Read Oku 1Kl 13 Bible Online

1Kl 13 - Oku bible

1Kl 13

¹Mɛ lòò, è yɛ suŋnen telam, naa gese suŋnen tɛ́ nchiyse-ndaa nə Feyine, dî koŋe wiy ghel, fene mɛ lu ka ngɛ̀m yɛ ɛ́ kumen, kene kekas kɛ ɛ́ buken.

²Mɛ yɛ ki əbtaawe se yɛ teefe ntum ə Feyin, gese loote ke əbnəə naa nɛ̀ wɛ əb luun ɛ kenlete nɛ mɛ gese fo ɛytem se Feyine ɛ jii yɛ lòó mɛ chakse kfənse, dî koŋe wiy ghel, fene mɛ wiy kefaa.

³Mɛ lòò, è gia əbfua ə wom əbjim se ghɛ́ ketane, è chèmè vəse ngeŋ ə yom ge ɛ́ nyok bek kenəə ə Feyin, dî koŋe wiy ghel, fene lu lólò.

⁴Wel wɛ əb koŋen ghel sɛɛ wensen, chɛklee, ghɛke wiy kenghɛk gese ghaŋse wiy əbghun,

⁵taa wiy ketuu. Ɛykoŋe noole wiy kɛn nɛ̀ ngeŋ ə wen, yaŋse yafse wiy ɛytem, gese make wiy nkfəəme.

⁶Wel wɛ əb koŋen ghel sɛɛ jia saŋle kum mbee, dî saŋle kum əbluuy.

⁷Wel wɛ əb koŋen ghel sɛɛ wensen əbnəə əbjim, ki ɛybeeme, chiyte ge əbnəə nɛ̂y yɛ lu əbjuŋ, gese kule ɛytem ɛ əbnəə əbjim.

⁸Ɛykoŋe jia yî buu, dî nɛ ɛyteefe ntum ə Feyine yî mɛy, é kesuŋnen kɛ suŋnen ɛ telam ndun-ndun mɛy, é ɛytofe mɛy.

⁹Ke lu dî bek ka ɛytofe ə yɛ́sene lu kembɛke, nɛ ghɛsen ke wiy se teefe ntum ə Feyin.

¹⁰Dî nɛ ɛ́ náà loo lu əbliy wɛ Feyine nɛɛyen ghɛsen se loote ke əbnəə vin əbjim é wɛ ghɛsen báà se loote ke me mɛy.

¹¹Nè lu əbliy wɛ mɛ nè luun wán, nɛ mɛ suŋnen ka wán, kwaate əbnəə ka wán, yɛne əbnəə ka wán. Mɛ nɛy loo lu se wel, è me maay jiise wan əbtɛlɛ.

¹²Lu ɛ leenen nɛ ghɛsen yɛne əblik lifle lifle ka ɛ́ yɛn ɛ kenkiy, dî nɛ ɛ́ yî loo lu əbliy fo é ghɛsen nɛ̀ Feyine yɛ tiy nɛ̀ ɛykeke nɛ ghɛsen loote yɛne kelanen. Mɛ báà se loote ke əbnəə ɛ leenen nɛ ɛ́ nɛ̂y loo lu əbliy fo, é mɛ loote keele əbnəə əbjim ghɛɛ-ghɛɛ ka Feyine keen mɛ.

¹³Se əbnəə fɛn əbjim, əbnəə lu əbtal wɛ əb yî yɛ yese lu, nɛ əb lu ge: Ɛybeeme, ɛychiyte ɛykak nə Feyine, nɛ̀ ɛykoŋe. Kɛ ke nduun ɛ mbiy lu ɛykoŋ.