛl ɛ əbchio jio ɛ ngvən Asia, ɛ́ me lòò. Nè lu dì nɛ Alistalkus wɛ̂ Tessalonika ɛ Masedonia lu ghɛse ghene.

³Əbtəke yio, ghɛs chin ɛ Sidon. Julius se lu wel ɛytem ɛyjuŋe, è vəse Bool ge əb ndu è yɛn sunse wen ka ghene yɛ foo əbfua se wen wɛ əb shiin.

⁴Ghɛs gese lii se kenək è se diaŋe, əbfiɛfe loo fɛɛ ghɛs se ŋaŋ, ghɛs me wɛbte jii ɛybee ɛylake Siblus yɛ əbfiɛfe nè chian ɛ ten se ɛylaay.

⁵Nɛy se lu ka ghɛs nè diaŋenmen jio ɛyghaken è chia əbghune Silisia ghene Bamfilia, ghɛs me chin ɛ ntɛke Mila ɛ Lisia.

⁶Wele mbiy ɛyghoŋ vi yɛn kenək nɛ ke loo Alesandlia è se nduu ɛ Itali, è me vii ghɛs se ten.

⁷Ghɛs se diaŋe fɛɛ fɛɛ se əbchii se ɛydio è chin ɛ Kidus ge heb. Əbfiɛfe jia se beeme ge ghɛs ndu ɛ titiy, ghɛs me se wɛbte diaŋe jii ɛybee yɛ əbfiɛfe nè luun ɛ ten se ɛylay ɛ ɛylake Klet, è ndu chia ɛ ɛyghaŋe Salmone.

⁸Ghɛs ko se taŋen jɛle kɛn ɛ əbchio jio è ndu è chin ɛ kelik nɛ ɛ́ toŋte ge Fɛɛ Hɛvens nɛ lu əbghune ntɛk yɛ Lasea.

⁹Ka ghɛse chinen fo nɛ ɛ́ jefsemen əbliy se ŋaŋ, ɛyjɛle me se taa, nɛ kechii kɛ ɛ́ sɛɛ yiɛ kum ɛybam əbfua-əbyíɛ́ne chiamen Bool me tefte ghene ge:

¹⁰Ketume, mɛ yɛne nɛ ɛyjɛl ə yɛ́sene befmen ɛ mbiy. Əbfua ə wɛsene naa se ɛydio nɛ kenəke nɛy bef, é ghele kuoke sɛy.

¹¹Dî wele mbiy ɛyghoŋ vi yióté kenəə kɛ wel wɛ əb nè toknen nɛ̀ ghel ghɛ ɛ́ nè gufen kenək, gese nɛ̀ ba kenək nè suuyen, nɛ wiy kɛ Bool nè suuyen.

¹²Bek ka əbchio jio nɛ̂ vi nè wiy əbjuŋ ka lòó ghele bɛɛ ɛ ten ɛ əbliye kenton, ndio ghel me se koŋe ge fene ɛ́ kè mome nduu se mbiy è chin ɛ Foeniks, nɛ lu əbchio jio ɛ Klet, bene fɛ nè lòó ghene bɛɛ əbliye kenton. Ghɛs nè nduu, foo Feonis ɛ ɛybee Klet yɛ əbkoy əbkiye.

¹³Əbfiɛfe loo fɛɛte wɛ lòó əb yɛ jɛl nɛ̀ kenəke wɛ̀ɛ̀ wɛ̀ɛ̀, ghele kenək ghii me se kwaate ge ɛshiɛ ghene jofmen. Ghene me chok ngoowel yɛ ɛy nè ghalen kenək ɛ jio è me se nduu, jɛle kɛn nɛ lu ɛyghaŋe jio ɛ Klet.

¹⁴Ghene se keŋte nduu, əbfiɛf əbtaa me se chio ɛylak fo. Əbfiɛf nɛ̂ vine sɛɛ gwiy jii ɛybee Klet yɛ əbkoy əbkiye ka wele kiyen ɛybee yɛ chuy sɛɛ too ɛ ten.

