Read Oku Lûm 8 Bible Online

Lûm 8 - Oku bible

Lûm 8

¹Ke me se lu ge ɛ́ jia bo yɛ gham se bese ghel ghɛ ɛ́ shiin kefaa kemok ghene Christ Jesus.

²Ke lu dî bek ge kediak ə Keyioy nə Feyine kɛ ke foon ɛychii se ghɛsen bek ka ghɛsen nɛ̀ Jesus Christ shiin kefaa kemok boysenmen mɛ se kediak ə mbee ghene ɛykuo.

³Feyine nè nɛɛymen kenəə kɛ ɛysake nè momen lolo se nɛɛy, bek ka kechak əbghunne nè boolen. Əb nè nɛɛy ɛ jii yɛ əb nè tumen wán ə wen, əb liɛ əbghune wele-mesoŋ wɛ ə́b nɛɛyen mbee è gwiy è kuo se buuse mbee. Lu ɛ jii nɛ̂ ghan yɛ Feyine nè besen kediake mbee kɛ ke luun ɛ kechak əbghun.

⁴Feyine nè nɛɛy dî ka ghɛsen ghɛ ɛ́ bo chiin wiy ka əbghune kɛŋen, dî chii ka Keyioye kɛŋen yɛ loote nɛɛy əbnəə wɛ̂ titiye kɛn ka ɛysake kɛŋen.

⁵Ghel ghɛ ɛ́ chiin ka əbghune kɛŋen lɛme ketuu ə ghen ɛ əbnəə wɛ əbghune kɛŋen, dî nɛ ghel ghɛ ɛ́ chiin ka Keyioy ə Feyine kɛŋen lɛme ketuu ghen nɛ lu əbnəə wɛ Keyioy ə Feyine kɛŋen.

⁶Wel lɛm ketuu əbnəə wɛ əbghune kɛŋen fene əb kuo kuon, dî nɛ wel lɛm ketuu wen ɛ əbnəə wɛ Keyioye kɛŋen é əb yɛ ki ɛychii yɛ ɛy jia yî mɛy, gese nɛ̀ əmnyiaŋe.

⁷Ghel ghɛ lɛmen ɛykwaate ghen əbnəə wɛ ɛyghun ə ghene kɛŋen bane Feyin, lɛme wiy ɛysak ə Feyin, nɛ lòó ghene jia yî lɛm.

⁸Ghel ghɛ ɛ́ chiin ka ɛyghun ə ghene kɛŋen lòó ɛ́ jia nɛɛy é Feyine yɛ saŋle.

⁹Se ghɛn lu nɛ ghɛne báà se chii ka ɛyghun ə yɛne kɛŋen, ghɛne chii nɛ lu ka Keyioy ə Feyine kɛŋen ɛ lefɛ Ke dì luun ɛ ghɛne məm se əbluuy. Naa ndɛ wɛ əb báà se ki Keyioy ə Christ ɛ wen ə məm báà se lu wel ə Christ.

¹⁰Christ lòò è yɛ chii ɛ ghɛne məm, chèmè yɛ lu ka ghɛne naa kuo se kechake əbghun bek mbee, dî é keyioy ə kɛne kô yɛ chii bek ka Feyine liɛnmen ghɛn ge ghele titiy.

¹¹Loo lu nɛ Keyioy ə Feyin wɛ əb nè losen Christ se ɛykuo chii ghɛne məm, fene wen wɛ əb nè losen Christ se ɛykuo nɛ̂y fo sɛy ɛychii se ɛyghune yɛne yɛ ɛy kuon, kɛn bek ka Keyioy wene chiin ɛ ghɛne məm.

¹²Ke me se lu ghone-nyii ge, kenəə lu kɛ ghɛsen tiyen se yɛ jumte, nɛ báà se lu kenəə kɛ kum ɛyghun ə yɛ́sen, nɛ wiy se yɛ chii ka ɛyghun ə yɛ́sene kɛŋen.

