Read Oku 1Kl 11 Bible Online

1Kl 11 - Oku bible

1Kl 11

¹Ghɛn beknen mɛ ghɛɛ-ghɛɛ ka mɛ beknen Christ.

²Mɛ bente ghɛn ka ghɛne kuume mɛ əbliy əbjim, nɛɛy əbnəə kɛn ghɛɛ-ghɛɛ ka mɛ nè dinten.

³Mɛ me se kɛŋe ge ghɛn keele ge Christ lu ketuu se əbluumen əbjim, nɛ əbluumen lu ketuu se wiy ə wen, nɛ Feyine me lu ketuu se Christ.

⁴Ke me se lu ge əbluumen loo jem, kene əb teefe ntum ə Feyin nɛ̀ əb chite ketuu fene əb choksen Christ wɛ luun ketuu se wen.

⁵Dî nɛ əbvii loo jem, kene əb teefe ntum ə Feyin nɛ əb báà chite ketuu ə wen fene əb choksen lum ə wen. Əb nɛɛy dì, fene əb lu ka əbvii wɛ ɛ́ komen ketuu komen.

⁶Loo lu əbvii jia chite ketuu ə wen, əb kuu kuun. Lòó yɛ lu kenəə kenchoksen se əbvii se kome ketuu. Ke lu kejuŋ ge əb yɛ chite.

⁷Se əbluumen lu nɛ əb báà se lu se chite ketuu ə wen ɛ əbliy wɛ əb koksen Feyin bek ge Feyin nè bom wen ge əb yɛ fuosene yi, gese dine ɛyjofe yi, dî nɛ əbvii dine ɛyjofe əbluumen.

⁸Ke lu dî bek ge, Feyine nè báà liɛ ɛybee əbghun nə əbvii, è bom əbluumen so. Əb sɛ́y nè liɛ yɛ́ əbluumene, è bom əbvii,

⁹ghɛɛ-ghɛɛ ka əb nè báà bom əbluumen bek əbvii dî è bom əbvii bek əbluumen.

¹⁰Lu bek kii nɛ̂ kine kɛ əbvii tiyen se yɛ chite ketuu ə wen se din ge əb lu ɛyshaa ɛysak nə lum ə wen bek ka nchiyse-ndaa nə Feyine kiyen wen.

¹¹Ka ke chèmè luun dì, se ghɛsen ghɛ ɛ́ beemen se Báàba, əbvii báà se tiy kɛn se wen ə ngeŋ, nɛ̀ əbluumen tiy wiy sɛy se wen ə ngeŋ.

¹²Ke lu dî bek ka əbvii nè lòòn ɛ əbluumen əbghun, əbluumene ko se lu nɛ bii əbvii, nɛ nè bom Feyin əbfua əbjim.

¹³Ghɛn kaake se ghɛne ngeŋse ge ke lɛ lu ɛ titiy ge əbvii yɛ jem nɛ əb báà chite ketuu ə wen-a?

¹⁴Ke lɛ baa se keke ndan ge lu kenəə kenchoksen se əbluumen se tiyse ketuu-a?

¹⁵Dî nɛ lu se əbvii nɛ nəŋse ketuu nə wene lòò è yɛ diafke fene lu kefaa ɛyndial nə wen bek ka Feyine nè foon nəŋse ketuu ge se yɛ chite wen.

¹⁶Dî nɛ wel lòò è yɛ kɛŋ se yɛ lose mbek kum kenəə kin, é mɛ suuy ge ghɛs nɛ̀ ghele əbnchinten nə Feyine əbjime báà gese se ki kenəə kelee se suuy ɛ kenəə fɛn.

¹⁷Dî nɛ lu se əbnəə wɛ mɛ kɛŋen se suuy nɛ mɛ jia bente ghɛn bek ge ghɛne konen se kokse Feyin, ɛ́ yɛ bese əbnəə besen, nɛyte wiy nɛyten.

¹⁸Kenəə kɛ mɛ kɛɛte è suuy lu kɛ mɛ yion ge, ghɛne konen ka ghel ə Feyin, əbngiabsene yɛ lu ɛ ghɛne məm, nɛ mɛ ko beeme ge lu əbluuy.

