Read Oku Lûm 13 Bible Online

Lûm 13 - Oku bible

Lûm 13

¹Wel əbjim lu se yɛ yionen se ghel ghɛ ɛ́ saken bek ge wel wiy wɛ əb saken wɛ báà lɛm Feyin wen. Lɛme Feyin ghel əbjim ghɛ ɛ́ saken.

²Ke me se lu ge naa ndɛ wɛ əb yionen wiy se ghel ghɛ ɛ́ saken lu nɛ əb tɛnmen se yɛ yionen se ghel ghɛ lɛmen Feyin, nɛ ka əb yionen wiy lu nɛ əb jaŋe nɛ lu ngɛk se wene ketuu.

³Ghel ghɛ ɛ́ saken wiy fo se yɛ bɛmse nɛ lu ghel ghɛ ɛ́ nɛɛyen njuŋ, ghene lu fo se yɛ bɛmse ghel ghɛ ɛ́ nɛɛyen mbee. Wɛ̀ lɛ koŋe se jia se yɛ fan fanen ghel ghɛ ɛ́ saken-a? Wɛ̀ me yɛ nɛɛy əbnəə wɛ əb luun ɛ titiy é wel ɛysak me yɛ bente wɛ̀ benten.

⁴Ghel ghɛ ɛ́ saken lu ghel ɛyfɛl nə Feyine, fɛle se yɛ giamtene ghɛn, dî nɛ ghɛn lòò è yɛ nɛɛye mbee, ghɛn yɛ fane ghene bek ge əbtaawe wɛ ghene kiin lu nɛ əb wiy se lólò. Ghene lu ghel ɛyfɛl nə Feyine ka əb foon əbtaawe ge ghene yɛ́ fise əbnəə əbbee wɛ ghele nɛɛyen.

⁵Ghɛn lu se me se yɛ yionen se ghel ghɛ ɛ́ saken, nɛ báà se lu kɛn bek ka ghɛne fanen ngɛk sɛ Feyine fo se ghɛn, nɛ lu sɛy bek ka ghɛne kɛŋen se nɛɛy nɛ lu kenəə kɛ ɛytem ə yɛne dinen ge ke lu ɛ titiy.

⁶Ghɛy sɛy kenəə kɛ ghɛn luun se yɛ lake shile bek keghene, bek ge ghel ghɛ ɛ́ saken loo fii shile, yɛ lu nɛ ghene fɛle se Feyine.

⁷Ghɛn yɛ lake kii dii kɛ ghɛn luun se lak se ghɛ́ tene, kene lu shile se ghɛne ketuu, ghɛn lak se ghɛ́ tene, kene lu wɛ̂ əbfua wɛ ghɛn kiin, ghɛn lak se ghɛ́ tene. Yɛ lu ɛyngvəmle, ghɛn yɛ ngvəmle ghɛ́ tene, yɛ lu se yɛ foo ɛyvəm, ghɛn yɛ foo se ghɛ́ tene.

⁸Ghàà wel yɛ ki ɛykaa ə wel əblee, buu kɛn ɛykoŋ yɛ yɛ́ ki se wel nɛ̀ wel; bek ge naa ndɛ wɛ əb koŋen ghel ɛlee lu nɛ əb nɛɛye kenəə kɛ ɛysake kɛŋen.

⁹Nchil sɛ se suuy ge: Ghàà liɛ wiy ə wel kene lum wel, ghàà yuy wel, ghàà choŋ, ghàà yɛ baŋ ɛshiɛ kefaa nə wel, gese nɛ̀ nchil selee chinten è se lu ɛ məme nchil yɛ ge: Wel yɛ koŋe wel əblee kɛn ka əb koŋen ngeŋ ə wen.

¹⁰Wele koŋe wel, é əb jia nɛɛy kenəə kebee se wen. Wele loo koŋe ghel yɛ lu nɛ əb se loote nɛɛy kenəə kɛ nchile kɛŋen.

¹¹Ghɛn lu se yɛ koŋnen ɛ jii nɛ̂ ghan bek ge ghɛn ke ɛynkii əbliy wɛ ghɛn shiin ɛ ten ɛ leenen, nɛ lu əbliy wɛ ghɛn luun se kamke se mbuunese, bek ge əbliy ɛyboy nə ghɛsene baksenmen è chia ka əb nè luun ɛ əbliy wɛ ghɛsen nè kɛɛten se beeme.

¹²Ntək jɛlmen è ndu è se mɛye, nɛ moote lɛ əbtəke yio. Ghɛsen maay əbnəə wɛ ɛ́ nè nɛɛyen ɛ nfiine, è vii əbfua se əbghun wɛ ghɛsene noo ɛyghoŋ so nɛ̀ nchuy.

¹³Nchiine yɛsen lu se yɛ loote lu laane ka yɛ̂ ghel ghɛ ɛ́ jɛ́len ɛ chuy ɛybanen. Ghɛsen ghàà yɛ ndu se ghaa ɛ́ yiɛn ɛ́ yɛ nɛɛy ka buose, è maay ɛynəə yɛ́ ŋaŋe, è maay ɛychii kenjaŋe nɛ kemomlee, è maay ɛykum əbchio gese nɛ̀ kenghɛke.

¹⁴Ghɛsen lu se yɛ chii nɛ lu ɛychii Báàba wɛsen Jesus Christ, è jia fo nsan se əbnəə wɛ əbghune yusen ghɛsen ge ɛ́ yɛ nɛɛy.