Read Oku Ɛyf 3 Bible Online

Ɛyf 3 - Oku bible

Ɛyf 3

¹Naa se lu ɛ kechii kelee Bita ghene Joon se koke ɛ ndaa-ɛykokse ɛ keleŋe chuy setal, nɛ lu əbliy ɛyjem.

²Ghene ndu, è loo lii əbchio kengɛy wɛ ɛ́ nè toŋten ge əbjuŋe, è yɛn wel əblee fo nɛ ɛ́ nè bii nɛ əb ləmmen. Ɛ́ nè sɛɛ bɛɛye wen əbchii əbjim nduu lɛme əbchio kengɛy fo ge əb yɛ lon əbkaa se ghel ghɛ ɛ́ chia liin se ndaa-ɛykokse.

³Əb yɛn Bita ghene Joon ka ghene chia liin, è me se lone əbfua se ghene.

⁴Bita ghene Joon tuŋ ɛshiɛ ɛ wen əbghun, Bita me suuy se wen ge: Kíy ghɛs.

⁵Əb me tam ɛshiɛ ɛ ghene ɛyghun kwaate ge ghene fó kefaa se yi.

⁶Bita suuy se wen ge: Mɛ báà se ki əbkaa naa se nkan, dî nɛ mɛ fó kɛ mɛ kiin se wɛ̀. Mɛ suuy se wɛ̀ ɛ əbtaawe ɛyghel nə Jesus Christ wɛ̂ Nazalet ge: Loole è yɛ jɛl.

⁷Bita suuy dì, è me ghal əbkoy əbtaa nə wen è lose wen, ɛvəə ə wene ghene nchakse ɛyfine me taa kɛn se əbliy,

⁸əb chak, è teem è jɛl è lii ɛ ndaa-ɛykokse ghene ghene, jɛle, chaknene, foo ɛykokse se Feyine.

⁹Ghel ɛjime yɛn ka əb jɛ́len, foo ɛykokse se Feyine,

¹⁰è keele ge lu wel wɛ əb nè yese lonen ɛ əbchio kengɛy wɛ ɛ́ nè toŋten ge əbjuŋe, è me se lu nɛ̀ əbchíò əbyúméné kum kenəə kɛ ke ganen se wen.

¹¹Wel vi ko me koom ɛ Bita ghene Joon əbghun, ghel ɛjime se lu nɛ̀ əbchíò əbyúméné, nyiŋke nduu se baksene ghene ɛ kebaa ndaa kɛ ɛ́ nè toŋten ge kɛ́ Solomone.

¹²Bita yɛn ka ghene nyiŋe gwiyen di, è suŋnen se ghene ge: Ghele ghɛ Islaele, ghɛn ki əbchio əbyúméné ɛ kenəə ghan bek ghɛ? Ghɛne kiye lɛɛy ghɛs dî ka nɛɛy ghɛs nɛ̀ əbtaawe ə wɛse, kene nɛ̀ jii ɛyjuŋ yɛ ghɛse jumten kenəə ə Feyin ɛ ten ge wel vin yɛ jɛl?

¹³Lu Feyin ə Ablaham nɛ̀ Ayzek nɛ̀ Jakob. Feyin fɛ ɛbaa ə ghɛsene nè koksen, ka əb nè losen wel ɛyfɛl nə wen wɛ Jesus. Lu Jesus nɛ̂ vin wɛ ghɛn nè foon se ghɛ́ ɛysake ge ɛ́ yúy. Ghɛn nè lô maa wen ɛ Bailɛt ɛyshiɛ, chèmè lu ka Bailɛt nè kɛŋen se boyse wen.

¹⁴Jesus nè lu wel əbjuŋ, nɛɛye kenəə kɛ Feyine kɛŋen, dî ghɛn maa wen è sɛy suuy ge ɛ́ boyse wel wɛ əb nè yúyten ghel.

¹⁵Ghɛn nɛɛy dì, è me yuy wel wɛ əb fóon ɛychii. Feyine nɛy lose wen se ɛykuo. Ghɛs nè lô yɛn nɛ̀ ɛshiɛ ə ghɛse.

¹⁶Kè lu bek əbtaawe ɛyghel nə Jesus wɛ wel əbkɛblen vin wɛ ghɛn yɛnen gese ke lɛ bonen. Lu bek ɛytem yɛ ghɛs foon se Jesus yɛ ɛy nɛɛyen wel nɛ̂ vine loote bonen ɛyshiɛ nə ghɛn lɛ.

¹⁷Ghone-nyii, mɛ ke ge nè lu əbliy fo nɛ ghɛne ghel ghɛ ɛ́ saken ghɛn nɛɛye əbnəə, ke wiy kenəə kɛ ghɛne nɛɛyen.

¹⁸Kii nɛ̂ kine nè gan se lunse kenəə kɛ Feyine nè suuyen è chia əbghun nə ghɛ́ ntum nə wene ge: Vi wɛ Feyine nè Yiosen lu se naa se yɛne ngɛk.

¹⁹Ghɛn kubsen yì tetem ə tɛn è fiile se Bay é əb lɛyse mbee ə sɛn, è yɛ nɛɛy nɛ tetem ə tɛne zəəlèè.

²⁰Ghɛn nɛɛy dì é əbliye me kwɛn wɛ Feyine tinse mbose wen se ghele, é Bay tinse Vi wɛ Əb nè Yiosen, dii Jesus wɛ əb nè chokenmen se ghɛn.

²¹Əb lu se gok ɛ ɛyyio se chin se əbliy wɛ Feyine náà siyse əbjim əbjim əb sɛɛ əbfɛɛ ka əb nè kaken chia əbghun nə ghɛ́ ntum nə wene naa se nguk.

²²Moses se wene ngeŋ nè suuy ge: “Bay Feyine náà nɛɛy é wel əblee ɛ ghɛne məm yɛ lu wele ntum nə yi ka mɛ lɛ, nɛ ghɛn lu se naa se yɛ yionen se wen se əbnəə əbjim wɛ əb suuyen.

²³Naa ndɛ wɛ əb jia yionen se nɛɛy əbnəə wɛ wele ntum nɛ̂ vi suuyen lu nɛ Feyine yî fəyse wen se ghel ə wene məm.”

²⁴Se əbluuy se əbluuy, ghele ntum nə Feyine ɛjim fektemen əbnəə vin əbjim wɛ əb ganen lan se kɛ̀ɛ̀tè əbliy nə Samuel se chin se əbliy nə nfektese sɛ se nè fekten se ɛybam.

²⁵Əbnəə əbjim wɛ Feyine nè kaken ghel so chia əbghun nə ghɛ́ ntum nə wene lu wɛne. Ghɛn se lu sɛy ɛ məme kelek kɛ Feyine nè leken ghene ghe ɛbaa ghɛne. Ghɛn kuume kenəə kɛ Feyine nè suuyen se Ablaham ge: Mɛ náà bose ghel ɛjim ɛ ketuu ntiɛ chia əbghun nə ghon ə ghiɛ.

²⁶Feyine naa chok wel ɛyfɛl nə wen è kɛɛte tum nɛ lu se ghɛn ge əb bose ghɛn, se nɛɛy ge ghɛn ghel ɛjim fiile se ɛybame jii sebee.