Read Oku 1Kl 14 Bible Online

1Kl 14 - Oku bible

1Kl 14

¹Ghɛn loote lɛm ketuu kɛn ɛ ɛykoŋ. Ghɛn lu se yɛ nɛɛye əbnəə wɛ Keyioy ə Feyine fóon, naa ka ɛyfekte kenəə ə Feyin.

²Wel wɛ əb suŋnen ɛ telame suŋnen wiy nɛ lu se ghele, əb suŋnen nɛ lu se Feyine bek ge wel wiy wɛ əb yion kenəə kɛ əb suuyen. Əb fekte nɛ lu əbnəə wɛ əb luun ɛ kenlete nɛ̀ kediake Keyioy Kelanene.

³Dî nɛ wel wɛ əb fekten kenəə ə Feyin suŋnene nɛ lu se ghele, giamten ge ghene yɛ kuy, lumse tetem ə ghen gese chəmsen ghene.

⁴Wel wɛ əb suŋnen ɛ telam tefɛɛ giamtene nɛ lu kɛn ngeŋ wen, dî nɛ wel wɛ əb fekten nɛ lu kenəə ə Feyin giamten nɛ lu kenone ghel ɛbeemene kejim.

⁵Mɛ koŋe ge ghɛn yɛ suŋnen ɛ telam, dî nɛ kè lòó ke yɛ jof ge ghɛn yɛ fekte nɛ lu kenəə ə Feyin. Wel wɛ əb fekten kenəə ə Feyine chia wel wɛ əb suŋnen ɛ telam tefɛɛ, buu ge wel kè lu wɛ əb chiase kenəə kɛ əb suuyen, ka kenone ghel ɛbeemene yɛ ki ɛygiamten.

⁶Ghone-nyii, mɛ lɛ gwiy se ghɛn è yɛ suŋnen nɛ lu ɛ telam tefɛɛ é kii nɛ̂ kii giamten ghɛn ɛ teghɛ, buu ge mɛ dì gwiy nɛ̀ kenəə kɛ Feyine dinen, kene kɛ ke kiin ɛytof, kene kenəə ə Feyin kefektene, kene kedintene.

⁷Chèmè lu əbfua wɛ ɛ́ toŋe toŋen ka ndoŋ ghene ɛyluŋe yɛ buk nɛ əb suŋnen wiy se ngeŋ, lu nɛ giɛse tene fəy nɛ̀ ɛybame, é wel jia bo keele ge ɛ́ sɛ buke nɛ lu ghɛ-a?

⁸Nɛ ɛ́ lòò toŋ ɛyshoŋ ɛyghoŋ nɛ̀ ɛybame, é wel jia bááté se shik ɛyghoŋ.

⁹Lu kɛn ghɛɛ-ghɛɛ ka ke luun se wɛ̀ ɛ lefɛ wɛ̀ suŋnen ɛ telam, suuye kenəə di nɛ ke ki wiy ɛytof nɛ wele jia yio ge wɛ̀ sɛ suuy gee ghɛ-a. Ke loo lu dî fene wɛ̀ suŋnen nɛ lu se əbfiɛfe.

¹⁰Telame lu mbi se ɛydio, dî nɛ əbmoke wiy wɛ ghele keen wiy kenəə kɛ əb suuyen.

¹¹Nɛ mɛ kè lòò è jia yɛ ke kenəə kɛ əblame suŋnen fene mɛ lu ka kengwiy se wel wɛ əb suŋnen əblam nɛ̂ vi, nɛ əb gese lu ka kengwiy se mɛ.

¹²Ka ghɛn se ghɛne ngeŋse koŋen se yɛ nɛɛy əbnəə wɛ Keyioy Feyine giamten ghɛn ge ghɛn yɛ nɛɛy, é ke yɛ jof ge ghɛn yɛ luŋ se yɛ diote nɛɛy nɛ lu wɛ ə́b nɛɛyen nɛ kenone ghel ɛbeemene kuye.

