Read Oku Lûm 15 Bible Online

Lûm 15 - Oku bible

Lûm 15

¹Ghɛsen ghɛ ɛ́ taan ɛ ɛybeeme lu se yɛ kul ɛytem se yɛ lu ghɛsen nɛ̀ ghel ɛbole. Ghàà ghɛsen yɛ nɛɛy kenəə kɛ ke jofen nɛ lu kɛn ghɛsen.

²Wel se ghɛsen lu se yɛ nɛɛy nɛ lu kenəə kɛ ke yɛ jof se wel əblee ka ke giamten ŋwɛl é əb yɛ kuy ɛ ɛybeeme nduu kɛn ɛ mbiy.

³Ghɛn kuume ge Christ se wene ngeŋ nè báà se nɛɛy kenəə kɛ ke yɛ jof kɛn wen. Əb nè nɛɛye kɛn ka ŋwaale-Feyine dinen kum wen ge: “Ndiy sɛ ghele tɛylen wɛ̀ so koo nɛ lu mɛ.”

⁴Kenəə kejim kɛ ɛ́ nè yîmen nyak ɛ ŋwaale-Feyin naa se nguk lu nɛ ɛ́ nè nyak se yɛ tefe ghɛsen, se giamtene ghɛsen ka ɛ́ yɛ kul ɛytem chii, ki ɛykwaate kum nkakma ə Feyin.

⁵Feyin wɛ luun vi wɛ əb nɛɛyen ge ghele yɛ kul ɛytem gese lumse ghel, ko nɛɛy é ghɛn yɛ chii kejuŋ ɛ ghɛne kenon kɛn ka Jesus Christe kɛŋen,

⁶ka ghɛne yɛ kokse Feyin nɛ̀ ɛytem ɛymoke gese nɛ̀ əbchio əbmoke, vi wɛ luun Bay se Báàba ə wɛsen Jesus Christ.

⁷Ke me se lu ge wel se ghɛn yɛ fiisen əblee kɛn ɛ jii yɛ Christ nè fiisen ghɛn ɛ ten, é Feyine yɛ ki ɛykokse.

⁸Mɛ suuy se ghɛn ge Christ nè sɛɛ wel əbfɛlen se ghele Juus se nɛɛy ge ghene keele ge ɛykak yɛ Feyine nè kaken se ɛbaa ɛbaa ghene lu əbluuy,

⁹Christ nè gwiy sɛy ka əbtume yɛ kokse Feyin bek ɛysen yɛ əb koosen se ghene. Ɛ́ nè nyak ɛ ŋwaale-Feyin ge: “Mɛ nɛ̂y me yɛ kokse wɛ̀ ɛ məm nə əbtume; yeme njàŋse se yɛ kokse ɛyghel ə yiɛ.”

¹⁰Nɛ ɛ́ gese nyak ɛ ŋwaale-Feyin ge: “Ghel əbtume, ghɛn yɛ saŋle ghɛne ghel ə Feyine.”

¹¹È gese nyak ge: “Ghel əbtume, ghɛn yɛ foo ɛykokse se Báàba, ghele ɛjime, ghɛn yɛ foo ɛykokse se wen.”

¹²Wele ntum nə Feyin wɛ Ezaya nè lô gese suuy ge: “Wane yî loole ɛykfəə nə Jesse, è gwiy è yɛ sak əbtum, é ghene lɛm ɛykwaate ghen ɛ wen əbghun.”

¹³Feyin wɛ luun wen wɛ əb nɛɛyen ge ghele yɛ chii ki ɛykwaate, kô nɛɛy é ghɛn yɛ loote saŋle, gese ki əmnyiaŋ ka ghɛne foon ɛytem se wen, ka ghɛne yɛ chii loote ki ɛykwaate əbtaawe nə Keyioy Kelanene.

¹⁴Ghone-nyii, mɛ se mɛ ngeŋ ke se əbluuy ge ghɛne nɛɛye njuŋ jii sejim, ke əbnəə naa kejuŋ gese lu kekwɛnten se yɛ dinte əbnəə se ngeŋ ə sɛne.

¹⁵Dî nɛ mɛ lu nɛ mɛ loo nyake ŋwaale yin, è chokte əbnəə əblee è tamte se ghɛn naa ɛ jii ɛytaa, nɛ lu bek kediak kɛ Feyine chamen ɛysen è fo san.

¹⁶Əb nè liɛ mɛ se wel ɛyfɛl nə Christ Jesus, ge mɛ yɛ́ fekte se əbtume sakghɛ əbjuŋ wɛ əb lòòn se Feyine. Mɛ me se fɛle ka wele ntaŋle se liɛ ghene se taŋle Feyin so, nɛ Feyine fíísen ghene, ka Keyioy Kelanene lansen ghene.

¹⁷Se lu nɛ mɛ ka wel wɛ əb luun ghene Christ Jesus se kefaa kemoke, ndiale kum ɛyfɛle Feyin yɛ mɛ nɛɛyen nɛ̂ yin.

