Read Oku Ɛyf 5 Bible Online

Ɛyf 5 - Oku bible

Ɛyf 5

¹Wel əblee se lu nɛ ɛ́ toŋte ge Ananias, toŋte wiy ə wen ge Safila. Əb feene sɛy ɛylem ə wen,

²ghene wiy ə wen suŋnen, əb lete əbkaa əblee, è gwiy kɛn nɛ̀ kembɛke əbkaa è fo se ghɛ́ ntum nə Jesuse.

³Bita me bif se wen ge: Ananias, lu bek ghɛ wɛ wɛ̀ beemen Satane lii se wɛ ɛytem wɛ̀ lete əbkaa ɛylem əblee, è gwiy è se yia əbbuam se Keyioy Kelanene?

⁴Nè lu nɛ wɛ̀ bɛɛy ghàà feene ɛyleme ten nɛ lu yiɛ. Wɛ̀ feene, əbkaa tene ko se lu viɛ. Nɛɛy ghɛ ge wɛ̀ mom ɛynkii kenəə ghan? Wɛ̀ di báà yia əbbuam se wel, wɛ̀ yia nɛ lu se Feyine!

⁵Ananias yio dî ɛ leghɛ, è fɛy se ntiɛ è kuo. Ghel ghɛ ɛ́ nè yion kenəə kin me se fane naa se ŋaŋ.

⁶Ghondɛɛ nsume lii è gwiy, è limte ɛygvən ə wen nɛ̀ ndəyse è bɛɛy, è fəy so è ndu è gvəəme.

⁷Keleŋ əbliye loo chia ka chuy setal dì, wiy ə Ananias lii è gwiy, nɛ əb bɛɛy ghàà keele kenəə kɛ ke ganen se lum ə wen.

⁸Bita bif se wen ge: Suuy əbluuy se mɛ, lɛ ghan mɛy mɛy əbkaa wɛ ghɛne lum ə viɛ kè feenen ɛylem ə yɛn so-a? Əb bééme ge lu əbghene əbjim.

⁹Bita me suuy se wen ge: Lu bek ghɛ wɛ ghɛne lum ə viɛ siysen se momse Keyioy ə Bay? Yɛn-a, yio ka nchinse ə ghel ghɛ ɛ́ gvəəmen lum ə viɛ kumen ɛ əbchio ndaa. Ghene bɛɛy wɛ̀ ɛ leenen è ndu è gvəəme sɛ̂y.

¹⁰Bita suŋnen dì ɛ leghɛ Safila fɛy ɛ wen ɛyshiɛ è kuo. Ghondɛɛ nsum ghii lii è gwiy è yɛn nɛ əb kuomen, è bɛɛy è fəy so è ndu è gvəəme ɛ lum wen ə ɛybee.

¹¹Kenone ghel ɛbeemene gese nɛ̀ ghel ɛlee ghɛ ɛ́ nè yion əbnəə vin se fane naa se ŋaŋ.

¹²Ghɛ́ ntum nə Jesus se nɛɛye əbnəə əbchio əbyúméné gese nɛ̀ əbnəə əbkanene ɛ ghele məm. Ghel ɛbeemene nè lóó ɛ́ konen ɛ kebaa ndaa kɛ ɛ́ nè toŋte ge kɛ́ Solomone ɛ ndaa-ɛykokse.

¹³Ghel ɛlee se kiye, fane se chintene kenone ghen, dî nɛ wel əbjim foo ɛyvəm se ghene naa se ŋaŋ.

¹⁴Ɛluumene ghene əbkiye fó ɛytem se Báàba se ɛydio è me chìntèn kenone ghel ɛbeemene.

¹⁵Ghele me se gwiye nɛ̀ ghel ɛyafkene nə ghene nyiŋse ɛ əmkun nɛ̀ se əmghame ɛ teghaŋe jii, ka Bita nɛ̂y loo chia é kenjimnjim ə wene guo ɛ ghene ɛyghun.

¹⁶Əbnone ghele se lóò sɛ̂y ɛ ntɛk sɛ se baksen se Jolesalem gwiye nɛ̀ ghel ɛyafkene nə ghene gese nɛ̀ ghel ghɛ ɛyfime jefsen ghene, nɛ ghɛ́ ntum nə Jesus chuke ghene naa ɛjim.

¹⁷Ketuu se ghɛ́ ntaŋlee ghene ghele ngoo nə wene naa ɛjim nɛ lu ghele kenone Saddusee me se ghɛke ghɛ ntum nə Jesuse naa se ŋaŋ.

¹⁸Ghene me suuy ɛ́ koo ghɛ ntum nə Jesus è kum se ndaa nchak.

¹⁹Nɛy se lu nɛ̀ ntəke nchiy-ndaa-Feyine gwiy è dise əbchio ndaa nchak è fəyse ghene è suuy ge:

²⁰Ghɛn ndu ɛ ndaa-ɛykokse è yɛ fekte əbnəə əbjim kum ɛychii ɛyfɛɛ yine se ghele.

²¹Ghene yio dî, è bvəs è ndu se ndaa-ɛykokse è se dinte əbnəə se ghele. Ketuu se ghɛ́ ntaŋlee ghene ghele ngoo nə wene loo kɛ ghene, è jaŋte chɛɛ sɛ Islaele ghene ghene ghal ɛydiom ɛ ndaa nsak, è tum ghele nchiy ɛlee se ndaa nchak ge ɛ́ ndu è gwiy nɛ̀ ghɛ ntum nə Jesuse ghii se ghene.

