Read Oku Ɛyf 28 Bible Online

Ɛyf 28 - Oku bible

Ɛyf 28

¹Ghɛs fəy se jio kejuŋ dì ɛ leghɛ è me yio ge kelik nɛ̂ kii lu kelik kelee ɛ fetetene jio kɛ ɛ́ toŋten ge Malta.

²Ghele ghɛ felaktese fo fiisen ghɛs naa kejuŋ, è kwaay əbvəs, bek ge ɛyghuu nè kɛɛtemen se yɛ gwiy nɛ kentone lu.

³Bool baate əmkak è loo kwaay, nɛ mbám lu ɛ ten, əbvəse loo lum ɛy me fəy, è lum keghoo ə Bool è se njɛye ɛ ten.

⁴Ghele ghɛ́ kelik nɛ̂ fo yɛn ka yio njɛyen ɛ Bool ə keghoo è se chəmtene ge: Ɛymaanene wiy ge wel vine sɛɛ yuyte ghel. Chèmè lu ka əb boyen se kuo ɛ jio lu nɛ lon ə wen bo bii ɛvəə ə wen nɛ əb nɛ̂y kuo.

⁵Dî Bool mis mbám yi misen se wen ə keghoo, ɛy too se əbvəs kenəə jia gan se wen.

⁶Ghene me se kwaate ge Bool jia məl, é əb fɛy è kuo kɛn se əbliy. Ghene moo naa se ŋaŋ è yɛn nɛ kenəə báà gan se Bool è me kubsen əblam è suuy ge: Wel vin lu feyin felee.

⁷Ketuu kɛ foo nè ki ɛylem ɛ əbghune kelik kɛ ghe Bool nè luun ɛ ten nɛ ɛ́ toŋte wen ge Bublius. Əb nè lô fiisen ghɛs naa kejuŋ, ghɛs chii ɛ wen ə ntok se əbchii əbtal ka ghel ɛyghan nə wen.

⁸Nè lu dì nɛ Ba ə Bublius nyiŋ ɛ əbkun nɛ̀ kenchɛme, nɛ əblɛɛ ə wene nduu. Bool ndu è lii ɛ wen ə ndaa è se jeme nɛ əb lɛm keghoo ɛ wen ə ketuu əb me bonen.

⁹Ke gan dì, ghele ghɛ felaktese fo ɛlee ghɛ ɛ́ nè yafken me se gwiye se Bool nɛ əb chuke ghene.

¹⁰Ghele me se foo əbfua se ghɛs se ɛydio. Ghɛs naa loo lòò ghene gwiy nɛ əbfua se ghɛs wɛ ghɛs nè shiin.

¹¹Ghɛs nè chii fo se njoŋ setal, è naa lii se kenək nɛ ke lòò ɛ Alesandlia nɛ ɛ́ toŋte ge əbmbaksene əmnyin. Kenək nɛ̂ kin nè gwiy è bɛ̀ɛ̀ è se lu ɛ Malta ka əbliye kentone chia.

¹²Ghɛs se nduu è chin ɛ ntɛke Silakuse, è chii fo se əbchii əbtal

¹³è lii kenək, è lòò se fo è ndu è chin ɛ Legim. Əbtəke yio, əbfiɛfe se fɛɛ koke koken, ghɛs lòò, se lu ɛybame kechii, ghɛs me chin ɛ Buteoli.

¹⁴Ghɛs chin fo di è yɛn ghele ɛbeemene fo, ghene se lone ge ghɛse ghene ko chii se əbwɛy əbful. Ghɛs nɛy me lòò è ndu se Lûm.

¹⁵Nè lu dì nɛ ghone-nyii ghɛ́ foo yiomen ge ghɛse gwiye, ghene lòò è se gwiye ge ghɛse ghene konen, ɛ́ konen ɛ əbwɛye Abbius nɛ̀ se əbbɛɛle wɛ əbtal. Bool yɛn ghene, è bɛ̀ɛ̀lè Feyin, ɛytem ə wene lumte.

¹⁶Nɛy se lu ka ghɛs nè chinen ɛ Lûm, ɛ́ vəse Bool əb se chii se wene ngeŋ, nɛ wel ɛyghoŋ ko chiye wen fɛ əb nyiŋ.