¹⁸Dî nɛ lòó mɛ jia yɛ lu se suuy kenəə, buu kɛn kenəə kɛ ge Christ lu nɛ əb giamten, mɛ nɛɛy ghel əbtume se yionen se Feyine, ɛ əbnəə wɛ mɛ nè súúyen gese nɛɛyen.

¹⁹Nè lu bek əbchəyte əbnəə əbchio əbyúméné nɛ̀ əbkanene wɛ Keyioy ə Feyine nè foon kediak nɛ mɛ nɛɛye wɛ mɛ nè lômen loote fekte sakghɛ əbjuŋ wɛ kum Christ əblik əbjim se kɛ̀ɛ̀tè ɛ Jolesalem se chin ɛ Illilikum.

²⁰Kenəə kɛ mɛ lóó mɛ yɛ shii lu se yɛ fekte sakghɛ əbjuŋ kɛn əblik wɛ ɛ́ nè bɛɛy ghàà fekte kenəə kɛ kum Christ ɛ ten, ka mɛ jia yɛ bâkle ɛ ketiɛ-ndaa kɛ ɛyvii wel əbchin,

²¹kɛn ka ŋwaale-Feyin suuyen ge: “Ghel ghɛ wel nè bɛɛy ghàà tese yèŋte kenəə kɛ kum wen se ghene nɛ̂y yɛn əbluuy wɛ kum wen, é ghel ghɛ ɛ́ nè bɛɛy ghàà yi yio kenəə kɛ kum wen keele wel wɛ luun wen.”

²²Nè nɛ́ɛ̀y tejɛl tɛ mɛ nè jɛ́len se fekte kenəə ə Feyin əblik nɛ̂ ghan wɛ mɛ nè báà yaŋse gwiy se yɛne ghɛn.

²³Se lu ka mɛ mɛysenmen ɛyfɛl se əblik nɛ̂ ghan, mɛ me se kɛŋe ge mɛ gwiy è yɛn ghɛn ɛ leenen ka mɛ nè se kiin shii, nɛ ngukse chiamen se ɛydio.

²⁴Mɛ kwaate ge mɛ nɛ̂y tosen è ghan ghɛn ɛ əbliy wɛ mɛ nduun ɛ Sebain é ghɛsen chiite se feleeŋese əbliy, é mɛ lóó lòò, é ghɛn fo kefaa kɛ ke giamten mɛ ɛyjɛl nɛ̂ ghan.

²⁵Kɛ́ leenene lu nɛ mɛ nduu ɛ Jolesalem se foo kefaa se giamtene ghel ə Feyin ghɛ luun fo.

²⁶Mɛ nduu fo bek ka əbnone ghel ɛbeemene wɛ əb luun ɛ Masedonia nɛ̀ Akaia nè saŋle se foo əbfua se giamtene ghel ghɛ ɛ́ tanen ɛ məme ghel ɛbeemene ghɛ́ Jolesaleme.

²⁷Ghene nè kwaate kɛn se ghene ngeŋse ge ɛ́ giamten ghene, dî nɛ ko gese lu kelik ə ghen se fo ɛygiamten yin; bek ge ghene ghɛ əbtume bóŋle mbose Feyin se ghele Juuse, me se lu kelike ghen se giamten sɛy ghele Juus nɛ̀ əbfua wɛ Feyine bosen ghene sô.

²⁸Ke me se lu ge ɛ́ nɛ̂y yɛ lu ka mɛ nduunmen ghene kiile əbfua wɛ ɛ́ baatenmen é mɛ me lòò è tosen ghɛsen, è chia è yɛ ndu se Sebain.

²⁹Mɛ ke se əbluuy ge mɛ nɛ̂y gwiy se ghane ghɛn, é Christ loote bose ghɛsen.

³⁰Ghone-nyii, mɛ lone ghɛn bek ɛytem yɛ ghɛsen foon se Báàba Jesus Christ gese nɛ̀ jii yɛ Keyioy Kelanen nɛ́ɛ́yen nɛ ghɛsen koŋnene ge ghɛsen chinten è yɛ jem se Feyine bek mɛ.

³¹Ghɛn yɛ jem ge əb tɛɛke mɛ se ɛghoo nə ghel ghɛ ɛ́ báà fo ɛytem se Jesus Christ ɛ Judea, è gese yɛ jem ge ghele ghɛ́ Jolesaleme yɛ́ saŋle se fiisen ɛygiamten yɛ mɛ gwiyen so se ghene.

³²È yɛ jem ge mɛ loo ndu é Feyine beeme, é mɛ gwiy se ghɛn nɛ ɛytem ə yome lun nɛ̀ ɛysaŋlee é ghɛsen moote.

³³Feyin wɛ luun wen wɛ əb fóon əmnyiaŋ, kô yɛ lu ghene wel əbjim ɛ ghɛne məm. Amen.