Read Oku Lûm 6 Bible Online

Lûm 6 - Oku bible

Lûm 6

¹Lòó ghɛsen bo suuy ge ghɛɛ, ge ghɛsen yɛ nɛɛye mbee nduu ɛ mbiy ka Feyine yɛ loote cham ɛysen-a?

²Ke wiy dî, lòò lɛɛy é ghɛsen kuo è ben jim se mbee è kase yɛ chii ɛ məme mbee?

³Moo ghɛne báà se ke ge nè lu əbliy wɛ ghɛsen nè fiin moo se din ge ghɛsen lu ghel ə Christ lu nɛ ghɛsen nè chintenmen wen ɛ ɛykuo yɛ əb nè kuon-a?

⁴Nè lu əbliy wɛ ghɛsen nè fiin moo ke se lu ka ɛykuo ka ghɛsen kuomen ɛ́ gvəəmè ghɛsen nɛ̀ Christ ka ke me yɛ lu ge, kɛn ka Feyine nè losen Christ se ɛykuo nɛ̀ əbtaawe ə wene lu ghɛɛ-ghɛɛ ka ghɛsene yɛ chii ɛychii ɛyfɛɛ.

⁵Se lu ka ghɛsen chintenmen wen se kuo ɛ jii yɛ əb nè kuon ɛ ten lu kɛn ghɛɛ-ghɛɛ ka ghɛsene náà chinten wen se loole se ɛykuo kɛn ka əb nè loolen.

⁶Ghɛsen ke ge ɛ́ nè liɛmen nchiine ə yɛsen ɛyməə è chinten è bante ghene Christ se kentam ka ɛ́ mɛyse kediake mbee se ghɛsen ə əbghun ka ghɛsene jia bo yɛ fɛle kekos se mbee.

⁷Ke lu dî bek ge naa ndɛ kuo, əb me boy se kediak nə mbee.

⁸Se lu nɛ ka ghɛsen nɛ̀ Christ nè kuonmen lu nɛ ghɛsen beeme se əbluuy ge ghɛsene yɛ ki ɛychii sɛy.

⁹Ghɛsen ke ge ka ɛ́ nè losenmen Christ se ɛykuo lu nɛ əb jia bo yî kase kuo. Ɛykuo bo ki wiy kenəə se nɛɛy nɛ̀ wen.

¹⁰Ɛykuo yɛ əb nè kuon yin lu nɛ əb nè kuo, ke kwɛn dî, kediake mbee me buu, nɛ ɛychii yɛ əb chiin lu se yɛ foo ɛykokse se Feyine.

¹¹Lu kɛn ghɛɛ-ghɛɛ ka ghɛn luun se liɛ ge ghɛn nè kuomen kediake mbee me buu se ghɛn ɛychii yɛ ɛy foon ɛykokse se Feyine bek ge ghɛsen lu ghel ə Christ Jesus.

¹²Ke me se lu ge ghàà ghɛn vəse ge mbee yɛ sak ɛyghun ə yɛn, nɛɛye nɛ ghɛn nɛɛy əbnəə wɛ ɛyghune yusen ge ghɛn yɛ nɛɛy.

¹³Ghàà ghɛn vəse əblik əbghun nə ghɛn ge yɛ lu əbfua ɛyfɛl wɛ ɛ́ yɛ nɛɛye mbee so. Ghɛn lu ghel nɛ ɛ́ nè kuomen Feyine kase lose, ghɛn se chii. Ghɛn me mɛyse fo yi ngeŋ ə sɛn se Feyine, é əb yɛ fɛl nɛ̀ ghɛn se yɛ nɛɛy əbnəə əbjuŋe.

¹⁴Mbee bo ki wiy kediak se nɛɛy kenəə nɛ̀ ghɛn, bek ge ghɛne báà se chii ɛyshaa ɛysak, dî chii bek ɛycham ɛysen nə Feyine.

¹⁵Kɛ́ leenene lu ge ghɛɛ, ge ghɛsen yɛ nɛɛye mbee nduu ɛ mbiy bek ka ghɛsen báà se chii ɛyshaa ɛysak, chii nɛ lu bek ka Feyine chamen ɛysen ə yɛ́sen-a? Ke báà se lu dî.

¹⁶Ghɛne báà se ke ge ghɛn fó ngeŋ ə sɛn se wel è yɛ yionen se wen fene ghɛn shi əbkos ə wen-a? Ghɛn dì lu əbkos se wel wɛ ghɛne yionen se wen, kene ɛ́ lu əbkos se mbee yɛ ɛy gwiyen nɛ̀ ɛykuo, kene ɛ́ lu əbkos se yɛ yionen se Feyine se yɛ lu ghele titiy.

¹⁷Mɛ bɛ́ɛ̀lè Feyin ge nè lu ɛ keleŋ əbliy kelee nɛ ghɛn fɛle kekos se mbee, se lu ɛ leenen nɛ ghɛn yionen se ɛyyiɛke ɛyfɛɛ yɛ ghɛne kiilen se ghɛs, nɛ̀ ɛytem ə yɛn ɛyjime.

¹⁸Feyine dì nè boysemen ghɛn se mbee ghɛne me se fɛle kekos nɛ lu se əbnəə wɛ́ titiye.

¹⁹Mɛ suŋnen liɛ nfek nɛ lu se wele-mesoŋe lɛ bek ka ke taan se ghɛn ka ghele mesoŋ se keele kenəə kɛ mɛ suuyen. Nè lô se lu ɛ keleŋ əbliy kelee nɛ ghɛne fó ngeŋ ə sɛn se yɛ fɛle kekos se jione ghene əbnəə əbbee wɛ ghɛn nè nɛɛyen nduun kɛn ɛ mbiy. Ke me se lu ge ghɛn fó ngeŋ ə sɛn se yɛ fɛle kekos se əbnəə wɛ titiye ka ghɛne yɛ lu ghel ɛlanene.

²⁰Nè lu əbliy wɛ ghɛn nè bo fɛ́len kekos se mbee, ghɛn di nè wiy se yɛ luŋ ge ɛ́ yɛ nɛɛye əbnəə wɛ́ titiye.

²¹Sɛk ə wɛn nè lu ghɛ se əbnəə nɛ̂ fo wɛ ghɛn nè nɛɛyen wɛ kenghuumene koon ghɛn se ten ɛ leenen? Kenləysen əbnəə nɛ̂ fo lɛ báà se lu kɛn ɛykuo-a?

²²Kɛ́ leenene lu nɛ Feyine boysemen ghɛn se mbee ghɛn se fɛle kekos se wen, nɛ sɛke ten lu ge ghɛne chii ɛychii ɛylanene, nɛ kenləysene tene lu ɛychii yɛ ɛy jia yî mɛy.

²³Əbmakte mbee lu ɛykuo, dî nɛ ɛychii yɛ ɛy jia yî mɛy lu fomɛ wɛ Feyine foon se lólò se ghel ghɛ luun ghɛ́ Báàba ə wɛsen Christ Jesus.