Read Oku Lûm 10 Bible Online

Lûm 10 - Oku bible

Lûm 10

¹Ghone-nyii, kenəə kɛ mɛ kɛŋen nɛ̀ ɛytem ə yome ɛyjime gese jeme se Feyine kum ghele Islael lu ge Feyine kô boyse ghene.

²Kenəə kɛ lòó mɛ suuy kum ghene lu ge ghene ki shii se yɛ kokse Feyin, dî ke wiy jii yɛ̂ titiy se yɛ kokse wen.

³Ghene báà se ke ge Feyine sɛ nɛɛy ge ghele yɛ lu ɛ titiy ɛ jii ɛykɛ-a, è loo luŋ ge ɛ́ siyse yɛ̂ ghen yɛ jii, è me buu se yɛ lu ɛ titiy ɛ jii yɛ Feyine kɛŋen.

⁴Ke lu dî bek ka Christ nè nɛɛyenmen kediak ɛysake buu ka wel əbjim wɛ əb foon ɛytem se wene me yɛ lu ɛ titiy ghene Feyine.

⁵Moses nè lômen din ge naa ndɛ wɛ əb lɛmen nchil se yɛ lu ɛ titiy ghene Feyine lu se yɛ loote lɛme tesak tejim se geese yɛ chii.

⁶Dî nɛ jii yɛ wel yɛ̂ lu ɛ titiy ghene Feyine bek ka əb foon ɛytem se wen lu ge: Ghàà yɛ suuy ɛ wɛ̀ ɛytem ge sɛ́ kok ndɛ se ɛyyio-a? (Dii ge ɛ́ sɛ́ kok ndɛ è səəke nɛ̀ Christ-a?)

⁷Kene ge, ɛ́ səəke ndɛ se ɛylake nkfəsayse-a? (Dii ge, ɛ́ sɛ lose ndɛ Christ se ɛykuo-a?)

⁸Kenəə kɛ ŋwaale-Feyine suuyen lu ge: “Kenəə ə Feyine baksene se ghɛn, ke lu ɛ ghɛne guose əbchio, lu ɛ ghɛne tetem. (Di lɛɛ kenəə kɛ kum ɛytem yɛ fó se Feyine kɛ ghɛse fekten nɛ̂ kin.)

⁹Ke lu dî bek ge wɛ̀ suuy nɛ̀ əbchio viɛ ge Jesus lu Báàba, è gese beeme nɛ̀ ɛytem ə yiɛ ge Feyine nè lose wen se ɛykuo, é wɛ̀ me boy.

¹⁰Wel dì bééme nɛ̀ ɛytem ə wene Feyine me liɛ wen ge wele titiy. Wele suuy nɛ̀ əbchio wene ge Jesus lu Báàba, Feyine me boyse wen.

¹¹Ke lu kɛn ka ŋwaale-Feyine suuyen ge: Wel wiy wɛ əb foon ɛytem se Jesus, é əb bo yî kiile kenchoksen.”

¹²Lu kɛn Báàba əbmok wɛ luun Bay se wel əbjim, nɛ əb dine wiy əmndun-ndun se wel əblee, kene lu wele Juus, kene wele ketum. Əb ki keghoo keyii se fo kɛ́ wel əbjim wɛ əb toŋen se wen.

¹³Ke lu dî bek ka ŋwaale Feyine suuyen ge: “Naa ndɛ wɛ əb toŋen se Báàba lu se boy.”

¹⁴Sɛ lòó ghele toŋ lɛɛy vi wɛ ghene chèmè báà fo ɛytem se wen? Sɛ lòó ghene fo lɛɛy ɛytem se vi wɛ ghene nè bɛɛy ghàà yio ge sɛ lu ndɛ-a? Nɛ lòó ghene yio lɛɛy nɛ wel wiy wɛ ə́b fekte se ghene-a?

¹⁵Nɛ lòó ghele yɛ fekte lɛɛy kenəə ə wen buu ge ɛ́ tum ghene? Ke lu kɛn ka ɛ́ nyaken ɛ ŋwaale-Feyin ge “Ɛygwiy ghel ghɛ ɛ́ gwiyen nɛ̀ sakghɛ əbjuŋe jofe naa se ŋaŋ.”

¹⁶Dî nɛ wiy ghel ɛjim ghɛ ɛ́ yionen kenəə kɛ sakghɛ əbjuŋe suuyen, kɛn ka Ezaya nè suuyen ge: “Báàba, beememen ndɛ ntum ə yɛs?”

¹⁷Ke me se lu ge, wele lóó əb fo ɛytem se Feyine bek kenəə ə Feyine kɛ əb yion, nɛ kenəə kɛ əb yion lu giɛ sɛ ɛ́ fekten kum Christ.

¹⁸Mɛ me se kante ge: Lɛ lu ge ghele Juus bɛɛy ghàà tese yio-a? Ke lu dî nɛ ghene yiomen, bek ka ŋwaale-Feyine suuyen ge: “Giɛse nfektese lu nɛ se fəymen è jɛl ketuu ntiɛ kejim. Kenəə kɛ ghene fektene nduu chine ghaa mbi ləysen.”

¹⁹Mɛ kò gese se kante ge: Ghele Islaele sɛ nè yio dì è jia keele-a? Nè kɛɛte Moses è din ka Feyine nè suuyen ge: “Mɛ yî nɛɛy é ghɛn yɛ ghɛke ghel ghɛ chèmè báà se lu ketum. Mɛ nɛ̂y nɛɛye ketume keyuŋ nɛɛy é ghɛn yɛ yafse ɛytem.

²⁰Ezaya nè lômen suuy lɛ baŋ ka Feyine nè suuyen ge: Ghel ghɛ ɛ́ báà se kɛŋe mɛ yɛnmen mɛ, mɛ lu nɛ mɛ nɛɛy ghel ghɛ ɛ́ nè báà se bife mɛ yɛn mɛ.”

²¹Dî nɛ Feyine nè suŋnen kum ghele Islael ge: “Kechii kejime lu nɛ mɛ yese se chiyte se fiisen ghel nɛ ɛ́ tɛnmen se yionen se mɛ, ghel nɛ taa ketuu se mɛ.”