Read Oku 1Kl 10 Bible Online

1Kl 10 - Oku bible

1Kl 10

¹Mɛ kɛŋe ghone-nyii ge ghɛn kuume ka ɛbaa ɛbaa ə ghɛsen ɛjim nè jɛ́len ɛ ɛyshaa mbàkse, nɛ̀ ka ghene nè chian ɛ məme jio ɛyghuy.

²Ghene ghel ɛjim nè jɛl ɛyshaa mbàkse fo è gese chia ɛ məme jio fo, me se lu ka ghene nè fii nɛ lu moo se yɛ lu ghel ghɛ ɛ́ yion se Moses.

³Ghene ghel ɛjim nè lô yíɛ́ əbfua-əbyíɛ́ne wɛ Feyine nè foon,

⁴è nəə moo mɛ Feyine nè foon. Ghene nè nəə moo nɛ̂ min nɛ əm fəye ɛyghok yɛ ɛy nè jɛ́len ghene ghene, nɛ ɛyghok nɛ̂ yine nè lu Christ.

⁵Ka ke chèmè nè luun dì, Feyine nè báà se saŋle kum ghene ɛdione, è yuyte ghene, tegvən ə ghene nyimten ndu əbkwak əbjim.

⁶Əbnəə nɛ̂ vin wɛ əb nè kooyen se ghene shi əbchəyte se ghɛsen, fɛ ghɛsen yɛ koŋ əbnəə əbbee ka ghene.

⁷Ghàà ghɛn yɛ kokse əmnyin ka ghene ɛlee nɛ̀ koksen, kɛn ka ŋwaale-Feyine súùy ge: “Ghele tene nè diome, yiɛ, nəə, loole bine se kokse əmnyin.”

⁸Ke fɛ́ ghɛsen yɛ jaŋe kenjaŋ ka ghene ɛlee nè jaŋen, ghene ɛlee nɛy sasen kuo nkam njio-setal əmbaa kechii kemok.

⁹Ke fɛ́ ghɛsen yɛ mome Báàba ka ghene ɛlee nè momen, yiose tiɛ ghene ɛ́ kuote.

¹⁰Ke fɛ́ ghɛsen yɛ vək ka ghene ɛlee nè vəken, Feyine me tum Nchiy-ndaa Nyuy-wel nə wen ɛy mɛyse ghene.

¹¹Əbnəə nɛ̂ vin nè kooy se ghene ɛ jii nɛ̂ ghan ka əbchəyte, ɛ́ me nyak se ŋwaale ka ntef se ghɛsen ghɛ ɛ́ se baksen se əbliy wɛ ntiɛ mɛy ɛ ten.

¹²Ke me se lu ge naa ndɛ wɛ əb kwaaten ge yi tiy ketaan yɛ toknen fɛ əb sɛy me fɛy fɛyen.

¹³Ɛymomse wiy yɛ ɛy gwiyenmen se ghɛn yɛ ɛy nè bɛɛy ghàà gwiy se wel. Feyine lɛme ɛykak ə wen nɛ lòó əb jia vəse ge ɛymomse gwiy se ghɛn yɛ ɛy taan chian ghɛn. Nɛ loo lu əbliy wɛ ɛymomse gwiyen se ghɛn é Feyine din jii yɛ ghɛne chia è boy se ten.

¹⁴Ke me se lu ghone-nyii ɛjuŋe ge ghɛn lɛk se ɛybam ɛykokse əmnyin.

¹⁵Mɛ suŋnen se ghɛn ka ghel ghɛ ɛ́ kiin ɛytof. Ghɛn kaake se ghɛne ngeŋse ge kenəə kɛ mɛ suuyen sɛ wiy ɛ titiy-a?

¹⁶Əbbom əmnduk wɛ ghɛsen lóó ɛ́ liɛ è bɛ̀ɛ̀le Feyin è yɛ nəə əbliye nchinten lu jii yɛ ɛy dinen ge əmnduŋ mə Christ chintenmen ghɛsen se kefaa kemok. Keban kɛ ghɛsen lóó ɛ́ bɛkte è yiɛ, lu jii yɛ ɛy dinen ge əbghun ə Christ chintenmen ghɛsen se kefaa kemok.

¹⁷Ke lu dî bek ge kebane loo ke yɛ lu kemok nɛ ghɛsen se ɛydio chinten ɛ ketuu keban kɛ kemok nɛ̂ kin se din ge ghɛsen lu əbghun əbmok.

