Read Oku 1Kl 12 Bible Online

1Kl 12 - Oku bible

1Kl 12

¹Ghone-nyii, mɛ kɛŋe se suŋnen se ghɛn ɛ leenen kum fomɛ sɛ Keyioy Kelanene fóon se ghele. Mɛ báà se kɛŋe ge ghɛn yɛ lu se nchɛk.

²Kéné ghɛn ke ge nè lu əbliy wɛ ghɛn nè bɛɛyen nɛ ɛ́ bɛɛy ghaa beeme Feyin ɛ́ lɛɛse ghɛn se kokse əbfua nɛ əb ki wiy keyioy.

³Mɛ me se kɛŋe ge ghɛn keele ge, wel wiy wɛ toknen nɛ Keyioy Feyine wɛ lòó əb tɛy Jesus tɛyen, nɛ wel wɛ əb suŋnen ɛ əbtaawe nə Keyioy Feyine lòó əb jia suuy ge: Jesus lu Báàba, nɛ báà nɛɛy Keyioy ə Feyin ge əb suuy dì.

⁴Fomɛse lu tenkii tenkii, nɛ foo kɛn Keyioy kemok,

⁵nɛ tefɛle ghele Christe lu tenkii tenkii, nɛ ɛ́ fɛle kɛn se Báàba əbmok.

⁶Ghele fɛle əbnəə ɛ jiise jiise, dî nɛ foo kɛn Feyin əbtaawe se ghel ɛjime.

⁷Keyioy ə Feyine fɛle ɛ wel əbjim ɛ məm se giamtene wel əbjim.

⁸Keyioy ə Feyine lóó ke fo wel əblee əb yɛ feesen, è ko gese nɛɛy əblee yɛ ke əbnəə naa se ŋaŋ,

⁹è ko nɛɛy wel əblee yɛ foo ɛytem se Feyine, è gese fo wel əblee nɛ̀ əbtaawe nchuke.

¹⁰Keyioy ə Feyine lóó ke fo wel əblee nɛ̀ əbtaawe wɛ yɛ nɛɛye əbnəə əbchio əbyúméné so, è nɛɛy wel əblee yɛ ke se teefe ntum ə Feyin. Əb gese nɛɛy wel əblee yɛ ke se yɛne kenəə se kaake ge ke sɛ lòò se Feyine moo lu əbchio ɛyfim-a. Loo lu əblee, əb nɛɛy əb yɛ suŋnen telam ndun ndun, è nɛɛy wel əblee yɛ yio telam nɛ̂ tin chiase se ghele.

¹¹Əbnəə nɛ̂ vin əbjim lu ɛyfɛl ə Keyioy kemok, nɛ foo wen yɛ́ wel yɛ jii ka əb koŋen.

¹²Əbghune lu kefaa kemok, chèmè lu ka əblik əbghune luun se ɛydio, lu nɛ ə́b chinten è se lu əbghun əbmok. Lu ghɛɛ-ghɛɛ ka kenchintene ghele Christe luun.

¹³Ghɛsen lu ghel ndun ndun, nɛ ɛlee lu ghele Juus, nɛ ɛlee lu ghel əbtum, nɛ ɛlee lu əbkos, nɛ ɛlee lu se ghene ngeŋse, dî nɛ lu Keyioy nɛ̂ kin kɛ ghɛsen fiin ɛjim ke chinten ghɛsen se kefaa kemok, nɛ lu keghene kɛ Feyine nè viin se ɛytem nə wel əbjim.

¹⁴Əbghune báà se lu kelik əbghun kemok. Əb ki əblik se ɛydio.

¹⁵Kevəə chèmè lòò è suuy ge: Mɛ báà se lu kelik əbghun kelee bek ka mɛ báà se lu keghoo, é kii nɛ̂ kii jia nɛɛy ge ke buu se yɛ lu kelik əbghun ghɛy.