¹³Ke me se lu ge naa ndɛ wɛ əb suŋnen ɛ telam lu se jem se kiile ɛytof yɛ ɛy giamten wen ge əb din se ghele ge lɛɛ kenəə kɛ yi suuyen.

¹⁴Mɛ lòò è yɛ lu ge mɛ yɛ jem ɛ telam fene jeme keyioy ə kom nɛ mɛ kwaate wiy kenəə kɛ mɛ suuyen.

¹⁵Lòó mɛ jɛl lɛɛy ɛ leenen? Mɛ yɛ jem nɛ̀ keyioy ə kome gese jeme nɛ̀ ɛykwaate yome. Mɛ yɛ yem nɛ̀ keyioy ə kome gese yeme nɛ̀ ɛykwaate yome.

¹⁶Ke lòò è yɛ lu ge wɛ̀ yɛ jem nɛ̀ keyioy ə kiɛ é wel wɛ luun kengwiy nɛ̂y ghan lɛɛy se geese beeme ge: Amen kum bɛ́ɛ̀lè wɛ wɛ̀ foon ɛ əbliy wɛ əb báà se ke kenəə kɛ wɛ̀ suuyen.

¹⁷Bek ka wɛ̀ lòó wɛ̀ ko loote fo bɛ́ɛ̀lè se Feyine naa kejuŋ é ghel ɛlee jia cheme kiile ɛygiamten naa se nkan.

¹⁸Mɛ bɛ́ɛ̀lè Feyin ge mɛ ke se suŋnen ɛ telam tefɛɛ chia naa wel əbjim ɛ ghɛne məm.

¹⁹Dî nɛ lu ɛ məme kenon nə ghel ɛbeemene é ke yɛ jof ge mɛ suŋnen giɛ setan sɛ wele yio è keele kenəə kɛ mɛ kwaaten chia ka mɛ suŋnen giɛse nkam ɛyvəm ɛ telam tefɛɛ.

²⁰Ghone-nyii, ke fɛ́ ghɛn yɛ lu ka ghon ɛtɛlɛɛ ɛ ghɛne tekwaate. Kɛ kum əbnəə əbbee lu nɛ ghɛn yɛ lu kɛn se nchɛk ka ghon ɛtɛlɛɛ, dî nɛ ghɛn lu se yɛ lu ngɛyse ghel ɛ ghɛne tekwaate.

²¹Báàba suuy ɛ ŋwaale-Feyin ge: “Mɛ nɛ̂y suŋnen se ghele ghome, əbchio nə ghel ghɛ ɛ́ suŋnen ɛ telam, gese nɛ̀ əbchio nə əbtume, é ghene chèmè jia yio se mɛ.”

²²Ke me se lu ge se yɛ suŋnen ɛ telam ndun-ndun lu əbchəyte nɛ əb wiy se ghel ghɛ ɛ́ beemen, əb lu se ghel ghɛ ɛ́ báà beeme. Nɛ ɛyfekte kenəə ə Feyine wiy se ghel ghɛ ɛ́ báà beeme, ɛy lu se ghel ghɛ ɛ́ beemen.

²³Lɛ loo lu kenchintene ghel ɛbeemene kaame wel əbjime yɛ suŋnen ɛ telam ndun-ndun, yɛ lii ghele gwiyene kene ghɛ ɛ́ bɛɛy ghàà beeme é ghene jia yɛ yɛn ge ghɛne jake jaken-a?

²⁴Dî nɛ wel əbjim kè fekte kenəə ə Feyin yɛ lu ge wel wɛ əb bɛɛy ghàà beeme, kene wel əbgwiyen yɛ lii, é əb keele əbluuy è me yɛ lu se tiyse ngeŋ ə wen,

²⁵é chəm sɛ se luun ɛ wen ɛytem yɛnsen é əb me ngvəkte è yɛ kokse Feyin, suuye ge lu əbluuy nɛ Feyine loote lu ɛ ghɛne məm.