¹⁷Se lu ka Bool nè chiinmen ɛ Lûm se əbchii əbtal, əb jaŋ ɛydiome ghele mbiy nə ghele Juuse ghɛ ghoo. Ghene gwiy əb me se suŋnene se ghene fiɛle ge: Ghone-nyii, chèmè lu ka mɛ nè báà jas kenəə se ghele, kene nchiine ɛylak nə ɛbaa ə ghɛsene, ɛ́ nè lô vii mɛ se nchak ɛ Jolesalem, è kase vii se keghoo nə ghele Lûme.

¹⁸Ghene lii ɛ mɛ kenəə, è se kɛŋe se vəse mɛ bek ge ghene nè báà yɛn kenəə kɛ mɛ nè nɛɛyen kɛ lòó ɛ́ yúy mɛ se ten.

¹⁹Dî ghele Juuse jia beeme, mɛ me suuy ɛ́ chiase nsak ə yom se əbfon ə Lûm. Mɛ nè báà nɛɛy dì ge mɛ ki kenəə se toye ghele ghɛs so.

²⁰Ghan kenəə kɛ ke nɛɛyen, mɛ jaŋ ghɛn ge ghɛsen suŋnen. Ɛ́ kul mɛ nɛ̀ nchakse lɛ bek ka mɛ foon ɛytem se wel nɛ̂ vi wɛ ghele Islaele chiyten.

²¹Ghene me suuy se wen ge: Ghɛs nè bɛɛy ghàà kiile ŋwaale yɛ ɛy lòòn ɛ Judea kum wɛ̀, nɛ ghone-ɛnoo ghɛsene ghɛ ɛ́ lòòn fo bɛɛy ghàà fiɛl kenəə kebee kum wɛ̀.

²²Dî nɛ ghɛs koŋe se yio kenəə se wɛ̀ bek ge ghɛs ke ge ghele suŋnen kebee əblik əbjim kum kenchinten kɛ wɛ̀ luun ɛ ten.

²³Ghene ghe Bool me lɛm kechii kɛ ɛ́ nɛ̂y konen ɛ ten, nɛy se lu ɛ kechii fo ghele gwiy se ghaa Bool nè chiin naa se ɛydio. Əb me se sayte əbnəə se ghene kum ɛysak ə Feyin se kɛ̀ɛ̀tè ɛ bvəse bvəse se chin se likfəəy, dinte əbnəə wɛ ə́b nè fəyen ɛ ŋwaale nə Moses gese nɛ̀ se ŋwaale sɛ ɛynyake nfektese luŋe ge ghene keele wel wɛ luun Jesus.

²⁴Ghel ɛlee beeme kenəə kɛ əb suuyen, ɛlee tun.

²⁵Ghene me se beke mbek se ghene ngeŋse lóò, nɛ Bool kè suuymen kine ge: Keyioy Kelanene nè lu ɛ titiy ɛ əbliy wɛ əb nè nɛɛyen nfekte yɛ Ezaya suŋnen se ɛbaa ɛbaa ə ghɛne.

²⁶Əb nè suuy ge: “Ndu, è suuy se ghel ghine ge, Ghɛne nɛy yɛ yióté kɛn yioten, keele wiy ghɛne nɛy yɛ kiy kɛn kiyen, yɛne wiy

²⁷Bek ge tetem ə ghel ghine bo sasen wiy əbnəə. Ghene fentemen əbtuule ə ghen è bvəte ɛshiɛ ə ghen. Ghene nɛɛy dì fɛ ɛshiɛ ə ghene yɛ yɛn əblik nɛ əbtuule ghene yio əbnəə nɛ tetem ə ghene sasen əbnəə, é ghene kase kiy mɛ wɛ Feyin, é mɛ chuk ghene.”

²⁸Bool se ləysene suuye ge: Ghɛn lu se yɛ ke ge sakghɛ wɛ kum ka Feyine boysen ghel lu nɛ ɛ́ tinsemen se əbtume nɛ ghene nɛy yio.

²⁹(Bool suuy əbnəə vin dì, ghele Juuse se lóò kfənte mbek se ghene ngeŋse.)

³⁰Bool chii fo se nguk sebaa ɛ ndaa yɛ əb nè laken, fiisen wel əbjim wɛ əb nè gwiyen se yɛne wen.

³¹Əb se lu fo fekte se ghele kum ɛysak ə Feyin gese dinte əbnəə kum Báàba Jesus Christ ɛ tɛtɛ nɛ wel jefse wiy wen.