Read Oku Lûm 12 Bible Online

Lûm 12 - Oku bible

Lûm 12

¹Ka ke luune ghone-nyii, bek ɛysen yɛ Feyine koosenmen se ghɛsen, é mɛ yɛ beŋte ghɛn ge ghɛn kô fo ngeŋ ə sɛn se Feyine ka ntaŋle yɛ ɛy gok ɛytaa; ntaŋle ɛylanen yɛ Feyine fiisen. Di ghɛy nkante jii yɛ lòó ghɛn yɛ kokse Feyin ɛ ten.

²Ghàà ghɛn beknen jii yɛ ghele mbi chiin ɛ ten. Ghɛn vəse é Feyine kubsen tetem ə ten è siyse tekwaate tɛn é te yɛ lu tefɛɛ ka ghɛne me yɛ ke kenəə kɛ Feyine kɛŋen, kenəə kejuŋe kɛ ke luun ɛ titiy nɛ lu kɛ Feyine beemen.

³Bek əbtaawe wɛ Feyine chamen ɛysen ə yom fo san, é mɛ yɛ suuy se ghɛn ghel ɛjim ge ghàà wel yɛ kwaate ge yi lu kefaa kɛ əb báà se lu keghene. Wel yɛ kwaate kum ngeŋ ə wen kɛn ɛ jii yɛ əb luun ɛ ten, liɛ əbfek nɛ lu ɛ kenəə kɛ Feyine foon ge əb yɛ́ nɛɛy bek ɛytem yɛ əb foon se Feyine.

⁴Kɛn ka wel se ghɛsen kiin əbghun əbmok nɛ əblik əbghune lu se ɛydio nɛ kelik əbghun kekɛ ki ɛyfɛle wen ndun;

⁵lu ghɛɛ-ghɛɛ ka ghɛsen luun se ɛydio nɛ lu wel əbmok ɛ əbghun nə Christ. Me se lu nɛ wel se ghɛsen lu ɛybee əbghun nə əblee.

⁶Feyine buk ghɛsen ɛ jiise jiise nɛ̀ əbnəə wɛ yɛ nɛɛy. Əb buk naa ndɛ kɛn ɛ jii yɛ əb chamen ɛysen se ŋwɛl ɛ ten. Loo lu nɛ Feyine buk wɛ̀ nɛ̀ ɛyteefe ntum ə Feyin, wɛ̀ yɛ teefe kɛn ɛ jii yɛ wɛ̀ foon ɛytem se wen ɛ ten.

⁷Yɛ́ lu nɛ əb buk wɛ̀ ge wɛ̀ yɛ giamtene ghel, wɛ̀ yɛ giamten ghene kejuŋ. Yɛ́ lu nɛ əb buk ge wɛ̀ yɛ lu ndinte, wɛ̀ yɛ loote dinte.

⁸Yɛ́ lu nɛ yiɛ́ lu se yɛ lumse ghel wɛ yɛ lumse kejuŋ, yiɛ yɛ́ lu se yɛ foo əbfua se ghele, wɛ̀ yɛ foo nɛ̀ ɛyteme, mbukma ə yiɛ yɛ́ lu se yɛ lu wele mbiy, wɛ̀ yɛ fɛl ketaan, yiɛ́ yɛ lu se yɛ din ɛykoosen ɛysen, wɛ̀ yɛ din nɛ̀ ɛysaŋlee.

⁹Ghɛn yɛ koŋe ghel nɛ̀ tetem ə tɛne tejime. Ghɛn yɛ ban əbnəə wɛ əb wiyen ɛ titiy, koŋe wɛ əb luun ɛ titiy naa kejuŋ.

¹⁰Ghɛn yɛ koŋe wel əbjim nɛ̀ ɛyteme ka ghone-nyii, ngvəmle ngeŋ ə sɛn naa kejuŋ.

¹¹Ghàà ghɛn yɛ kwen, ghɛn yɛ fɛl ketaan, fɛle se Báàba nɛ̀ ɛyteme.

¹²Ghɛn yɛ saŋle bek kii dii kɛ ghɛne chiyten se Feyine, è loo yɛne ngɛk, ɛ́ yɛ wensen gese jeme əbliy əbjim.

¹³Ghɛn yɛ giamtene ghele Feyin, foo əbfua wɛ ghene shiin, fiisen ghel ɛyghan.

¹⁴Ghele lóò nəkse ghɛn, ghɛn yɛ jem ge Feyine bose ghene. Ghàà wel jem ge Feyine liŋ ghene.

¹⁵Ghele loo saŋle, ghɛn yɛ saŋle ghɛne ghene, ɛ́ lóó soo əbtuu, ghɛne ghene yɛ soo ghel ɛjim.

¹⁶Wel se ghɛn yɛ chii kejuŋ ghene əblee. Ghàà ghɛn yɛ ghaŋse əbghun. Ghɛn yɛ koo əbsun ghɛne ghele ghɛ́ nchɛke. Ghàà wel se ghɛn yɛ din ge yi feesen chia keleŋ.

¹⁷Wele nɛɛy mbee se wɛ̀, ghàà wɛ̀ seese nɛ̀ mbee. Liɛ əbliy se nɛɛy nɛ lu kenəə kɛ wel əbjime yɛ yɛn ge ke lu ɛ titiy.

¹⁸Ke chèmè loo lu lɛɛy ghɛn ko yɛ mom naa ketaan ge ghɛne ghel ɛjime yɛ fəy kejuŋ.

¹⁹Sun ə some! Wel nɛɛy kenəə kebee se wɛ̀ ghàà wɛ̀ seese se wɛ̀ ngeŋ. Vəse è yio kɛn se Feyine, bek ge ɛ́ nyak ɛ ŋwaale-Feyin ka Báàba nè suuyen ge: Lu mɛ wɛ mɛ fisen mbee. Mɛ nɛ̂y seese mbee yɛ wel nɛɛyen se wɛ̀.

²⁰Wɛ̀ lu se yɛ nɛɛy nɛ lu kenəə kɛ ŋwaale-Feyine dinen ge: Jeŋe yafe wel wɛ əb banen wɛ̀, wɛ̀ fo əbfua-əbyíɛ́ne se wen, kendoŋe moo yɛ yume wen, wɛ̀ fo moo se wen. Wɛ̀ nɛɛy dì é wɛ̀ mak kenghuumen se wen ə ketuu.

²¹Ghàà ghɛn beeme ge mbee taa è chia ghɛn, ghɛn yɛ nɛɛy njuŋ ka ghɛne me taa è chia mbee.