¹⁶Yɛ́ lu wɛ ge ketuule suuy ge: Mɛ báà se lu kelik əbghun kelee bek ka mɛ báà se lu ɛyshiɛ, é kii nɛ̂ kii jia nɛɛy ge ke buu se yɛ lu kelik əbghun ghɛy.

¹⁷Əbghune əbjime lɛ kè lòò è yɛ lu kɛn ɛyshiɛ, é yɛ yio ghɛ əbnəə? Əb lòò è yɛ lu kɛn ketuule, é yɛ yio ghɛ keləme kefaa?

¹⁸Dî nɛ Feyine nè siyse əblik əbghun nə wel è lɛm kɛn ɛ jii yɛ əb nè yɛnen ge əb yɛ́ lu ɛ ten.

¹⁹Əbghun ə wele kè lòò è yɛ lu kelik əbghun kemok, é jia yɛ lu əbghun.

²⁰Ke me se lu ge, ka əblik əbghune luun se ɛydio lu nɛ lu kɛn əbghun əbmok.

²¹Ɛyshiɛ lòó ɛy jia suuy se keghoo ge: Mɛ báà se shii wɛ̀. Nɛ lòó ketuu jia suuy se ɛvəə ge: Mɛ báà se shii ghɛn.

²²Ke sɛy lu ge əblik əbghun əbbole lu wɛ əb luun naa ɛ shii,

²³nɛ əblik wɛ ghɛsen kwaaten ge əb báà se loote ki ɛyvəm lu əbghene wɛ ɛ́ loote toknen so, nɛ əblik əbghun wɛ əb keken wiy kejuŋ lu wɛ ɛ́ loote chiten.

²⁴Nɛ əblik əbghun nə ghɛsen wɛ əb keken kejuŋ shii wiy ge ɛ́ yɛ toknen so se ŋaŋ. Se lu nɛ Feyine nè bom wel, è fo ɛyvəm se əblik əbghun wɛ əb keken se nchɛk,

²⁵ka əbngiabsene jia yɛ lu ɛ wel əbghun, dî ə́b yɛ giɛknen, nɛ kelee toke kelee.

²⁶Kelik əbghun kemoke lòò è yɛ yaf fene əbjime chinten è yɛ yaf, ɛ́ yɛ ngvəmle kelik əbghun kelee, fene əb yɛ́ saŋle əbjim.

²⁷Ghɛn ghel ɛjim lu əbghun ə Christ, nɛ wel se wen ə ngeŋ lu kelik əbghun kelee.

²⁸Lu ɛ kenchintene ghel ə Feyin nɛ əb nè lɛmmen ghel ge ɛ́ yɛ fɛl əbnəə ndun ndun. Əb nè kɛɛte è chok ghɛ́ ntume, è kumte è chok ghele ntum nə Feyine, è me chok ndintese, è chok ghɛ́ ɛynɛɛy əbnəə əbchio əbyúméné, nɛ̀ ghɛ́ nchuke, nɛ̀ ngiamtense, nɛ̀ ghɛ ɛ́ saken ghel gese nɛ̀ ghɛ ɛ́ suŋnen ɛ telam ndun-ndun.

²⁹Baa se lu ghel ɛjim ghɛ́ ntume. Baa se lu ghel ɛjim ghele ntum nə Feyine. Baa se lu ghel ɛjim ndintese. Baa se lu ghele ɛjim ghɛ ɛ́ nɛɛyen əbnəə əbchio əbyúméné.

³⁰Baa se ki ghel ɛjim fomɛ nchuk. Baa se yio wel əbjim əbnəə wɛ ɛ́ suŋnen ɛ telam ndun-ndun.

³¹Ghɛn me yɛ lɛme tetem ə tɛn nɛ lu ɛ fomɛ sɛ se luun ɛ shii. Nɛ mɛ din jii se ghɛn yɛ ɛy chian jii sejim.