²⁶Kenəə kɛ mɛ suuyen ghone-nyii lu ge, loo lu əbliy wɛ ghɛn kaamen, wel yɛ́ ki njàŋ, kene kenəə kɛ dinte, kene kenəə kɛ Feyine dinen ge əb fekte, nɛ wel əblee suŋnene ɛ telam tefɛɛ, kene əb chiase chiasen telam nɛ̂ tin, ghɛn yɛ nɛɛy əbnəə əbjim se giamtene ngeŋ ə sɛn.

²⁷Yɛ́ lu nɛ ghɛ ɛ́ suŋnen ɛ telam tefɛɛ lu, ɛ́ fó kelik kɛn se ghel ɛbaa kene ɛtal, é wel yɛ suŋnen è mɛyse əblee geese suŋnen, nɛ wel ko gese lu wɛ əb yɛ chiase kesuŋnene ghen.

²⁸Yɛ lu ge wele jia yɛ lu se yɛ chiase, yɛ jof ge ghene ghel ɛjim yɛ lu ɛ chichi ɛ məme kenone ghel ɛbeemene, é wel yɛ suŋnen telam nɛ lu se ngeŋ ə wen gese nɛ se Feyine.

²⁹Nfektese yɛ lu se fekte kenəə ə Feyin ghel ɛbaa kene ɛtal, ghene fekte é ghel ghɛ ɛ́ bɛɛsen me yɛ kaake kenəə kɛ ghene suuyen.

³⁰Yɛ lu wɛ ge wel se ghel ghɛ ɛ́ kè diom ɛ ntiɛ kiile kenəə ka Feyine dinen yɛ jof ge wel wɛ əb kè suŋnen yal è fo jii ə́b suuy.

³¹Ke jofe ge wel yɛ fekte kenəə ə Feyine è mɛyse, wel əblee geese yɛ fekte, ka ghel ɛjime yiɛke é ghel ɛjime kiile ɛygiamten.

³²Nfekte yɛ ɛy fekten kenəə ə Feyin lu se yɛ ke se ghale ngeŋ ə wen.

³³Bek ge Feyine báà se lu wel wɛ əb jefen jefen nɛ̀ əbnəə, Feyine kɛŋe ge əbnəə yɛ ndu ɛ jii ɛyjuŋ. Ka ke luun ɛ əbnone ghel ɛbeemene naa əbjim,

³⁴lu nɛ əbkiye lu se yɛ lu ɛ chichi ɛ əbnchinten bek ka ke luun ge ghene wiy se yɛ suŋnen. Ghene lu se yɛ ki ɛyngvəmle kɛn ka ɛysake Moses dinen.

³⁵Yɛ lu ge ghene yɛ kɛŋ se keele naa kenəə kekɛ, ghene nɛy kfəəy è bifte se ɛlum ə ghene nɛ lu ɛ ndaa. Lu kenəə kenchoksen se əbvii se suŋnen ɛ kenchinten.

³⁶Ghɛne kwaate ge kenəə ə Feyine nè kɛɛte nɛ̀ ghɛn-a? Moo ge ɛ́ nè gwiy fekte kɛn se ghɛn-a?

³⁷Loo lu wele yɛ yɛn ge yi lu nfekte, kene ge Keyioy ə Feyine lu nɛ ke fó fomɛ se yi, əb yɛ lu se keele se əbluuy ge kenəə kɛ mɛ nyaken lu nɛ lu ɛysak nɛ ɛy lòò se Báàba.

³⁸Loo lu wele jia yɛ koŋ se beeme kenəə nɛ̂ kin, ghàà ghɛn fiisen wen.

³⁹Ke me se lu ghone-nyii ge, ghɛn yɛ mom ketaan se yɛ fekte kenəə ə Feyin, nɛ ghàà ghɛn me maay maayen se yɛ suŋnen ɛ telam.

⁴⁰Dî nɛ ghɛn lu se yɛ siyse əbnəə əbjim nɛɛye kɛn ɛ jii ɛyjuŋ.