¹³Wel lòò è yɛ chii ka əbghune kɛŋen é əb kuo, dî nɛ əb chii ka Keyioy ə Feyine kɛŋen è maay ɛynɛɛy əbnəə əbbee, é əb yɛ ki ɛychii.

¹⁴Ghel ɛjim ghɛ Keyioy ə Feyine dinen jii se ghene lu ghon ə Feyin.

¹⁵Keyioy kɛ Feyine foon se ghɛne báà nɛɛy ge ghɛn yɛ lu nɛ lu əbkos gese chii nɛ̀ ɛyfane. Ke sɛy nɛɛy ghɛn se lu ghon ə Feyin, è nɛɛy ghɛn se toŋte Feyin ge Báà, Ba ə wɛs.

¹⁶Lu Keyioy ə Feyin nɛ̂ kin kɛ ghene keyioy ə kɛ́sene chinten suuyen ge ghɛsen lu ghon ə Feyin.

¹⁷Ka ghɛsen luun ghon lu nɛ ghɛsene nɛ̂y kiile mbose yɛ əb lɛmen se ghel ə wene. Ghɛsene nɛ̂y chinten Christ, é ghɛsen nɛ̀ wen kiile kii dii kɛ Feyine lɛmen se wen. Se ghɛsen se kiile əbghaake wɛ Christ kiin lu nɛ ghɛsen tiy se yɛ yɛn sɛy ngɛk yɛ əb nè yɛnen.

¹⁸Mɛ liɛ ge ngɛk yɛ ghɛsen yɛ́nen ɛ leenene laay ɛ ŋaŋ ka lòó ɛ́ feknen se əbghaake wɛ Feyine yî fo se ghɛsen.

¹⁹Əbfua əbjim wɛ Feyine nè bomen chiyte ɛ shii se yɛn ka Feyine din ghon ə wen.

²⁰Əbfua əbjim wɛ Feyine nè bomen nè shi se yɛ jiŋ jiŋen, nɛ báà se lu ge ə́b nè koŋe se yɛ jiŋ. Nè nɛɛy wen wɛ əb nè bomen əbfua nɛ̂ vin ge ke yɛ lu dî, chiytee

²¹ge yî loo lu ɛ kechii kelee əbfua əbjime boy è jia bo yɛ foy è me kiile əbghaake vi wɛ Feyine foon se ghon ə wene.

²²Ghɛsen ke ge əbfua əbjim wɛ Feyine nè bomen yio ɛylum sayse dì ka əbvii wɛ əb lumen wán, se kok se chin se leenen.

²³Dî nɛ báà se sayse kɛn əbfua wɛ Feyine nè bomen. Ghɛsen ghɛ ɛ́ kiin Keyioy ə Feyin ka kefaa kɛ́ mbiye kɛ əb nè tɛyen fo se ghɛsen, sayse sɛy ɛ ghɛsene tetem ka ghɛsen chiyten ge Feyine mɛyse liɛ ghɛsen ge ghone ə wen è boyse ɛyghune yɛ́sen kejim.

²⁴Lu bek ka ghɛsen nè foon ɛytem è se chiyte wɛ Feyine nè boysen ghɛsen se ngɛkse. Ghɛsen kè boy se yɛ yɛne kefaa kɛ ghɛsen chiyten, fene ghɛsen bo chiyte wiy chiyten. Lu ndɛ wɛ lòó əb fó ɛytem è yɛ chiyte kefaa kɛ əb kiilemen?

²⁵Dî nɛ ghɛsen loo lu è yɛ chiyte kefaa kɛ ghɛsen bɛɛy ghàà yɛn, é ghɛsen yɛ kul ɛytem chiytee.

²⁶Lu ghɛɛ-ghɛɛ ka Keyioy Kelanene giamten ghɛsen bek ge ghɛsen boole, ke wiy ka lòó ghɛsen yɛ jem se Feyine. Keyioy ə Feyine me se lone se Feyine ɛ kelik nə ghɛsen, sayse ɛ jii yɛ lòó wel jia fekte.

