Read Oku Lûm 1 Bible Online

Lûm 1 - Oku bible

Lûm 1

¹Ŋwaale yin lòò se mɛ Bool. Mɛ lu wel əbfɛlen se Jesus Christ. Feyine nè chok mɛ ge wele ntum è lɛm ge mɛ yɛ fekte sakghɛ əbjuŋ nə wen.

²Feyine nè yimen kak ghɛsen nɛ̀ sakghɛ nɛ̂ vin ɛ kesuŋnen nə ntumse wene, ka ɛ́ nyaken ɛ ŋwaale ɛylanen.

³Sakghɛ nɛ̂ vin lu kum wán ə wene Báàba wɛsen Jesus Christ. Ɛ́ nè bii wen ka wel ɛykfəə nə David.

⁴Feyine din ge əb lu Wan vi ka əb nè losen wen se ɛykuo ɛ kediak nɛ̀ Keyioy Kelanene.

⁵Jesus nè lô giamten è nɛɛy Feyine cham ɛysen ə yom, è tum mɛ se əbtume nɛ̀ sakghɛ əbjuŋ ka ghene fó ɛytem è yɛ yionen se Feyine é ɛyghel ə Jesus Christ yɛ ki ɛyvəm.

⁶Ghɛn lu sɛ̂y ghel əbtum ɛlee ghɛ Feyine liɛnmen ge ghɛn yɛ lu ghel ə Jesus Christ.

⁷Mɛ nyake ŋwaale yin se ghɛn ghɛ ɛ́ luun ɛ Lûm. Feyine koŋe ghɛn, əb lu nɛ əb liɛnmen ghɛn ge ɛ́ yɛ lu ghel ɛlanene. Bay Feyin ghene Báàba ə wɛsen Jesus Christ kô cham ɛysene yɛn è gese nɛɛy é ghɛn yɛ lu nɛ̀ əmnyiaŋe.

⁸Mɛ chia mbiy bɛ̀ɛ̀lè Feyin kum ghɛn chia əbghun nə Jesus Christ bek ge ɛytem yɛ ghɛn foon se Jesus Christ lu nɛ ɛ́ keelemen mbi yin ɛyjim.

⁹Mɛ jeme se ghɛn əbliy əbjim, yale wiy, nɛ Feyin Fɛ mɛ fɛlen se wen nɛ̀ ɛytem ə yome, fekte sakghɛ əbjuŋ kum wán ə wen ke.

¹⁰Mɛ loo jem mɛ yɛ lon ge Feyine kô fo nsan é mɛ gwiy è ghan ghɛn ɛ leenen.

¹¹Mɛ lu ɛ shii se gwiy se yɛne ghɛn ka mɛ nɛɛy é ghɛn kiile mbose yɛ ɛy lòòn se Keyioy ə Feyine yɛ ɛy nɛɛy é ghɛn yɛ tiy ketaan.

¹²Mɛ nɛ̂y nɛɛy ɛ jii yɛ ge mɛ gwiy è lóó lùmse tetem ə tɛn ɛ kenəə ə Feyin, nɛ ghɛn lumsè sɛy yome, é ghɛsen me chinten è yɛ kuy.

¹³Ghone-nyii, mɛ kɛŋe ge ghɛn keele ge mɛ lu nɛ mɛ mommen ɛ kaŋ ɛ kaŋ se gwiy se yɛne ghɛn, kenəə ko jefse. Shii wɛ mɛ luŋen se gwiy se ghɛn lu se nɛɛy ge ghele ɛlee ɛ ghɛne məm beeme Feyin, ghɛɛ-ghɛɛ ka mɛ nè nɛɛyenmen ɛlee beeme Feyin ɛ məm nɛ̀ əbtum əblee.

¹⁴Mɛ tiy se fekte kenəə ə Feyin se ghel ɛjime, se ghel ghɛ əbtuu ghene banenmen, gese nɛ̀ se ghɛ əbtuu ghene bɛɛy ghaa ban, se ghel ghɛ ɛ́ keen əbnəə gese nɛ̀ se ghel ghɛ ɛ́ kwaaten ge ɛ́ báà se ke əbnəə.

¹⁵Ghɛy kenəə kɛ ke nɛɛyen mɛ se lu ɛ shii se fekte kenəə ə Feyin sɛ̂y se ghɛn ghɛ ɛ́ luun ɛ Lûm.

¹⁶Mɛ báà se ghuumene se yɛ fekte sakghɛ əbjuŋ nɛ̂ vin bek ka luun kediake Feyin kɛ ke boysen wel əbjim wɛ əb foon ɛytem se ten, kɛ́ mbiye se ghele Juus è me kumte nɛ̀ əbtume.

