Read Oku 1Kl 1 Bible Online

1Kl 1 - Oku bible

1Kl 1

¹Ŋwaale yin lòò se mɛ Bool; nè chok Feyine mɛ ka əb nè koŋen, ge mɛ yɛ lu wele ntum nə Jesus Christ. Nyake ghɛse wan-no ə wɛsene Sostenes.

²Ghɛse nyake se ghɛn ghɛ kenchintene ghel ə Feyin ɛ Kolɛn, ghɛn ghì ghɛ Feyine nè chokenmen è lɛm ge ghel ə ghí ɛlanene, bek ka ghɛn shiin kefaa kemok ghɛne ghe Jesus Christ. Ɛy nduu sɛy se ghel ɛjime naa ghááy ghaa ɛ́ koksen Báàba ə wɛsen Jesus Christ. Əb lu Báàba wɛsen ko gese lu sɛy wɛ̂ ghen.

³Feyin wɛ Ba ə wɛsen ghene Báàba Jesus Christ ko cham ɛysen ə yɛn, è gese nɛɛy é ghɛn yɛ ki ɛytem ɛyzəətene.

⁴Mɛ lóó mɛ yɛ bɛɛlè kɛn Feyin bɛ̀ɛ̀len bek ghɛn ka əb chammenmen ɛysene yɛn bek ɛylu ə yɛne ghe Jesus Christ.

⁵Nɛ lu bek kii nɛ̂ kine wɛ ghɛn kiilenmen əbghaake jii sejim, ghɛne me se ki giɛ ɛyjuŋ, gese tofe naa kejuŋ.

⁶Kii nɛ̂ kine dine se əbluuy ge kenəə kɛ ghɛs nè suuyen se ghɛn kum Jesus Christ lu nè ke loote yiɛte əbghun se ghene məm.

⁷Ghɛne me se lu ɛ leenen bo tane wiy fomɛ əbkɛ wɛ Keyioy ə Feyine foon ka ghɛne chiyten nɛ̀ shii se yɛne Báàba ə wɛsen Jesus Christ.

⁸Əb nɛ̂y toknen nɛ̀ ghɛn, è ndu è chin se kenləysen ka ghɛne jia yɛ ki ɛygham ɛ əbliy wɛ Báàba wɛsen Jesus Christe kase gwiyen.

⁹Feyine buu wiy se nɛɛy kenəə kɛ əb kaken. Lu wen wɛ əb nè choken ghɛn ge ghɛn yɛ lu kefaa kemok ghɛne ghe wan ə wene Jesus Christ, Báàba ə wɛsen.

¹⁰Ghone-nyii, mɛ lone ghɛn ɛ ɛyghel nə Báàba ə wɛsen Jesus Christ ge ghɛn yɛ lu se əbchio əbmok, wiy ɛgiabsen. Ghɛn yɛ ki ɛykwaate ɛymok gese nɛɛye əbnəə se kenəə kemok.

¹¹Mɛ lone lɛ ɛ ghone-nyii bek ge ghel ɛyshaa ndaa nə Kloe ɛlee suuymen san ge əbchio lu ɛ ghɛne məm.

¹²Kenəə kɛ mɛ suuyen lu ge, ghɛn ɛlee suuye ge: Mɛ tiy kome ghɛse Bool, nɛ ɛlee suuye ge: Mɛ tiy kome ghɛse Abollos, nɛ ɛlee suuye ge: Mɛ tiy kome ghɛse Bita, nɛ ɛlee suuye ge: Mɛ tiy kome ghɛse Jesus Christ.

¹³Christ lu əbgiabsen-a? Ɛ́ nè bante nɛ lu Bool ɛ kentam bek ghɛn-a, moo ɛ́ fó moo se ghɛn ɛ ɛyghel nə Bool-a?

¹⁴Mɛ saŋle ge mɛ nè báà yi fo moo se wel ɛ ghɛne məm buu kɛn ka mɛ nè foon se Klisbus ghene Gaius,

¹⁵fɛ wel yɛ suuy ge mɛ fo moo se yi ɛyghel nə mɛ.

¹⁶Mɛ nè lô fo sɛy moo se Stefanas ghene ɛyshaa ndaa nə wene, buu ghel nɛ̂ ghin fene mɛ bo kuume wiy ge mɛ nè lô fo moo se wel.

¹⁷Jesus Christ di nè baa tum mɛ ge mɛ gwiy, è yɛ foo nɛ lu moo, əb nè tum ge mɛ gwiy, è yɛ fekte nɛ lu sakghɛ əbjuŋ, è chèmè jia yɛ fekte nɛ̀ ɛytof yɛ luun yɛ́ wele-mesoŋe fɛ əbtaawe ɛykuo nə wen ɛ kentam lɛy se lólò.