¹⁸Ghɛn kuume jii yɛ ghele Islaele nɛɛyen əbnəə ɛ ten. Ghene gwiy è chinten è yiɛ ntaŋle, yɛ lu nɛ ghene shi kefaa kemok ɛ ketatan.

¹⁹Mɛ suuy kine ke din gee ghɛ ɛ leenen? Ge njemte əmnyin lu kenəə se nkan-a, moo ge əmnyin nɛ̂ min lu kenəə kelee-a?

²⁰Ɛngaŋ, kenəə kɛ mɛ suuyen lu ge, ntaŋle yɛ ghel ghɛ ɛ́ báà beeme Feyine foon lu nɛ ghene foo se ɛyfime nɛ wiy se Feyine. Mɛ báà se kɛŋe ge ghɛne ghe ɛyfime yɛ chinten.

²¹Lòó ghɛn jia yɛ nəə əbbom ə Báàba gese nəə wɛ́ ɛyfime. Lòó ghɛn jia yɛ diome yiɛ ghɛne ghe Báàba kase diom yiɛ ghɛne ghe ɛyfime.

²²Ghɛsen chèmè kɛŋe se dine kembàŋ-ɛyshiɛ se Báàba-a? Ghɛsen taa chia wen-a?

²³Lòó wel suuy ge: Mɛ ki əbtaawe se nɛɛy naa ghɛ. Dî nɛ wel nɛ̂ vi yɛ ke ge báà se lu əbnəə əbjim wɛ əb giamten. Lòó wel suuy ge: Mɛ ki əbtaawe se nɛɛy naa ghɛ, dî nɛ wel nɛ̂ vi yɛ ke ge báà se lu əbnəə əbjim wɛ əb lóó əb baklé wel.

²⁴Ghàà wel yɛ diy kɛn ketuu ə wen, wel yɛ diye ketuu wan-no ə wen.

²⁵Ghɛn loo yiɛ mbase nyam ɛykɛ yɛ ɛ́ lòòn so əbwɛy ghàà ghɛn yɛ bife kenəə fɛ ɛytem ə wele yɛ́ foo ngɛk se wen.

²⁶Bek ge ŋwaale-Feyin suuymen ge: Ntiɛ yin lu yɛ̂ Feyin nɛ̀ əbfua wɛ əb luun ɛ ten əbjim.

²⁷Loo lu wel wɛ əb báà beeme Feyine jaŋ wɛ̀ ge wɛ̀ gwiy é ɛ́ yiɛ, wɛ̀ ndu, yɛ jof ge wɛ̀ yiɛ naa ghɛ kɛ ɛ́ foon se wɛ̀, bife wiy kenəə fɛ ɛytem ə yiɛ yɛ foo ngɛk se wɛ̀.

²⁸Yɛ lu wɛ wel suuy ge ɛ́ nè taŋlemen ntaŋle so, wɛ̀ yɛ ke se yiɛ bek wel wɛ əb kè suuyen kenəə ten se wɛ̀ gese bek ɛytem yɛ ɛy yɛ sake wel.

²⁹Mɛ suuye nɛ lu ɛytem ə wel wɛ əb kè suuyen kenəə ten se wɛ̀ nɛ wiy yíɛ́. Lòó wel əblee bif ge: Lɛ lòó mɛ me buu se nɛɛy naa ghɛ kɛ mɛ kiin əbtaawe se nɛɛy kɛn fɛ ɛytem ə wel əblee báà yɛ sake wen-a?

³⁰Mɛ bɛ́ɛ̀lè Feyin se əbfua-əbyíɛ́ne è loo yiɛ é wel yɛ ghame mɛ se ghɛ?

³¹Ke me se lu ge kene wɛ̀ yiɛ-yiɛn, kene wɛ̀ nəə-nəən, naa ghɛ kɛ wɛ̀ nɛɛyen, yɛɛ nɛɛy kejim se yɛ foo ɛykokse se Feyine.

³²Ghɛn yɛ chii ɛ jii yɛ ghɛne jia nɛɛy ge ghele Juuse, kene ghel əbtume, kene kenchintene ghel ə Feyine diamten.

³³Mɛɛ mɛ lóó mɛ yɛ mom ge wel əbjim yɛ lu kejuŋ ɛ əbnəə əbjim wɛ mɛ nɛɛyen, diye wiy nɛ lu ketuu ə kom, diye nɛ lu kɛ́ ghel ɛdione ge ghene sɛ náà boy-a.