Read Oku Ɛyf 8 Bible Online

Ɛyf 8 - Oku bible

Ɛyf 8

¹Ɛ́ nè nyable nɛ̀ Stefen dî nɛ Sool tiy fo tokte ge ɛ́ yúy. Se kɛ̀ɛ̀tè se kechii fo, ɛ́ me se nəkse ghel ɛbeemene ghɛ́ Jolesalem ɛ jii ɛybee, ghene saanken Judea əbjim ghene Samalia, buu kɛn ghɛ ntum nə Jesus ghɛ ɛ́ nè goken.

²Ghel ɛlee ghɛ ɛ́ nè vəmen Feyin gvəəme Stefen è se toŋe ɛykuo wen naa se ŋaŋ.

³Sool me se mome kɛ́ wene ge yi mɛyse kenchintene ghel ɛbeemene mɛysen. Əb nè jɛle ndaa nɛ̀ ndaa gufe əbkiy ghene ɛluumene nduu vii se nchak.

⁴Ghel ɛbeemene ghɛ ɛ́ nè saanken ghi me se fekte kenəə ə Feyin naa ghááy ghaa ghene nè nduun.

⁵Filib chio ndu ɛ ntɛke Samalia è se fekte sakghɛ kum Vi wɛ Feyine nè Yiosen.

⁶Ghele se yio se ɛydio gese yɛne əbnəə əbchio əbyúméné wɛ Filib nɛɛyen è me chìntèn è se ki shi se yɛ yiote kenəə kɛ əb nè fekten.

⁷Tefime nè toŋnene, fəyke se ghele tetem nɛ ghel ɛkɛblene nɛ̀ ɛləmmene bonene naa se ɛydio.

⁸Ghele ghɛ́ Samalia me se saŋle naa se ŋaŋ.

⁹Wel əblee nè lu ɛ ntɛk fo nɛ ɛyghel ə wene lu ge Simon, nɛ əb nè se fiɛŋe ɛyfuu naa se nguk nɛ əbchio yume ghele ghɛ Samalia ɛjim bek wen. Əb nè ghaŋse əbghun ge yi lu wel əbghaken əblee.

¹⁰Wel əbjim kene ngɛse wel kene wándɛ me se yio kɛn se wen suuye ge: Wel vin lu kediak ə Feyin ki kɛ ɛ́ toŋten ge: Kediak Ketaa.

¹¹Ghene nè yio kɛn se wen dì bek ka əb nè fiɛŋen guose wen nɛ̂ shi nɛ kenəə tene yume əbchio wel əbjim yumen.

¹²Filib nè gwiy è se fekte sakghɛ əbjuŋ kum ɛysake Feyin nɛ̀ ɛyghele Jesus Christe; ghele bééme ɛ́ fó moo se ghene ghel ɛjim, əbkiy nɛ̀ ɛluumene.

¹³Simon se wen ə ngeŋ bééme sɛy, ɛ́ fó moo se wen, əb me se jɛle kɛn ghene Filib, è se lu nɛ̀ əbchíò əbyúméné kum əbnəə əbkanene nɛ̀ wɛ́ əbchio əbyúméné wɛ Filib nè nɛɛyen.

¹⁴Ghɛ ntum nə Jesuse nɛy yio ɛ Jolesalem ge ghele ghɛ́ Samalia beememen kenəə ə Feyin, è me tum Bita ghene Joon se ghene.

¹⁵Bita ghene Joon ndu è chin gho ɛ leghɛ è me jem se ghene ge ghene kiile Keyioy Kelanene,

¹⁶bek ge Keyioy Kelanene nè bɛɛy ghàà gwiy se ghene. Ɛ́ fo kɛn nɛ lu moo se ghene ɛyghel nə Báàba Jesus.

¹⁷Bita ghene Joon me lɛm ɛghoo ɛ ghene əbtuu, ghene kiile Keyioy Kelanene.

¹⁸Simon yɛn ka ghɛ́ ntum nə Jesuse lɛmen ɛghoo ɛ ghele əbtuu, nɛ ghene kiile Keyioy Kelanene, è me se foo əbkaa se ghene,

¹⁹suuye ge: Ghɛn fó əbtaawe vin se mɛ sɛ̂y ka mɛ yɛ lɛm ɛghoo ɛ naa ndɛ ketuu, əb kiile Keyioy Kelanene.

²⁰Ka əb suuyen di, Bita fise ge: Ghɛne əbkaa viɛ nɛ̂ vi ndu əbvəs. Lòò lɛɛy é wɛ̀ yɛ kwaate ge lòó wɛ̀ yun fomɛ ə Feyin nɛ̀ əbkaa?

²¹Wɛ̀ báà se ki keleŋ, ki wiy kenəə se nɛɛy ɛ ghɛse məm ɛyfɛl bek ge ɛytem ə yiɛ wiy ɛ titiy ɛ ɛyshiɛ nə Feyine.

