Read Oku Lûm 16 Bible Online

Lûm 16 - Oku bible

Lûm 16

¹Mɛ kɛŋe ge ghɛn keele wán-no wɛsen Foebe wɛ əb fɛ́len ka ngiamten ɛylee ɛ kenone ghel ɛbeemene kɛ́ Senkleae.

²Mɛ kɛŋe ge ghɛn fiisen wen ɛ ɛyghel nə Báàba ɛ jii yɛ ghel ə Feyine luun se fiisene wan-nyii ɛ ten. Ghɛn giamten wen naa ɛ jii ɛykɛ yɛ əb kɛŋen bek ge əb nè lômen giamten ghel naa se ɛydio, è giamten sɛy mɛ.

³Mɛ tinse ɛychakte se Blisilla ghene Akwuila ghɛ ghɛse ghene nè fɛ́len se Christ Jesus.

⁴Ghene nè lô se lu kebaaten se kuo bek mɛ. Mɛ bɛ́ɛ̀lè ghene naa se ŋaŋ, nɛ báà se bɛɛle kɛn mɛ, əbnone ghel ɛbeemene ghɛ luun əbtume bɛɛle sɛy ghene.

⁵Ghɛn chakte ghel ɛbeemene ghɛ ɛ́ konen ɛ ghene ndaa è chakte sɛy sun ə yom Ebaenetus wɛ nè luun wen kenkɛɛte wel ɛ Asia se fo ɛytem se Christ.

⁶Ghɛn chakte sɛy Mɛɛle wɛ əb nè fɛ́len ketaan bek ghɛn.

⁷Ghɛn chakte sɛy Andlonikus ghene Junia, ghɛ luun ghele Juus ka mɛ, ghɛ ghɛse ghene nè luun ɛ nchak. Lu ɛ məme ghɛ ntum nə Jesus nɛ ɛ́ vəme ghene naa kejuŋ. Ghene nè fo ɛytem se Christ se mbiy se mɛ.

⁸Ghɛn chakte Ambliatus, wɛ luun sun ə yom ɛytaa ɛylee yɛ ghene Báàba luun se kefaa kemok.

⁹Ghɛn chakte Ulbanus wɛ ghɛse wen nè fɛ́len se Christ, chakte sun ə yom yɛ Stakis.

¹⁰Ghɛn chakte Abelles, əb nè dinmen se əbluuy ge yi tiy ghene Christ, è chakte sɛy ghel ɛyshaa ndaa nə Alistobulus.

¹¹Ghɛn chakte Helodion wɛ wel ɛylak nə ghɛs, è chakte sɛy ghele Báàba ghɛ luun ghel ɛyshaa ndaa nə Nalkissus.

¹²Ghɛn chakte Tlifaena ghene Tlifosa ghɛ ɛ́ fɛ́len se Báàba, è chakte sɛy Belsis wɛ luun sun ə yom. Əb lu əbvii əblee wɛ əb nè fɛ́len ketaan se Báàba.

¹³Ghɛn chakte Lufus wɛ Báàba nè choken, è chakte no ə wen wɛ əb ko luun san ge no ə wom.

¹⁴Ghɛn chakte Asinklitus, chakte Flegon, nɛ̀ Helmes, nɛ̀ Batlobas, nɛ̀ Helmas, gese nɛ̀ ghone-nyii ghɛ ghene ghene luun.

¹⁵Ghɛn chakte Filologus ghene Julia, è chakte Neleus ghene wan-no ə wen əbvii, è chakte Olimbas ghene ghel ə Feyine ɛjim ghɛ ɛ́ luun ghene ghene.

¹⁶Ghɛn chakte ngeŋ ə sɛn è bamnen ka ghel ɛbeemene. Əbnone ghele beemene nə Christ əbjim wɛ əb luun fɛn chakte ghɛn.

¹⁷Ghone-nyii, mɛ lone ghɛn ge ghɛn yɛ toknen kum ghel ghi ghɛ ɛ́ gwiyen nɛ̀ əbngiabsene ɛ ghɛne məm, tɛle takse ɛybeeme ə yɛn, gese tunse əbnəə wɛ ghɛn yiɛkenmen. Ghɛn yɛ base ghene.

¹⁸Ghel nɛ̂ ghine báà se fɛle se Báàba wɛsen Christ, ghene nɛɛy nɛ lu əbnəə wɛ əb jofen ghene. Ghene loo suuy kenəə ke yɛ jof naa ge, nɛ əbchio leme kɛn lɛ, di lɛɛse lɛɛsen ghel ghɛ ɛ́ báà se ke ndun ndun se əbnəə.

¹⁹Ghel ɛjime ke ge ghɛn lu ghel yionen se Báàba nɛ mɛ saŋle naa se ŋaŋ kum ghɛn, dî kɛŋe ge ghɛn yɛ ke kii dii kɛ luun kenəə kejuŋe è jia yɛ ki kenəə se nɛɛy nɛ̀ kenəə kebee.

²⁰Se moote kɛn lɛ é Feyin fɛ fe foon əmnyiaŋ se ghele mak Satan, é ghɛn jɛɛle wen nɛ̀ ɛvəə. Báàba ə wɛsen Jesus Christ kô cham ɛysen ə yɛn.

²¹Timoti wɛ ghɛse wen fɛ́len, chakte ghɛn, nɛ̀ Lusius nɛ̀ Jason gese nɛ̀ Sosibata ghɛ luun ghele Juus ka mɛ chakte sɛy ghɛn.

²²Mɛ wɛ Teltius wɛ mɛ giamten Bool se nyake ŋwaale yine chakte sɛy ghɛn ka wel ə Báàba.

²³Gaius wɛ mɛ chiin ɛ wene ndaa, wɛ ghel ɛbeemene konen ɛ wen ə ndaa chakte ghɛn. Elastus wɛ ba ɛychia yɛ́ ntɛke ghene wan-no wɛsen wɛ Kualtuse chakte ghɛn.

²⁴[Báàba ə wɛsen Jesus kô cham ɛysen se ghɛn ghel ɛjim. Amen.][1]

²⁵Ghɛsen yɛ fo ɛykokse se Feyine. Əb ki əbtaawe se nɛɛy ge ghɛn teem ketaan ka sakghɛ əbjuŋe dinen. Sakghɛ əbjuŋ vin lu wɛ mɛ fekten kum Jesus Christ nɛ əb dine chəm əbnəə wɛ́ əbluuye wɛ əb nè luun ɛ kenlete naa se əbməən.

²⁶Se lu ɛ leenen nɛ əb yɛnsenmen ɛ dɛɛne ka ghele ntum nə Feyine nè nyaken. Feyine nè lô lam ge əbnəə tene lu se yɛnsen ɛ dɛɛne ka əbtum əbjime fó ɛytem è yɛ yionen se yi.

²⁷Ghɛsen yɛ foo ɛykokse se Feyine əbliy əbjim ɛ əbtaawe nə Jesus Christ. Lu kɛn wen wɛ əb kiin ɛytof ɛyjim. Amen.