Read Oku Lûm 4 Bible Online

Lûm 4 - Oku bible

Lûm 4

¹Ghɛsen liɛ nfek əbnəə ghan se Ablaham wɛ ba ə ɛykfəə nə ghɛsen. Əb nè lu ɛ́ titiy ɛshiɛ nɛ̀ Feyine bek ghɛ?

²Nè bóy se yɛ lu ge Feyine liɛ Ablaham ge wele wɛ̂ titiy bek əbnəə əbjuŋe wɛ Ablaham nè nɛɛyen, fene Ablaham nè ki kenəə kɛ lòó əb yɛ ghaŋse əbghun ɛ ten. Dî nɛ əb nè lòó əb jia yɛ ghaŋse əbghune bek kenəə ɛ ɛyshiɛ nə Feyine.

³Ŋwaale-Feyine me se suuye ge: Ablaham nè fo ɛytem se Feyine, Feyine me liɛ wen ge wele wɛ̂ titiy.

⁴Wele sɛɛ fɛl ɛ́ lak wen, ghàà yɛ lu ge əblaake tene lu fomɛ. Ə́b yɛ lu nɛ lu əbghiy ɛghoo nə wen.

⁵Se lu se wel wɛ əb báà se nɛɛy nɛ lu əbnəə əbjuŋe ge Feyine liɛ yi ka wele titiy, dî foo ɛytem se vi wɛ əb lɛyse mbeese ghel, lu nɛ Feyine yî liɛ wen ge wele titiy kɛn bek ɛytem yɛ əb foon se Feyine.

⁶David ko lu nɛ əb din sɛy ge, ke lu kejuŋ se ghel ghɛ Feyine liɛn ge ɛ́ lu ɛ titiy nɛ wiy bek kenəə kɛ ghene nɛɛyen. Əb nè suuy ge:

⁷“Ke lu kejuŋ se ghel ghɛ Feyine lɛysemen əbjas ə ghen, ghel ghi ghɛ Feyine chitenmen mbeese ghen.

⁸Ke lu kejuŋ se wel wɛ Báàba jia yî yɛ kuume mbeese ə wen.”

⁹Ke lɛ lu kejuŋ nɛ lu kɛn se ghele Juuse ge yi ka ɛ́ nɛyten ghene moo, ke lu sɛy kejuŋ se ghel ghɛ ɛ́ baa nɛyte-a? Kéné ghɛsen lóó ɛ́ yɛ suuy ge Feyine nè liɛ Ablaham ge wele titiy bek ɛytem yɛ əb nè foon se Feyine.

¹⁰Feyine nè liɛ Ablaham ka wele titiy ɛ leghɛ? Nè lu nɛ ɛ́ nɛytemen Ablaham moo, nɛ ɛ́ bɛɛy ghàà nɛ̀yte-a? Nè lu nɛ ɛ́ bɛɛy ghàà nɛ̀yte.

¹¹Ɛ́ nè nɛyté Ablaham, kii nɛ̂ kine se lu kɛn əbchəysen se din ge əb lu wele titiy kɛn bek ɛytem yɛ əb nè foon se Feyine nɛ ɛ́ bɛɛy ghàà chèmè nɛyte wen. Feyine nè liɛ wen ge wele titiy ɛ jii nɛ̂ ghan ka əb yɛ lu ba-ɛykfəə se wel əbjim wɛ əb foon ɛytem se Feyine di nɛ ɛ́ báà nɛ̀yte.

¹²Ablaham ko gese se lu sɛ̂y ba-ɛykfəə se ghel ghɛ ɛ́ nɛyten, nɛ wiy ge yî ka ɛ́ nɛyten kɛn ghene nɛyten; nɛ lu bek ɛytem yɛ ghene foon se Feyine, ghɛɛ-ghɛɛ ka Ablaham nè foon ɛytem se Feyine nɛ ɛ́ gee se naa se nɛ̀yte wen.

