Read Oku Lûm 14 Bible Online

Lûm 14 - Oku bible

Lûm 14

¹Wele lii gwiye ɛ ghɛne məm nɛ ɛybeeme wene boole, ghɛn fiisen wen fiisen, ghɛne fiisen dì, ghàà ghɛne ghene yɛ beke mbek kum tekwaate wen.

²Ɛykwaate ghel ɛlee lu ge, se ghene ɛybeeme lu nɛ lòó ghene yiɛ naa ghɛ, nɛ̀ yɛ́ ghel ɛbole lu ge lòó ghene yiɛ nɛ lu kɛn əbfua wɛ əb kuyen ɛ ntiɛ.

³Wel wɛ əb yiɛn əbfua əbjime báà se lu se yɛ nyayse wel wɛ əb tɛyte tɛyten əbfua-əbyíɛ́ne, nɛ wel wɛ əb tɛyte tɛyten əbfua-əbyíɛ́ne báà se lu se yɛ wɛyse wel wɛ əb yiɛn əbfua əbjim bek ge Feyine fiisen ghene ghel ɛjim.

⁴Wɛ̀ lu naa ndɛ se yɛ sake wel ɛyfɛl nə wel əbchin? Lu ba-ɛyfɛl nə wen se yɛ kiy ge əb sɛ fɛye fɛyen moo əb teem teem-a? Nɛ əb nɛ̂y teem bek ka Báàba lòó əb nɛɛy é əb teem.

⁵Ghel ɛlee loo ɛ́ yɛ yɛn ge kechii kelee taa chia əbchii əblee, nɛ ɛlee liɛ ge əbchii əbjime lu ghɛɛ-ghɛɛ. Ke lu kejuŋ ge naa ndɛ kiite ɛ wen ɛytem se yɛ lóóte ke kenəə kɛ əb beemen se ten.

⁶Wele yiɛ kechii fene əb yiɛ se yɛ kokse nɛ lu Báàba, nɛ wele yiɛ əbfua-əbyíɛ́ne fene əb yiɛ se yɛ kokse nɛ lu Báàba bek ka ghene yiɛn dì foo bɛɛle nɛ lu se Feyine. Ghel ghɛ ɛ́ tɛyte tɛyten əbfua-əbyíɛ́ne ko foo ɛykokse se Báàba, bek ka ghene bɛɛlen Feyin se ten.

⁷Wel se ghɛsen chii wiy kɛn se wene ngeŋ, nɛ wel kuo wiy kɛn se wene ngeŋ.

⁸Ghɛsen chii fene ɛ́ chii se Báàba, è kuo fene ɛ́ kuo bek Báàba. Kene ghɛsene taa taan, kene ɛ́ kuo kuon, fene ghɛsen lu ghɛ́ Báàba.

⁹Christ nè kuo è kase loole se ɛykuo bek kenəə kɛ ge əb yɛ lu Báàba se ghel ghɛ ɛ́ bo chiin gese nɛ̀ ghel ghɛ ɛ́ nè kuonmen.

¹⁰Wɛ̀ nyayse wán-nyii əblee bek ghɛ? Lu bek ghɛ wɛ wɛ̀ kiyen wán-nyii əblee lolo? Ghɛsen ghel əbjime yî teem ɛ Feyine ɛyshiɛ é əb sak ghɛsen.

¹¹Ɛ́ nyak ɛ ŋwaale-Feyin ka Bay nè suuyen ge: Ka mɛ luun Báàba Feyin wɛ əb chiin se əbluuy, lu nɛ wel əbjime náà təm ɛləy ɛ mɛ ɛyshiɛ, é wel əbjim fó ɛykokse se mɛ nɛ̀ əbchio ə wene.

¹²Ke me se lu nɛ wel əbjime yî taŋle əbchio ə wen ɛ ɛyshiɛ nə Feyine.

¹³Ke me se lu ge ghàà ghɛsen gese yɛ sake ghel ɛlee. Ghɛsen lɛm nɛ lu ge ghɛsene jia yî nɛɛy kenəə kɛ ke nɛɛy é wan-nyii diamten, kene nɛɛy mbee.

¹⁴Bek ka mɛ lootenmen è fo ɛytem se Báàba Jesus, lu nɛ mɛ ke se əbluuy ge əbfua-əbyíɛ́ne báà se lu wɛ lòó wel yɛ jii ge ə́b laane wiy ɛ ɛyshiɛ nə Feyine. Dî nɛ wel lòò è yɛ yɛn ge əbfua-əbyíɛ́ne laane wiy ɛ ɛyshiɛ nə Feyine, fene ə́b dì báà se laane se wen.

¹⁵Wan-nyii lòò è yɛ koo lolo bek əbfua wɛ wɛ̀ yiɛn, fene wɛ̀ báà gese se dine ɛykoŋ se wen. Yɛɛ toknene fɛ kefaa kɛ wɛ yiɛn bese wel wɛ Christ nè kuon bek wen.

¹⁶Ghàà nɛɛy ge kefaa kɛ ke jofen se wɛ̀ sɛy yɛ lu nɛ ghele suuy ge lu kefaa kebee.

¹⁷Ɛysake Feyine dì báà se lu kum ge yiɛ ghɛ, nɛ̀ nəə ghɛ. Ɛy lu kum ge wɛ̀ sɛ chii ɛ titiy-a, ki əmnyiaŋ-a, ki kechɛkle kɛ ke lóòn se Keyioy Kelanene-a.

¹⁸Wele fɛle se Christ ɛ jii nɛ̂ ghan é Feyine yɛ saŋle kum wen, nɛ ghele gese bente wen.

¹⁹Ke me se lu ge ghɛsen mom ketaan se yɛ nɛɛy nɛ lu əbnəə wɛ əb nɛɛy é ghɛsen nɛ̀ ghele yɛ fəy fo, gese nɛ̀ əbnəə wɛ əb giamten wel əblee é əb yɛ kuy ɛ kenəə ə Feyin.

²⁰Ghɛn yɛ ke se bese ɛyfɛl ə Feyin bek əbfua wɛ ghɛne yiɛn. Kefaa keyíɛ́ne kejim lu kejuŋ ɛ ɛyshiɛ nə Feyine, dî nɛ ke lu nɛ̀ ɛybame se wɛ̀ se nɛɛy ge wel fɛy bek kefaa kɛ wɛ̀ yiɛn.

²¹Kenəə kɛ́ titiye lu se vəse ɛykfəle nyam, nɛ̀ ɛynəə əmnduke, kene naa ghɛ kɛ lòó ke nɛɛy é wan-nyii əblee diamten è fɛy.

²²Kenəə kɛ wɛ̀ beemen keghene lu nɛ wɛ̀ lu se yɛ ke kɛn ghɛne Feyine. Ke lu kejuŋ se ghel ghɛ ɛ́ báà se kwaate ge ɛ́ jase jasen se yɛ nɛɛy kenəə kɛ ghene yɛ́nen ge ke lu ɛ titiy.

²³Loo lu wele yɛ maanen ge ke sɛ lu ɛ titiy se yi se yiɛ kefaa-a, dî ko yiɛ, fene ɛ́ gham wen bek ge kenəə kɛ əb nɛɛyen wiy ɛ jii yɛ ɛybeeme wene dinen. Ke lu dî bek ge naa ghɛ kɛ ke báà se nduu ɛ jii yɛ ɛybeeme dinen lu mbee.