Read Oku Lûm 3 Bible Online

Lûm 3 - Oku bible

Lûm 3

¹Wele Juus chia ghel ɛlee ɛ te ghɛ? Ɛ́ nɛyte wel é əb yɛ ki sɛk əblee-a?

²Njuŋ lu naa ɛ jiise se ɛydio se yɛ lu wele Juus. Kɛ́ mbiye lu nɛ Feyine nè vii giɛ ə wen se ghene keghoo.

³Dî nɛ nè lòó kooy ghɛ ɛ lefɛ ghene ɛlee nè báà fo ɛytem se ten? Ghene lɛ nè buu se vii ɛytem se kenəə kɛ Feyine nè suuyen é Feyine me buu se nɛɛy kɛ əb nè kaken-a?

⁴Ɛngaŋ! Ghele chèmè kè lu ghel əbbuam ɛ mbi fɛn naa ɛjim, é Feyine yɛ suuy kɛn əbluuy, kɛn ka ɛ́ nyaken ɛ ŋwaale-Feyine ge: “Wɛ̀ lóò suŋnen yɛ lu nɛ kenəə kejim kɛ wɛ̀ suuyen lu ɛ titiy; Wɛ̀ yɛ teem ɛ ɛytiye nsak, wɛ̀ sak è yiɛ.”

⁵Əbjas ə wɛsene lɛ sɛ̂y kè dine kelaanen ge Feyine lu ɛ titiy, é ghɛsen suuy ge ghɛɛ? Lɛ lòó ghɛsen suuy ge Feyine baa nɛɛy ɛ titiy se make ngɛk se ghɛsen bek əbghene-a? (Mɛ kante kii nɛ̂ kine ka wele-mesoŋ.)

⁶Ɛngaŋ! Feyine lɛ kè lòò è jia yɛ lu ɛ titiy é əb náà sak lɛɛy ketuu ntiɛ?

⁷Wel ke lóò əb ko yɛ bek ge: Mɛ lɛ lòò è yɛ yia əbbuam nɛ əb sɛ́y nɛɛy nɛ əbluuy ə Feyine gwiye nɛ̀ ɛykokse se wen, ɛ́ sɛy yɛ ghame mɛ ka wele mbee-a?

⁸Ke loo lu dî é ghele ɛlee yɛ suuy ge: Ghɛsen yɛ nɛɛye mbee ka njuŋe gwiy. Lu kɛn kenəə kɛ ghele ne se yian ge ghɛse suuye. Feyine nɛɛy sak è mak ngɛk se ghene se kenəə nɛ̂ ghan.

⁹Lòó wel suuy gee ghɛ-ɛ? Ghɛsen ghɛ ghele Juus lu ghel ɛjuŋe ɛyshiɛ nə Feyine chia əbtum moo? Ɛngaŋ! Ke wiy dî! Mɛ kè lômen din ge wel əbjim, kene wele Juus, kene wele ketum, lu nɛ mbee ghalmen wen.

¹⁰Kɛn ka ŋwaale-Feyine suuyen ge: “Wel wiy wɛ əb luun ɛ titiy, wel chèmè wiy naa əbmok,

¹¹Wel wiy wɛ əb keen əbnəə, wel wiy wɛ əb kɛŋen se yɛ ke Feyine.

¹²Ghel ɛjime benmen jim se Feyine, Ghene ɛjime, befmen, wel wiy wɛ əb nɛɛyen kenəə kɛ ke luun kejuŋ, wel chèmè wiy naa əbmok.

¹³Kenəə fəy ɛ ghene əbchio, ke yɛ ləm ka keyuse loole ɛysɛy ɛ lefɛ kase fək wel, kenəə kɛ ghene suuyen kejim lu əbbuam, giɛ fəye ɛ wel əbchio ɛy yɛ tiɛnen ka əbfiŋele yio.

¹⁴Ɛychio ə ghene lu ɛylunen nɛ̀ nliŋma gese nɛ̀ ɛychɛfkee.