²⁷Feyine yɛne tetem ə tɛsen, ke kenəə kɛ Keyioy Kelanene kwaaten, bek ge Keyioy ə Feyine lone se Feyine ɛ kelik nə ghel ə Feyine kɛn ka Feyine kɛŋen.

²⁸Ghɛsen ke ge Feyine nɛɛy nɛ əbnəə əbjim wɛ əb ganen fɛle njuŋ se ghel ghɛ ɛ́ koŋen wen, ghel ghi ghɛ əb chokenmen ge ɛ́ yɛ nɛɛy əbnəə ɛ jii yɛ əb siysen ɛ ten.

²⁹Feyine nè lɛm ghel ghɛ əb nè yimen chok ge ghene yɛ lu ka wan ə vi luun, ka wan ə wene yɛ lu wane wɛ̂ mbiy ɛ məm nə ghone-nyii se ɛydio.

³⁰Ghel ghɛ Feyine nè chokenmen lu ghii ghɛ əb nè liɛn ge ghii, ghel ghɛ əb nè liɛn ge ghii lu ghɛ əb nè nɛɛyen ge ɛ́ yɛ lu ɛ titiy, è me fo əbghaake wen se ghii ghɛ əb nè nɛɛyen ge yɛ lu ɛ titiy.

³¹Lòó ghɛsen suuy gee ghɛ kum əbnəə nɛ̂ vin? Feyine lɛ lu ghɛsen nɛ̀ ghene é noo ndɛ è yiɛ ghɛsen?

³²Feyine nè báà ŋwɛy se foo wan ge əb kuo bek ghɛsen. Ka əb nè foon wán ə wen bek ghɛsen, lɛ lòó əb jia fo əbfua əbjim wɛ ghɛsen shiin-a?

³³Lòó gham ndɛ ghel ghɛ Feyine nè chokenmen? Feyine se wene ngeŋ liɛmen ge ghene lu ɛ titiy ɛ yi ɛyshiɛ.

³⁴Wel lɛ lu wɛ lòó əb gham ghene-a? Ɛngaŋ! Naa Christ Jesus se wene ngeŋ loo əb jia gham ghene. Əb nɛ̀ kuo è kase loole se ɛykuo, è se lu ɛ leenen ɛ əbkoy əbtaa nə Feyine, lone Feyin se ghɛsen.

³⁵Lòó giabsen ndɛ ghɛsen se ɛykoŋ nə Christ? Lòó giabsen əmlumchuŋ moo, ngɛkse moo, nəkse moo, jeŋ moo, ketan moo, ɛyfan moo, ɛykuo-a?

³⁶Ke lu kɛn ka nè nyakmen ɛ ŋwaale-Feyine ge: “Ghɛs tiy ɛ ɛyshiɛ ɛykuo kechii kejim bek ghɛn, ɛ́ nyable nɛ̀ ghɛs ka ɛ́ nyable nɛ̀ njiɛ yɛ ɛ́ nduun se sɛɛ.”

³⁷Ɛngaŋ, ghɛsen lu nɛ noomen ɛ əbnəə nɛ̂ ghan əbjim é yiɛ chia, ɛ əbtaawe nə wen wɛ əb nè koŋen ghɛsen.

³⁸Mɛ ke se əbluuy ge kefaa wiy kɛ lòó ke giabsen ghɛsen ghɛsen se ɛykoŋ nə Feyine, kene lu ɛykuo, kene lu ɛychii, kene lu nchiyse-ndaa nə Feyine, kene lu kediak ɛyfim, kene əbnəə wɛ́ leenene, kene wɛ əb bɛɛyen se gwiy, kene lu ɛynkii əbtaawe əbkɛ,

³⁹kene mbi yɛ ɛy luun ɛ ɛyyio, kene yɛ ɛy luun ɛ ntiɛ vəəy. Kefaa wiy kɛ ɛ́ nè bomen ɛ mbi kɛ lòó ke giabsen ghɛsen se ɛykoŋ nə Feyine yɛ əb nè dinen se ghɛsen chia əbghun nə Báàba ə wɛsen Jesus Christ.