Read Oku Lûm 9 Bible Online

Lûm 9 - Oku bible

Lûm 9

¹Kenəə kɛ mɛ súúy kin lu se əbluuy, nɛ mɛ súùy ka wel wɛ əb foon ɛytem se Christ, nɛ mɛ báà se yia nɛ lu əbbuam. Keyioy Kelanene ɛ mɛ ɛyteme dine ge mɛ suuy əbluuy.

²Mɛ soo ketuu se ŋaŋ, nɛ ɛytem ə yome ki nkwaatese naa se ɛydio

³bek ghone-ɛnoo ghom, ghel ghɛ luun ghel ɛylak nə mɛ. Lòó mɛ yɛ koŋ se yɛ lu wel wɛ Feyine jumenmen, Christ kô gese fəyse se wene məm bek ghene.

⁴Ghene lu ghele Islael, ghel ghɛ Feyine nè choken è gwiy so ge yɛ lu ghon ə ghi, ɛ́ yɛ ki ɛyjof yɛ yi kiin. Əb nè lô lek kelek ə wen se ghene è gese fo ɛysak se ghene, è nɛɛy ge ghene yɛ kokse wen, è gese lɛm ɛykak ghene ghene.

⁵Ghene lu ghone ɛykfəə nə ghe Ablaham ghɛ ɛbaa ghene ɛməə. Ɛ́ nè bii Christ se wene ngeŋ nɛ lu ɛykfəə nɛ̂ fɛn. Ɛ́ yɛ kokse Feyin, əb lu ketuu se əbjime, əbliy əbjim. Amen.

⁶Mɛ báà se suuy ge kenəə kɛ Feyine nè kaken bo bɛy wiy se liɛ kelik; bek ge báà me se lu ghel ghɛ ɛ́ biin ɛ Islael ghɛ luun ghele Feyin.

⁷Nɛ báà me se lu ghon ghɛ ɛ́ biin ɛykfəə nə Ablaham ghɛ luun ghel ɛykfəə nə wen. Feyine nè lômen suuy se Ablaham ge: “Lu Ayzek wɛ əb yî bii ɛykfəə ə yiɛ.”

⁸Kii nɛ̂ kine me se dine ge ghon ghɛ ɛ́ biin ɛ jii yɛ ghele biin ghon ɛ ten wiy ghon ə Feyin; nɛ ghon ghɛ ɛ́ biin ka Feyine nè kaken me lu ghon ə Feyin.

⁹Nɛ lɛɛ kenəə kɛ Feyine nè kaken, əb nè suuy ge: “Mɛ nɛ̂y kase fiile ɛ keleŋe əbliy ghan é Sala bii wán əbluumen.”

¹⁰Báà se lu kɛn kii nɛ̂ kine, Labika nè lô bii ghon ghɛ́ baa ɛluumen ghene wel əbmok, Ayzek wɛ nè luun ba-ɛykfəə nə ghɛsen wɛ̂ mbiy əblee.

¹¹Nè lu nɛ ɛ́ chèmè nè bɛɛy ghàà bii ghon ghi, nɛ ghene chèmè bɛɛy ghàà yɛ lu wɛ nɛɛy kenəə kejuŋe kene kebee, Feyine suuy kenəə se no ə ghen nɛ ke dine ge ɛychok yɛ əb yî chok ghel wiy bek kenəə kɛ ɛ́ nɛɛy.

¹²Kenəə kɛ Feyine nè suuyen se Labika nè lu ge: “Wane wɛ̂ mbiye yî yɛ fɛl se ɛybame wene.”

¹³Ke kwɛn ka ɛ́ nyaken ɛ ŋwaale-Feyin ge: “Mɛ nè koŋe Jakob, bane Esau.”

¹⁴Ghɛsen lɛ lòó ɛ́ suuy gee ghɛ ɛ leenen, ge Feyine dine əmndun-ndun-a? Ke báà se lu di.

¹⁵Feyine nè suuy se Moses ge: “Mɛ nɛ̂y koosen ɛysen se ghel ghɛ mɛ koŋen se koosen ɛysen se ghene, è cham ɛysen se ghel ghɛ mɛ koŋen se cham ɛysene ghen.”

¹⁶Ke me se lu nɛ Feyine nɛɛy kenəə nɛ wiy ɛ jii yɛ wele kɛŋen, gese wiy ge wel sɛ nɛɛy ghɛ-a? Feyine nɛɛy əbnəə bek ɛykoosen ɛysen nə wen se ghele.

¹⁷Ŋwaale-Feyine dine ka Feyine nè suuy se Fɛlao ge: “Mɛ nè nɛɛy ge wɛ̀ yɛ lu əbfon se dine əbtaawe wom, ka ghele keele è ndu ɛ mbi fɛn ɛyjim ɛynkii wel wɛ luun mɛ.”

¹⁸Ke me se lu ge Feyine lóò əb koosen ɛysen se naa ndɛ wɛ əb koosen se wen, əb nɛɛy naa ndɛ yɛ taa ketuu wɛ əb yɛnen ge əb nɛɛy é əb yɛ taa ketuu.