¹⁵Ghene lóó se yuye wel ɛ́ fiɛlé fiɛlén,

¹⁶ghene chia naa ghááy wel əbjim yio ɛylum bek ngɛk yɛ ghene nɛɛyen.

¹⁷Wel se ten nè bɛɛy ghàà yi yɛ mom ge ghele yɛ chii kejuŋ.

¹⁸Ghene báà se fane Feyin naa se nkan.”

¹⁹Ghɛsen ke ge kenəə kejim kɛ nchile dinen lu nɛ ke kume nɛ lu ghel ghɛ ɛ́ nè foon nchil se ghene, ka wel əbjime yɛ lu ɛ chichi, é wel əbjim ɛ mbi me taŋle əbchio nɛ lu se Feyine.

²⁰Wele jia yî yɛ lu ɛ titiy ɛ ɛyshiɛ nə Feyine ge yí ka yi nɛɛyen əbnəə wɛ nchile dinen. Nchil dì giamten kɛn se yɛ din ge ghɛsen nɛɛymen mbee.

²¹Ke lu ɛ leenen nɛ Feyine dinmen jii yɛ lòó wel yɛ lu ɛ titiy ɛ wen ɛyshiɛ, nɛ ɛy ki wiy kenəə se nɛɛy nɛ̀ ɛylɛme nchile. Ghɛy kenəə kɛ Ŋwaale Nchil ghene yɛ̂ ghele ntum nə Feyine nè dinen.

²²Se yɛ lu ɛ titiy ɛ ɛyshiɛ nə Feyine lu bek ɛytem yɛ fó se Jesus Christ. Ghɛy ka ke luun se wel əbjim wɛ əb beemen, nɛ əmndun-ndune báà se lu.

²³Ke lu dî bek ge wel əbjim lu nɛ əb nɛɛymen mbee è jia gese se jofe ka Feyine kɛŋen.

²⁴Dî nɛ Feyine chame nɛ lu ɛysen se wel se geese liɛ wen ge əb lu ɛ titiy. Ghɛy fomɛ wɛ Feyine nè foon se ghɛsen, è chia ɛyten yɛ Jesus Christ nè tenen ghɛsen se mbee.

²⁵Feyine nè fo Jesus Christ ka ntaŋle se mane mbeese nɛ̀ əmnduŋ mə wen, nɛ ɛy fɛle kɛn se wel wɛ əb foon ɛytem se wen. Feyine nè nɛɛy kii nɛ̂ kine se din ge Yi lu ɛ titiy ɛ jii yɛ ge ghele nè lômen se nɛɛy mbee se mbiy əb kul ɛytem, è jia mak ngɛk se ghene.

²⁶Feyine nè nɛɛy dî se din ɛ leenen se ghele ge Yi lu ɛ titiy liɛ naa ndɛ wɛ əb foon ɛytem se Jesus Christ ge wel wɛ əb luun ɛ titiy.

²⁷Ghɛsen lòó ɛ́ jia bo kase yɛ ghaŋse əbghun bek ge ɛ́ baa boy bek ka ɛ́ lɛmen nchil. Ghɛsen lòó jia bo kase yɛ ghaŋse əbghun nɛ lu bek ka ɛ́ boyen bek ɛytem yɛ ɛ́ foon se Jesus Christ.

²⁸Ghɛsen ke se əbluuy ge wel lu ɛ titiy bek ka əb foon ɛytem se Jesus Christ, nɛ wiy bek nchil ka əb lɛmen.

²⁹Feyine di wiy Feyine ghele Juus. Feyine lu sɛy Feyine ghel əbtum.

³⁰Feyine lu femok, nɛ dine wen ge lɛɛ wele wɛ̂ titiy, wele Juus, kɛn bek ɛytem yɛ əb foon se Feyine, nɛ̀ wele ketum, ko kɛn bek ɛytem yɛ əb foon se Feyine.

³¹Ke lɛ lu ɛ leenen ge ɛytem yɛ fó se Feyine buusemen nchil-a? Ke wiy di! Ke sɛ̂y bo lu ge ghɛsen lóóte ghale nchil.