¹⁵Əb gwiy, è shikse kenək, ke ghak ka loo ɛ́ bense. Ghɛs me vəse əbfiɛf vi liɛ kenək è se nduu so,

¹⁶è loo ndu, è chia jii ɛybee yɛ əbfiɛfe nè chian wiy ɛ ten se ŋaŋ ɛ əbghune fetuumese felee ɛ fɛtetene jio nɛ ɛ́ toŋte ge Kauda. Ghɛs luŋ fo luŋen è guf kenək ketɛlɛɛ kɛ ɛ́ nè chəŋen ɛ ɛybame keghakene è vii se məme keghakene fɛ ke tenen è lɛŋ.

¹⁷Ɛ́ guf è vii, è me loote kɛyte kenək keghakene nɛ̀ kfəəse fɛ ke yɛ sakte. Ghene loo fan ge lòó kenəke lii è taa se məme kesɛsɛy ɛ əbchio jio ɛ Libia, è me səkse ndəy sɛ əbfiɛf sɛɛ lii ɛ ten, nɛɛye nɛ kenəke nduu, è me vəse ke se nduu se ngeŋ.

¹⁸Əbfiɛf əbtaa vii se chia kɛn chian, əbtəke yio, ɛ́ kɛɛte se fəyse əbfua se kenək makle se jio bek ka ɛ́ fanen ge ke sooy se jio.

¹⁹Əbtəke gese yio, ghene me se fɛyse əbfua wɛ ɛ́ sɛɛ siyse kenək so makle se jio nɛ̀ ɛghoo ə ghene.

²⁰Nɛy se lu se əbchii se ɛydio nɛ ghɛse báà yɛn chuy kene əmnjes, nɛ əbfiɛfe ko bo chia naa se ŋaŋ se ŋaŋ, ghɛs jia gese se kwaate ge ghɛse bo boy è me liɛ ge ghɛs kuokemen.

²¹Nɛy se lu se əbtəm nɛ ghene báà yiɛ kefaa, Bool teem ɛ ghene ɛyshiɛ è suuy ge: Ketume, ghɛn nè bóy se yio mɛ nɛ ghɛsen jia lòò se Klet, fene kenək kine báà bef lɛ, ghɛsen jia lɛy əbfua ɛ jii ghan.

²²Mɛ me se lone ge, ghɛn kul ɛytem, bek ge wele jia nɛ̂y kuo ɛ ghɛsene məm, é nɛ̂y sakte kɛn kenək.

²³Mɛ suuy lɛ bek ge chî se lu nɛ̀ ntəke lan, nchiy-ndaa-Feyin Fɛ mɛ koksen, nɛ lu Feyin Fɛ Fe kiin mɛ teem ɛ mɛ ɛybee,

²⁴è suuy ge: Bool, ghàà yɛ fan. Wɛ̀ lu se nɛ̂y se teem ɛ ɛyshiɛ nə əbfone Lûm. Feyine lu wel əbjuŋ, nɛ əb lɛmen ge wel se ghel ghɛ ghɛne ghene jɛ́lene jia kuo.

²⁵Ke me se lu ketume ge, ghɛn kul ɛytem, mɛ lu nɛ mɛ fo ɛytem se Feyin nɛ əbnəə nɛ̂y gan kɛn ka əb suuyen se mɛ.

²⁶Kenəke lu se nɛy se soo əbchio ɛ felaktese felee ɛ fetetene jio fɛn.

²⁷Əbchii chin njio sekɛɛk ɛyvəm ka əbfiɛf əbtaa jefen nɛ̀ ghɛs ɛ jio ɛyghuy yɛ ɛ́ toŋten ge Adlia, loo lu nɛ ɛyteme ntəke, ghel ghɛ ɛ́ nè gufen kenək se kwaate ge ɛ́ se báksen nduu nɛ̀ əbghooye jio.