¹⁸Mɛ ke ge sakghɛ wɛ kum ɛykuo Jesuse ɛ kentam lu kenəə keyume se ghel ghɛ ɛ́ lɛyen lɛyen, dî nɛ se ghɛsen ghɛ ɛ́ boyen boyen nɛ lu kediak ə Feyin.

¹⁹Ɛ́ nyak ɛ ŋwaale Feyin ge: Mɛ́ nɛ̂y bvəŋse ɛytof ə ghel ghɛ ɛ́ kwaaten ge ɛ́ tofe, mɛ́ nɛ̂y jefse əbfee ghen.

²⁰Wel əbfeesen waay? Ndinte tesak waay? Wel wɛ əb keen se beke mbek ɛ mbi fɛn waay? Feyine dinmen ge əbfee wɛ̂ mbi fɛne lu kengoo kenəə.

²¹Feyine nè lô keele nɛ̀ ɛytof ə wene ge ghele ghɛ́ mbi fɛne jia yî keele yi nɛ̀ ɛytof yɛ yɛ́ ghene, è me liɛ sakghɛ wɛ ghɛs nè fekten nɛ ghele yɛne ge kengoo kenəə, è boyse ghel ghɛ ɛ́ beemen so.

²²Ghele Juuse kɛŋe ge ɛ́ yɛ din nɛ lu əbnəə əbchio əbyúméné se ghene, nɛ ghele Glees kɛŋe kɛ́ ghene nɛ lu əbfee,

²³dî nɛ ghɛs fekte kɛse nɛ lu ɛybante yɛ ɛ́ nè banten Jesus Christ ɛ kentam. Ghele Juus yio, ke yaf ghene yafen, ghel əbtume yio, ɛ́ suuy ge lu kengoo kenəə.

²⁴Dî nɛ lu se ghel ghɛ Feyine chokenmen, kene lu ghɛ́ Juuse, kene lu ghel əbtume fene ghene beeme ge Christ lu kediak ə Feyin nɛ gese lu əbfee ə Feyin.

²⁵Ke lu dî bek ge Kenəə kɛ Feyine nɛ̀ɛ̀yen ghele se yɛne ge lu kengoo kenəə lu nɛ ɛytofe lu ɛ ten chia yɛ́ wele, nɛ kenəə kɛ Feyine nɛ̀ɛ̀yen ghele se yɛne ge lu kemboole kenəə, lu nɛ kediake lu ɛ ten chia kɛ́ wele.

²⁶Ghɛn kuume ɛynkii ghel ghɛ ghɛn nɛ̀ luun ɛghene ghone-nyii, əbliy wɛ Feyine nè liɛn ghɛn ka ghel ə wen. Lu ɛ jii yɛ mbi yine liɛn əbnəə ɛ ten nɛ ghele nè baa se feesene ɛ ghɛne məm se ɛydio, taa wiy se ɛydio, gese wiy ghele tekfəə tetaa se ɛydio.

²⁷Dî nɛ Feyine nè chok nɛ lu ghel ghɛ mbi yine yɛ́nen ge lu əbngoo, ka əb choksen ghel ɛfeesene, è chok nɛ lu ghel ɛbole ka əb choksen ghel ɛtaa.

²⁸Əb nè chok nɛ lu əbfua wɛ́ nchɛke wɛ ghele mbi yɛ́nen ge lu lólò, ka əb mɛyse vii wɛ ghene liɛn ge lu nkante əbfua.

²⁹Ke lu dî se nɛɛy ge wele-mesoŋe jia yɛ ghaŋse əbghun ɛ ɛyshiɛ nə Feyine.

³⁰Lu Feyin wɛ əb nè nɛɛyen ghɛsen nɛ̀ ghe Christ Jesus chinten è se lu kefaa kemok. Jesus Christ me se lu əbfee Feyin wɛ əb gwiyen se ghɛsen è nɛɛy ge ghɛsen yɛ lu ɛ titiy ghɛsen nɛ̀ Feyine. Əb nɛɛymen ghɛsen se lu ghel ɛlanene, gese lu ghel ghɛ əb tenenmen se lòn.

³¹Di ghɛy kenəə kɛ ŋwaale-Feyine suuyen ge: Ndiale ndɛ əb yɛ ndial nɛ lu ɛ kenəə kɛ nɛɛyen Báàba.