Read Oku Ɛyf 6 Bible Online

Ɛyf 6 - Oku bible

Ɛyf 6

¹Ko se lu ɛ keleŋ əbliy fo kenone ghel ɛbeemene se kuye nduu kɛn ɛ mbiy. Ghel ghɛ ɛ́ nè suŋnen əblame Gleek se vəke ghɛ ɛ́ nè suŋnen əblame Heblu ge ɛ́ giate əbfua-əbyíɛ́ne əbchii əbjim boo əbkiye nkfə nə ghene.

²Ghɛ ntum nə Jesuse me jaŋ ghel ɛbeemene ɛjim è suuy se ghene ge: Ke báà se lu ɛ titiy ge ghɛs vəse se yɛ fekte kenəə ə Feyin è sɛ́y yɛ toknen nɛ̀ kenəə əbfua-əbyíɛ́ne.

³Ghone-nyii, ghɛn chokte ghel ɛ ghene məm saamba é ghene yɛ toknen nɛ̀ kenəə nɛ̂ kine. Ghɛne loo chokte ghɛn chokte nɛ lu ghel ɛjuŋe ghɛ ɛ́ kiin ɛytof, nɛ Keyioy Kelanene lu ɛ ghene tetem, é ghɛs fó ɛyfɛl yin se ghene,

⁴è fo ngeŋ sɛs se ɛyjem gese nɛ̀ ɛyfekte kenəə ə Feyine.

⁵Ntaŋ yin se lu ɛyjuŋ se kenon kejime, ghene me chok Stefen nɛ lu wel nɛ əb nè lô loote fo ɛytem se Feyine, Keyioy Kelanene lun se wen ɛytem, è chok Filib nɛ̀ Blokolus, nɛ̀ Nikano, nɛ̀ Timon, nɛ̀ Balmenas, gese nɛ̀ Nikolaus, nɛ lu wele Antiok, nɛ əb nè benlemen se wele Juus.

⁶Ɛ́ gwiy nɛ̀ ghel ghine se ghɛ ntum nə Jesuse, ghene lɛm ɛghoo se ghene əbtuu è jem se ghene.

⁷Kenəə ə Feyine me se saankene nduu ɛ mbiy. Kenon ə ghel ɛbeemene se kuye ɛ Jolesalem naa se ŋaŋ, nɛ ndione ghele ntaŋlee, foo tetem ə ghen se Jesus Christ.

⁸Stefen nè lu wel nɛ Feyine bose wen naa se ŋaŋ è fo əbtaawe, əb se nɛɛye əbnəə əbchio əbyúméné gese nɛ̀ əbnəə wɛ əb dinen əbchəyte əbchio əbyúméné ɛ ghele məm.

⁹Ghel ɛlee me gwiy, è kɛɛte mbek ghene ghe Stefen, nɛ lu ghele ngay ɛyjem yɛ ɛ́ nè toŋten ge yɛ ghel ɛboyene. Ghel ghine nè lu ghele Juus nɛ ɛ́ lóó ɛ Silen, nɛ̀ se Alesandlia, nɛ̀ se Silisia, gese nɛ̀ se Asia.

¹⁰Keyioy Kelanene nɛɛy Stefen se suuy əbnəə nɛ̀ ɛytofe nɛ ghene wiy kekwɛnten se fise.

¹¹Ghene me yunte ghel ge ɛ́ yia ge: Ghɛs nè yio nɛ əb yia əbbuam kum Moses ghene Feyine.

¹²Kii nɛ̂ kine shikse tetem ə ghel, è shikse tɛ chɛɛsee gese nɛ̀ tɛ Ndintese tesak ə Moses. Ɛ́ koo Stefen è ndu nɛ̀ wen se ndaa nsak.

¹³Ghene gwiy nɛ̀ ghel əbbuame ɛlee ɛ́ se toye əbnəə ɛ Stefen əbghun, suuy ge: Wel vin nè báà yi gok se yɛ yia əbbuam kum ndaa-ɛykokse yin gese nɛ̀ tesak ə Mosese.

¹⁴Ghɛs nè yio nɛ əb suuy ge Jesus wɛ̂ Nazalete náà kɛs ndaa-ɛykokse yin è gese kubsen nchiine yɛ Moses nè foon se ghɛsen.

¹⁵Ghel ɛjim ghɛ ɛ́ nè luun ɛ ndaa nsak fo tuŋ ɛshiɛ ɛ Stefen əbghun è lòò yɛn nɛ ɛykek ə wene se keke ka yɛ nchiy-ndaa-Feyine.