²⁸Ghene me mak kfəə se jio nɛ ɛ́ kul ɛytiy se ten è yɛn nɛ jio bo sooy fo ka ɛykoy əmbaa dì, ghene se keŋte nduu, è gese mak è yɛn nɛ shi ɛykoy njio-setan ɛyvəm.

²⁹Ghene me se fane ge lòó kenək ə kɛse ghene kfən ɛyghok, è me mak ngoowel sekɛɛk ɛ ɛybame kenək ka ke jia bo yɛ jɛl è se jeme ge əbtəke yaŋse yio.

³⁰Ghel ghɛ ɛ́ nè gufen kenək loo kɛŋ se nyiŋ, è me səkse kenək ketɛlɛ kelee se jio è se yia ge ɛ́ kɛŋe se make ngoowel se jio jii ɛybee kenək yɛ mbiye.

³¹Bool me suuy se wele mbiy ɛyghoŋ nə ghel ə wene ge: Əbnguf vine jia gok ɛ kenək fɛn, é ghɛn jia nɛ̂y fəy ɛtaa.

³²Ghel ɛyghoŋe me teene kfəə sɛ ɛ́ nè chəŋen kenək ketɛlɛɛ so, ke me lɛŋ è nduu.

³³Əbtək loo yio, Bool me se lone ge wel əbjim yiɛ kefaa, suuye ge: Lan shi əbchii njio-sekɛɛk ɛyvəm ka ghɛne yaŋen yaŋen nɛ wele báà yiɛ kefaa.

³⁴Mɛ me se lone ge ghɛn ko vii kefaa se əbchio ka ghɛne kiile kediak, bek ge wel se ghɛne jia nɛ̂y lim nəŋ ketuu nə wen.

³⁵Bool suuy dì, è me liɛ keban è bɛ̀ɛ̀lè Feyin ɛ ghene ɛyshiɛ ghel ɛjim è bɛk è se yiɛ.

³⁶Ghene ghel ɛjim me kul ɛytem è se yiɛ.

³⁷Ghɛs ghel ɛjime nè lu ɛ kenək fo wel ɛyviɛ ɛybaa nɛ̀ njiose-ntuufe əmsaamba.

³⁸Wel əbjim yiɛ è kul, ɛ́ me fəyse kembɛke ɛsaŋ è maay se jio ka kenəke yaŋse.

³⁹Əbtəke yio, ghene jia keele kelik kɛ ghɛne nè luun ɛ ten, dî ghene yɛn kelike ntiɛ kelee nɛ kesɛsɛye nəken ɛ ten, è me liɛ ge ɛ́ mom se ndu nɛ kenəke fo.

⁴⁰Ɛ́ me teene kfəə sɛ ɛ́ nè chəŋten ngoowe so, se gok se jio, ɛ́ yayte kfəə sɛ ɛ́ nè kulen mbàŋ sɛ ɛ́ sɛɛ bense kenək so, è lose ndəyse kenək sɛ ɛybee mbiye, əbfiɛfe lii se ten, è se dome kenək nduu so.

⁴¹Dî kenəke me ndu kfən kfənen kesɛsɛy ɛ məme jio è taa se fo. Ɛybee mbiye lii se ntiɛ ɛ jii yɛ lòó ke jia bo jɛl. Əbfiɛfe me se lose moo se kediak nɛ əm sakte ɛybame kenək.

⁴²Ghɛ́ ɛyghoŋe me se taŋe ge ghɛne yúyté ghele nchak ɛjim fɛ əblee báà sam jio è fəy è nyiŋ.

⁴³Wele mbiy nə ghen jia se koŋe ge ɛ́ yúy Bool è tun è me tun kenəə ten è me lam ge: Wel əbjim wɛ əb keen se same jio, chak è sam è fəy ndu è fəy ɛ shif.

⁴⁴Kembɛke ghele me ghaten əbntime əmkak kene əbnsake kenək. Se lu ɛ jii ghan yɛ wel əbjim nè chinen ɛ shif ɛ jio è fəy əbtaa.