²²Ghene ndu è jia yɛn ghene ɛ ndaa nchak è kase fiile è suuy ge:

²³Ghɛs ndu è chin fo, è yɛn əbchio ndaa nɛ əb loote lu əbkumen, nɛ ghele nchiye tiy fo, ghɛse dise è jia yɛn wel ɛ məm.

²⁴Ghele mbiy se ghɛ́ ntaŋlee ghene wele mbiy se ghel ghɛ ɛ́ chiyen ndaa-ɛykokse yio dî è se kante ge sɛ gan ghɛ-a?

²⁵Wel əblee me gwiy è suuy se ghene ge: Ghel ghɛ ghɛn ne kumen se ndaa nchak tiy ɛ ndaa-ɛykokse dinte se ghele.

²⁶Ketuu se ghel ghɛ ɛ́ chiyen ndaa-ɛykokse kii ghene ghel ɛyfɛl nə wene me ndu è liɛ ghɛ ntum ghii è gwiy so. Ghene nè báà kante ghene kanten bek ge ghene nè fanen ge lòó ghele təmle ghene nɛ̀ ɛtiye.

²⁷Ghene gwiy nɛ̀ ghɛ ntum nə Jesus ghii di, è liɛ è ndu nɛ̀ ghene se ndaa nsak. Ketuu se ghɛ́ ntaŋlee sɛ́ ndaa-ɛykokse bif se ghene ge:

²⁸Ghɛs lɛ nè báà chiise se ghɛn ge ke fɛ ghɛn bo yíɛ́ke ghel nɛ̀ kenəə kɛ kum Jesus-a? Se lu nɛ ghɛne nɛɛymen ghel ɛjim ɛ Jolesaleme yio ɛyyiɛke ə yɛn, ghɛn se kɛŋe se toye ghɛs kum ɛykuo ə wen.

²⁹Bita ghene ghɛ́ ntume naa ɛjim fise ge: Ghɛs lu se yɛ yionen se Feyine, nɛ wiy se wel.

³⁰Feyin fɛ ɛbaa ə ghɛsene nè koksen nè lose Jesus se ɛykuo, lu Jesus nɛ̂ vin wɛ ghɛn nè banten se kentam.

³¹Feyine nè lose wen dì è lɛm se wen ɛybee əbkoy əbtaa ge wel wɛ əb saken gese boysee, ka ə́b din jii se ghele Islael é ghene kubsen tetem ə ghen é əb lɛyse mbeese ghen.

³²Ghɛse me se suuy əbnəə nɛ̂ vin ka ghel ghɛ ɛ́ nè yɛnen, nɛ suuy ghɛse ghe Keyioy Kelanene kɛ Feyine foon se ghel ghɛ ɛ́ yionen se wen.

³³Ghɛ́ ndaa nsake yio kii nɛ̂ kine, ke yaf ghene se ŋaŋ, ghene me se kɛŋe se yuytê ntumse Jesus.

³⁴Dî Gamaliel wɛ wele ndaa nsak əblee loole è teem è suuy ɛ́ liɛ ghel ghi è fəy so se bɛy se feleeŋese əbliy. Əb nè lu wele kenone Falisee, lu ndinte tesak nə Moses nɛ ghele gese vəme wen.

³⁵Əb me suuy se ghɛ́ ndaa nsak ghii ge: Ghele Islaele, ghɛn kwaate kejuŋ kum kenəə kɛ ghɛne kɛŋen se nɛɛy se ghel ghine.

³⁶Ghɛn kume ge nè lu ɛ keleŋ əbliy kelee wel əblee nɛ ɛ́ toŋte ge Teudas ŋaake è se suuy ge yi lu wel əbghaken əblee, ghele chinten wen ka ɛyviɛ ɛykɛɛk dì. Ɛ́ naa yuy wen, ghele ngoo nə wen ɛjim takle, kenəə ə wene buu.

³⁷Se ɛybame ten Judas wɛ̂ Galilee ŋaake ɛ əbliye kentaŋ è liɛte ghel se wen əbghun se ɛydio. Ɛ́ naa yuy wen, ghele ngoo nə wen ɛjim takle.

³⁸Mɛ me se tefte ghɛn ge ghɛn fəyse ɛghoo ə ghɛn se ghel ghine kenəə è vəse ghene, bek ge lòò yɛ lu ge əbnəə wɛ ghene nɛɛyen lu ɛykwaate wel, əb nɛ̂y liime è lɛy.

³⁹Dî nɛ lòò è yɛ lu ge əb lòò se Feyine, fene lòó ghɛn jia ghak ghene, é ghɛn sɛ́y nɛ̂y yɛn nɛ ghɛn noo Feyin.

⁴⁰Ghɛ ɛ́ saken yio ntef ə Gamaliel è beeme, è me jaŋ ghɛ ntum nə Jesus ghi è suuy ɛ́ tɛl ghene, è gese chiise se ghene ge: Ke fɛ ghɛn bó yî yiɛke ghel kum ɛyghel ə Jesus. Ghene suuy di è me jum ghene.

⁴¹Ghene fəy se ndaa nsak è se nduu saŋle bek ge Feyine lu nɛ fe liɛ ge ghene lu kekwɛnten se kiile kenchoksen bek Jesus.

⁴²Ghene ndu dì è se dinte əbnəə se ghele ɛ ndaa-ɛykokse gese nɛ̀ se ndaase əbchii əbjim, fekte ge Jesus lu Vi wɛ Feyine nè Yiosen.