²²Kubsen ɛytem ɛybee yɛ wɛ̀ kiin yì, è jem se Bay ge əb sɛ lɛyse fo se wɛ̀ se ɛykwaate ɛybee nɛ̂ yin yɛ wɛ̀ kè kiin ɛ wɛ̀ ɛytem-a?

²³Mɛ yɛne ge kenghɛke lunmen se wɛ̀ ɛytem, wɛ̀ me se lu kekos ə mbee.

²⁴Simon me suuy se Bita ghene Joon ge: Kiy ghɛn, ghɛn yɛ jem se Bay fɛ kenəə se əbnəə wɛ̀ ghɛn suuyen vin gan se mɛ.

²⁵Nɛy se lu ka Bita ghene Joon mɛysen è fekte əbnəə wɛ kum Báàba Jesus, ghene me kase fiile se Jolesalem, è se fekte nduu nɛ̀ sakghɛ əbjuŋ ɛ ntɛke sɛ́ Samalia se ɛydio.

²⁶Nchiy-ndaa-Feyin suŋnen se Filib ge: Loole è chio è ndu ɛ jii yɛ ɛy lòòn ɛ Jolesalem è se chio se Gaza, jii nɛ̂ yin lu jii yɛ ɛy nduun ɛ əbkwak.

²⁷Əb me loole è se nduu, è baksen wele Etiobia əblee nɛ əb kfəəye. Əb nè lu wele Fekɛɛy fetaa, nchiy-ndaa toknen nɛ̀ ɛychia no ə ntoke Kandase wɛ̂ ɛylak fo. Wel vin nè lòò ɛ Jolesalem ka əb nè nduun se kokse Feyin,

²⁸əb nè kfəəye nɛ əb diom ɛ wen ə ɛykal nɛ gufe nyamse, è se jaŋe kelike ŋwaale kɛ ɛynyaken wele ntum nə Feyine wɛ Ezaya.

²⁹Keyioy Kelanene suuy se Filib ge: Kokte, è ndu è baksen se ɛykal fɛɛy.

³⁰Filib me nyiŋte è ndu è baksen wen è yio nɛ əb jaŋe kenəə ɛ ŋwaale nə Ezaya wɛ wele ntum nə Feyine, è bif se wen ge: Wɛ̀ lɛ jaŋe dì yio kenəə kɛ wɛ̀ jaŋen-a?

³¹Əb fise ge: Lòó mɛ yio lɛɛy nɛ wele báà dinte se mɛ? Əb suuy di, è suuy ge Filib kok, è diom ghene yi.

³²Kenəə kɛ wel nɛ̂ vi nè jaŋen ɛ ŋwaale fo lu ge: “Əb nè lu ka bvəy njiɛ yɛ ɛ́ liɛn ge ɛ́ ndu so è sɛɛ. Gese lu ka wán bvəy njiɛ wɛ əb tiyen ɛ chichi ɛyshiɛ nə wel wɛ əb komen ɛyghuye wen. Əb dì nè báà ŋak giɛ.

³³Ɛ́ nè kiy wen nchɛk, è jia chèmè ben sak ə wen wele jia yî suŋnen kum ghon ə wen bek ka ɛ́ nè tenenmen ɛychii ə wen ɛ ketuu ntiɛ.”

³⁴Nchiy-ndaa yi me bif se Filib ge: Wele ntum nə Feyine nè suuye kenəə kin kum ndɛ? Əb suuy kum ngeŋ ə wen moo kum wel əb chin-a?

³⁵Filib me kɛɛte nɛ̀ kelike ŋwaale kɛ tenen se fekte sakghɛ əbjuŋ wɛ kum Jesus se wen.

³⁶Ghene wen se nduu ɛ jii, è gwiy è chin əbghune jio, wel əbghaken vi suuy ge: Yɛn-a? Jio yine. Lòó jefse ghɛ fɛ ɛ́ fó moo se mɛ?

³⁷(Filib me suuy ge: Lòó mɛ fó moo se wɛ̀ ɛ lefɛ wɛ̀ foon ɛytem ə yiɛ ɛyjim se Jesus. Wel vi me suuy ge: Mɛ lu nɛ mɛ bééme ge Jesus lu wán ə Feyin.)

³⁸Əb suuy dì è me suuy ge ɛ́ tiyse ɛykal. Ghene Filib səəke è chia, è lii se jio Filib fó moo se wen.

³⁹Ghene fəy se jio, Keyioy ə Bay liɛ Filib è lòò so. Wel vi jia gese yɛn wen, dî è se nduu jii ə wen saŋlee.

⁴⁰Filib loo chin nɛ əb shi ɛ ntɛke Azotus, è me se jɛle, fekte sakghɛ əbjuŋ ntɛk sejim se chin se ka əb nè chinen ɛ Saesalea.