¹⁷Ke lu dî bek ka sakghɛ əbjuŋe dinen jii yɛ lòó Feyine nɛɛy é wel yɛ lu ɛ titiy, lu ɛ titiy dì bek kɛn ɛytem yɛ əb foon se Feyine, nɛ jii ɛylee bo bɛɛy wiy naa se nkan, kɛn ka ɛ́ nyaken ɛ ŋwaale-Feyin ge: “Wel wɛ Feyine nɛɛyen əb se lu ɛ titiye náà chii bek ɛytem yɛ əb foon se Feyine.”

¹⁸Feyine yafse ɛytem se ghel ghɛ ghene jasen se wen, nɛɛy mbee ɛ ntiɛ fɛn. Feyine dinmen ge yi mak ngɛk se ghene ghɛ ɛ́ nɛɛyen mbee me chite əbluuy fɛ əb yɛ yɛnsen.

¹⁹Feyine foo ngɛk se ghene bek ge kenəə kɛ ghele luun se yɛ ke kum Feyin yɛnsene nɛ Feyine dinmen kelaanen se ghene.

²⁰Ke lu dî bek ka se nguk ka Feyine nè yî bom mbi lu nɛ wel əbjim nè lômen se yɛne ɛ əbfua wɛ əb nè bomen, əbnəə wɛ kum wen wɛ ɛ́ yɛ́nen wiy nɛ̀ ɛyshiɛ, dìì əbtaawe wen wɛ ɛymɛye wiy gese nɛ̀ ɛylu ə wene ka Feyin, nɛ lòó wel jia bo yɛ lu se suuy ge yi nè báà se ke.

²¹Ghene se ke Feyin, dî è jia se foo ɛykokse yɛ ghene luun se yɛ fô se wen, è gese jia se bɛ́ɛ̀lè wen, è sɛ̂y se kwaate nɛ lu əbnəə əbyume, teteme kengoo nə ghene me se lu ɛ fiine.

²²Ghene se dine ge ghene tofe, è me lòò è sɛɛ se əbngoo;

²³ghene buu se yɛ kokse Feyin fɛ fe chiin nɛ ɛymɛye wiy, è sɛ̂y se kokse nɛ lu əbbambo wɛ ə́b fuosen wele-mesoŋ wɛ əb kuon, kene wɛ ə́b fuosen əmnən, kene nyamse gese nɛ̀ əbfua əbŋaaŋen əblee ka əbnsakenyam.

²⁴Feyine mɛ vəse ghene ge ghene yɛ nɛɛy yì əbnəə əbbee wɛ əbghune yusen ghene se yɛ nɛɛy. Ghene me se fole ɛyghun, choksen chia nɛ̀ ngeŋse ghene.

²⁵Ghene me buu se beeme əbluuy wɛ kum Feyin, è beeme nɛ lu əbnəə əbbuam, è me se kokse nɛ lu əbfua wɛ Feyine nè bomen, kokse wiy nɛ lu Mbom. Lu wen wɛ ɛ́ luun se yɛ kokse əbliy əbjim. Amen.

²⁶Di ghɛy kenəə kɛ ke nè nɛɛyen Feyine vəse ghene ɛ əbnəə kenchoksen wɛ əbghune yusen nɛ ɛ́ nɛɛye. Əbkiye buu se yɛ nyiim ghene ghe ɛluumene ɛ jii yɛ ke luun se yɛ lu è sɛ̂y se nyiim nɛ lu nɛ̀ əbkiy ɛlee.

²⁷Ɛluumene buu se yɛ nyiim nɛ̀ əbkiye ka ke luun se yɛ lu, teteme ghene se fuo nɛ ɛyghune yuse ge ghene yɛ nyiim nɛ̀ ɛluumen ɛlee, ɛluumene se nɛɛy əbnəə kenghuumen ghene ɛlee, me kiile əbmakte wɛ ghene luun se kiile bek mbee ə ghen.

²⁸Se lu bek ka ghele nè tɛnen se keele Feyin, Feyine me vəse ghene ɛ ɛykwaate kengoo, ghene me se momlee əbnəə wɛ wel wiyen se yɛ nɛɛy.

²⁹Ghene momle tenkii əbnəə əbbee əbjim, ghene nɛɛy mbee, ŋwɛye keŋwɛy gese ghɛke kenghɛk. Ghene lu nɛ ɛ́ lun nɛ̀ ke mbàŋ ɛshiɛ, yuyte ghel, noo əbnoo, lɛɛse ghel, ki tekwaate tebee kom ghel, gese make koghoŋ.

³⁰Ghene bese teghele ghel, bane Feyin, ŋake keŋak, yio əbghun, ghaŋse əbghun, fume mbeese, yionen wiy se ɛbaa ghene nɛ̀ ɛnoo ghene.

³¹Ghene jiŋtee, lunse wiy tekak, ki wiy shii se ghele, koosen wiy ɛysen.

³²Ghene ke ge ɛysak ə Feyine dine ge ghel ghɛ ɛ́ nɛɛyen əbnəə nɛ̂ vin lu se kuo, è jia cheme se nɛɛy yi kɛn nɛɛyen, dî è se bente ghel ghɛ ɛ́ nɛɛyen sɛ̂y əbghene.