Read Oku Lûm 5 Bible Online

Lûm 5 - Oku bible

Lûm 5

¹Ka ghɛsen shiin ghele ghɛ́ titiye se Feyine bek ɛytem yɛ ghɛsen foon se wen, ghɛsen nɛ̀ ghe Feyine me se chii əmnyiaŋ bek ɛyfɛle Báàba ə wɛsen Jesus Christ.

²Nɛɛy wen ge jii yɛnsen yɛ ghɛsene kiile ɛycham ɛysen nə Feyine bek ɛytem yɛ ghɛsen foon se wen, me se lu kenəə kɛ ghɛsen tiyen ɛ ten. Ghɛsen me se ndiale, chii, loote ke ge ɛ́ náà kiile ɛyjof ə Feyin.

³Kenəə kelee gese lu ge, ghɛsen loo yɛne ngɛk, ɛ́ ko yɛ saŋle bek ge ghɛsen ke ge wele loo yɛne ngɛk əb me yɛ ke se wensen əbnəə,

⁴è loo wensen, əb yɛ ke ka loo əb teem ketaan, è loo tiy ketaan, əb yɛ ke se əbluuy ge yi kiile kɛ yi chiyten.

⁵Ɛychiyte nɛ̂ yine jia yî chia se lólò bek ge Feyine lu nɛ Əb lunse ɛykoŋ ə wen ɛ ghɛsene tetem, nɛ Keyioy Kelanene kɛ əb foon se ghɛsen.

⁶Nè lu nɛ jii wiy se ghɛsen, Christ gwiy ɛ əbliy wɛ Feyine nè choken, è kuo bek mbii ə sɛsen.

⁷Ke cheme báà se bonene ka wel kuo ɛ kelik nə wele wɛ́ titiy, dî nɛ lòó wel ko beeme se kuo ɛ kelik nə wel wɛ əb nɛɛyen njuŋ.

⁸Dî nɛ Feyine nè din ge yi koŋe ghɛsen ka nè luun nɛ ghɛsen bɛɛy ghele mbee, Christ gwiy è kuo bek ghɛsen.

⁹Ka əmnduŋ mə Jesus Christ nɛɛyenmen ghɛsen se lu ghele ghɛ́ titiye se Feyine, é əb jia nɛ̂y me loote boyse ghɛsen se ngɛk yɛ Feyine nɛy mak se ghele-a?

¹⁰Lɛ nè lu nɛ ghɛsen bo bɛɛy ghele mbee, ɛykuo wan ə Feyine nɛɛy ge ghɛsen yɛ fəy fo ghɛsen nɛ̀ ghe Feyine, é loo lu ɛ leenen wɛ ghɛsen fəyen fo ghɛsen nɛ̀ ghe Feyine, é ɛychii wan ə wene jia me loote boyse ghɛsen-a?

¹¹Kelee gese lu ge, ghɛsen gese ndiale bek kenəə kɛ Feyine nɛɛyen se ghɛsen ɛ jii yɛ Báàba ə wɛsen Jesus Christ lu nɛ əb nɛɛy, ghɛsen nɛ̀ ghe Feyine se fəye kejuŋ.

¹²Ke me se lu ge kɛn ka wel əbmok nè nɛɛyenmen mbee lii se mbi fɛn, ɛykuo lii se mbi bek mbee, ghel ɛjime me se kuo bek ka wel əbjime nɛɛyenmen mbee.

¹³Feyine nè ghane ge Yi fó nchil se ghele nɛ mbee nè shi ɛ mbi, dî nɛ nchil kè wiy, ɛ́ jia yɛ ghame wel ge əb nɛ̀ɛ̀y mbee.

¹⁴Se lu nɛ se kɛ̀ɛ̀tè se əbliy nə Adam se chin se əbliy nə Moses wɛ ɛysake nè gwiyen se wen lu nɛ ɛykuo nè se shi ɛ mbi fɛn. Chèmè lu ghel ghɛ́ nè báà nɛɛy mbee Adam, fene ɛ́ ko nè lô se kuo. Adam nè lu kɛn se din nɛ lu wel wɛ əb nè bo bɛɛyen se gwiy.

¹⁵Dî nɛ fomɛ wɛ Feyine nè foon lu kenəə ndun se mbee yɛ Adam nè nɛɛyen. Wel əbmok nè nɛɛymen mbee ghele se kuo se ɛydio bek mbee ə wen, Feyine me loote cham ɛysene ghel se ɛydio è fo fomɛ è chia əbghun nɛ̀ wel əbmok wɛ Jesus Christ.

¹⁶Fomɛ Feyine gwiy nɛ̀ kenəə ndun se kɛ mbee ə wel əbmok nè gwiyen so. Wel əbmok nè nɛɛy mbee Feyine mak ngɛk se ghel se ɛydio. Ghel se ɛydio loo nɛɛye mbee, Feyine sɛy fo nɛ lu fomɛ se ghene se lólò, dìì ge ghene bo ki wiy njio.

¹⁷Wel əbmok lɛ nè nɛɛymen mbee ɛykuo gwiy se mbi, Feyine cham ɛysen ə ghel naa se ŋaŋ è liɛ ge ghene lu ɛ titiy, ghene me kiile ɛychii yɛ ɛ jia yi mɛy bek wel wɛ əbmok wɛ luun Jesus Christ.

¹⁸Ke me se lu ge ka wel əbmok nè nɛɛyen mbee, wel əbjim boŋ njio, lu ghɛɛ-ghɛɛ ka wel əbmok nè nɛɛyen kenəə kɛ́ titiye Feyine liɛ ghel ɛjim ge ɛ́ shi titiy, è fo ɛychii se ghene.

¹⁹Ka wel əbmok nè tɛnen se yionen se Feyine, ghel se ɛydio se lu ghele mbee, lu ghɛɛ-ghɛɛ ka wel əbmok nè yionen se Feyine è nɛɛy ghel se ɛydio se lu ɛ titiy se Feyine.

²⁰Feyine nè fo nchil se ghele ka ghene yɛ yɛn ɛynkii əbjas wɛ ghene nɛɛyen. Ghele nɛɛy ndu nɛ mbee, Feyine ko me gese yɛ cham ɛysen ə ghen nduu kɛn ɛ mbiy.

²¹Ka mbee nè liinmen se mbi ghele se kuo, lu ghɛɛ-ghɛɛ ka ɛycham ɛysen nə Feyine gwiyen ka ghele yɛ lu ɛ titiy, è kiile ɛychii yɛ ɛy jia yî mɛy chia əbghun nə Báàba ə wɛsen Jesus Christ.