¹⁹Dî nɛ əbngiabsene ko kè lu se yɛ lu ɛ ghɛne məm ka lòó ɛ́ yɛ keele nkante ghel ghɛ ɛ́ tiyen ketaan ɛybeeme.

²⁰Ghɛne chinten se yɛ yiɛ, ndee sɛne yɛ din ge ghɛn bo yiɛ wiy nɛ lu əbfua-əbyíɛ́ne nə Báàba,

²¹bek ge ghɛne loo yiɛ, wel me yɛ noo kɛn nɛ̀ ketuu ə wene chiyte wiy əblee. Loo lu dì, ghel ɛlee yɛ lu se jeŋ nɛ ɛlee nəə əmnduk əb koo.

²²Ghɛne báà se ki ndaa ə sɛn bene fɛ lòó ghɛn yɛ yiɛ gese nəə-a? Moo ghɛne kɛŋe se yɛ kiye ghel ə Feyin lolo, choksen ghɛ́ ketane-a? Lòó mɛ suuy gee ghɛ se ghɛn? Ghɛne kɛŋe ge mɛ bente ghɛn-a? Ɛngaŋ lòó mɛ jia mom.

²³Əbnəə wɛ mɛ nè dinten se ghɛn lu nɛ nè suuy Báàba se mɛ. Nè lu ɛ ntək wɛ ɛ́ nè feenen Báàba Jesus, əb liɛ keban,

²⁴è bɛ̀ɛ̀lè Feyin, è bɛkte, è suuy ge: Kine lu əbghun ə wom wɛ mɛ foon se ghɛn. Ghɛne yese ghɛn yɛ nɛɛy lɛ se yɛ kuume mɛ.

²⁵Ɛ́ yiɛ è mɛyse, əb liɛ sɛy əbbom əmnduk è suuy ge: Əbbom vine lu kelek kefɛɛ kɛ kum əmnduŋme mom. Ghɛne yɛ loo nəə naa ɛ leghɛ, ghɛn yɛ kuume mɛ.

²⁶Kine dine ge naa ɛ leghɛ wɛ ghɛne yiɛn keban kin, è nəə əbbom nɛ̂ vin lu nɛ ghɛne fekte ɛykuo Báàba se chin se əbliy wɛ əb yî kase fiile.

²⁷Ke me se lu ge naa ndɛ wɛ əb yiɛn keban kin kene əb nəə əbbom ə Báàba se nchɛk lu nɛ njio lu ɛ wen ə keghoo ge əb nɛɛy mbee se əbghune ghene əmnduŋ mə Báàba.

²⁸Wel lu se kaake ngeŋ ə wen se geese yiɛ keban nɛ̂ kin, se gese se nəə əbbom nɛ̂ vin.

²⁹Bek ge naa ndɛ wɛ əb yiɛn gese nəən nɛ əb baa se ke ge kii nɛ̂ kene sɛ dine ghɛ kum əbghun ə Báàba, liɛ lòn se wen ə ketuu.

³⁰Ghɛy kenəə kɛ ke nɛɛyen, ghel ɛdione ɛ ghɛne məm sɛ́nen è se yafkee, nɛ ɛlee kuokemen.

³¹Ghɛsen loo lu è loote kaake ngeŋ ə sɛsen, é Feyine jia nɛ̂y bo sak ghɛsen.

³²Feyine loo sake ghɛsen, yɛ lu nɛ əb tiyse ghɛsen tiysen bek ge əb báà se koŋe se nɛ̂y se loo make lòn se ghele ghɛ́ mbi fɛne se chintene ghɛsen se ghene əbghun.

³³Ke me se lu ɛ ghone-nyii ge, ghɛne yɛ konen se yɛ yiɛ əbfua-əbyíɛ́ne nə Báàba, ghɛn chiyte ghel ɛlee.

³⁴Jeŋ lòò è yɛ yafe wel, əb yiɛ ɛ ndaa, fɛ ɛ́ gwiy ɛ konen è sɛy kiile nɛ lu lòn. Lu se əbnəə əblee nɛ mɛ nɛ̂y gwiy se geese tiyse.