¹⁹Mɛ ke ge lòó wel se ghɛn me yɛ lu se bif se mɛ ge: Ke lɛ lu dî é Feyine bo gham wel se nkan-a? Wel lɛ lu wɛ lòó əb nɛɛy ndun se ka Feyine kɛŋen-a?

²⁰Lòó wɛ̀ wɛ wele-mesoŋ yɛ bif se Feyine dî ge lu wɛ̀ ndɛ? Lɛ lòó ɛ́ bom kefaa é ke yɛ bif se wel wɛ əb bomen ge, lu bek ghɛ wɛ wɛ̀ bomen mɛ ɛ jii ghan-a?

²¹Wel wɛ əb bómmen ntonse lɛ ki wiy əbtaawe se nɛɛy ka əb kɛŋen nɛ̀ kechake-a? Lɛ lòó əb jia liɛ ntuke kechak è gianen è bom kefaa kɛ yɛ fɛl əbnəə əbtaa so, è mɛyse kembɛke è bom kefaa kɛ ɛ́ yɛ fɛl əbnəə wɛ́ nchɛke nchɛke so-a?

²²Feyine lɛ loo kɛŋ se din ɛyyafse ɛytem nə wen se nɛɛy ge əbtaawe wene yɛnsen, è kase yɛn ge yi kul ɛytem naa se ŋaŋ kum ghel ghɛ əb kɛŋen se mɛyse mɛysen ka ɛyyafse ɛytem nə wene yɛsen, fene əb lɛ ki wiy kediak se nɛɛy di-a?

²³Ka ke luun dî é Feyine jia me səs səsen njuŋ ə wen se ghel ghɛ əb nè siysen ge yi yî koosen ɛysen è fo njuŋ se ghene-a?

²⁴Ghel nɛ̂ ghine dî lu ghɛsen ghɛ əb nè jaŋenmen, nɛ wiy kɛn ɛ məm nə ghele Juus, nɛ lu sɛ̂y ɛ məm nə ghel əbtume.

²⁵Ke lu kɛn ghɛɛ-ghɛɛ ka Feyine nè suuyen Hosea nyak ge: “Mɛ nɛ̂y yɛ toŋte ghii ghɛ́ ne baa yi se lu ghele ghom, ge ghele ghom è gese yɛ toŋte ketum ki kɛ mɛ nè baa yî se koŋe ke ghene se nkan ge kɛ mɛ koŋen.

²⁶Ɛ́ yî yɛ lu ɛ kelik kɛ ɛ́ nè suuyen se ghele ge: Ghɛne báà se lu ghel ə ghom, é ɛ́ toŋe ghene ge: Ghon ə Feyin Fɛ Fe chiin.”

²⁷Wele ntum nə Feyine wɛ Ezaya nè lômene jaŋe suuy kum kenəə Islael ge: “Chèmè lu ka ghele Islael dion ka kesɛsɛye lu əbghooy jio ɛyghuy, nɛ yî boy kɛn ghel se ɛylaay,”

²⁸bek ka Báàba shiin se sake ketuu ntiɛ chikiy chikiy.

²⁹Nɛ wele ntum wɛ Ezaya nè gese suuy ge: “Báà buu ka Báàba Wɛ Ba-Əbtaawe-Əbjim nè vəsen ghon se ghɛsen fene ghɛsen se shi kɛn ka Sodom ghene Gomolla nè luun.”

³⁰Lɛ lòó ghɛsen suuy gee ghɛ ɛ leenen, ge əbtum wɛ əb nè wiyen ɛ titiy ɛ ɛyshiɛ nə Feyine shi ɛ titiy ɛ ɛyshiɛ nə Feyine ɛ leenen bek ɛytem yɛ ghene foon se Feyine,

³¹nɛ ghele Islael ghɛ ghene nè kiin ɛysak yɛ ɛy dinen ka ghele yɛ lu ɛ titiy, báà koke fəy se yɛ lu ɛ titiy moo?

³²Ghɛy ka ke luun bek ge ghene báà se kɛŋe se fo nɛ lu ɛytem se Feyine ka ɛ́ yɛ lu ɛ titiy. Ghene nè kɛŋe ge ɛ́ yɛ nɛɛy nɛ lu əbnəə əbjuŋe ka ɛ́ yɛ lu ɛ titiy, è loo nɛɛy dì è me diamten ɛ ɛytiy yɛ ghele diamten ɛ ten.

³³Ke lu dî kɛn ka ɛ́ nè nyakenmen ɛ ŋwaale-Feyin ge: Yɛn ka mɛ tomen ɛytiy ɛ Zion, yɛ ɛy nɛɛyen nɛ ghele diamtene, lu ɛyghok yɛ ɛy nɛɛyen nɛ ghele fɛykee. Dî nɛ naa ndɛ wɛ əb samsen se wen lu nɛ əb jia yî ghuumen se nkan.