¹³Feyine nè kak Ablaham ghene ɛykfəə wene ge ghene yî yɛ ki ketuu ntiɛ se kɛ́ ghene. Ɛykak nɛ̂ yin nè báà gwiy ge yí ka Ablaham nè lɛmen nchil. Ɛy nè gwiy bek ka Feyine nè liɛn Ablaham ge wele titiy bek ɛytem yɛ əb nè foon se wen.

¹⁴Nɛ dì kè lòò è yɛ lu ge ghel ghɛ ɛ́ chiin ɛ ɛyshaa ɛysak yɛ lu ghene ghɛ ɛ́ kiile nkakma ə Feyine, fene ɛytem yɛ fo se Feyine jia bo yɛ ki kenəə se nɛɛy, nɛ ɛykak yɛ Feyine nè kaken lu kenəə keyume.

¹⁵Wele kole nchil Feyine yafse ɛytem è mak ngɛk se wen. Nɛ nchil dì kè wiy é kelee jia bo yɛ lu ge wel kol nchil.

¹⁶Di ghɛy kenəə kɛ Feyine foon nkakma nɛ̂ yin nɛ lu bek ɛytem yɛ wel fó se wen. Feyine nè fo nkakma nɛ̂ yin nɛ lu bek ka əb nè chamen nɛ lu ɛysen se ghone Ablaham ɛjim nɛ wiy kɛn ghii dii ghɛ ɛ́ lɛmen nchil əb nè fo se ghii dii ghɛ ɛ́ foon nɛ lu ɛytem se Feyine ka Ablaham wɛ luun bay se ghɛsen ɛjim nè foon.

¹⁷Ke lu ka ɛ́ nyaken ɛ ŋwaale-Feyin ge: “Mɛ lu nɛ mɛ nɛɛymen ge wɛ̀ yɛ lu Bay se əbtume se ɛydio.” Ablaham me se lu ba ə wɛsen ɛ ɛyshiɛ nə Feyine wɛ əb nè foon ɛytem se wen, nɛ lu vi wɛ əb fóon ɛychii se ghel ghɛ ɛ́ kuonmen, gese nɛɛy ge əbfua wɛ əb bɛɛy ghàà tese yɛ lu, yɛ lu.

¹⁸Ablaham nè fo ɛytem è se ki ɛykwaate ɛ kenəə kɛ ke nè yɛnsen ge lòó ke jia yî yɛ lu ge əb yi yɛ lu bay se əbtume se ɛydio, kɛn ka Feyine nè suuyen se wen ge: Lɛɛ jii yɛ ghon ə ghiɛ yî yɛ dio ɛ ten.

¹⁹Chèmè lu ka Ablaham nè se koken nguk əbviɛ, è se yɛne ge əbghun nə vii se shi ka kenkuo kefaa, nɛ wiy ə wene Sala gese bii wiy, əb nè báà buu se yɛ foo ɛytem se Feyine.

²⁰Ablaham nè báà shiken se yɛ kuume nkakma yɛ Feyine nè foon se wen. Ɛybeeme wene sɛy nè taa è ndu kɛn ɛ mbiy, əb me se foo ɛykokse se Feyine;

²¹loote ke se əbluuy ge Feyine lòó əb nɛɛy kenəə kɛ əb kaken se yi.

²²Feyine liɛ Ablaham ge wele wɛ̂ titiy bek ɛytem yɛ əb nè foon se wen.

²³Giɛ sɛ ge: “Feyine me liɛ wen ge wele wɛ̂ titiy” lu nɛ ɛ́ nè báà nyak kɛn bek Ablaham.

²⁴Ɛ́ nè nyak bek ghɛsen sɛy. Feyine nɛ̂y liɛ ghɛsen ge ghele ghɛ́ titiye, ghɛsen ghɛ ɛ́ foon ɛytem se wen wɛ əb nè losen Jesus wɛ Báàba ə wɛsen se ɛykuo.

²⁵Ɛ́ nè lô fo Jesus Christ ɛ́ yuy bek mbee ə sɛsen, Feyine kase lose wen se ɛykuo ka ghɛsene yɛ lu ɛ titiy ɛ ɛyshiɛ nə Feyine.