Read Oku 1Kl 15 Bible Online

1Kl 15 - Oku bible

1Kl 15

¹Ghone-nyii mɛ kɛŋe se tamte se ghɛn ge ghɛn kuume kenəə kɛ kum sakghɛ əbjuŋ wɛ mɛ nè fekten se ghɛn, ghɛn fiisen è se tiy ɛ ten ketaan.

²Lu bek sakghɛ əbjuŋ nɛ̂ vin wɛ ghɛne kiilen ɛyboy, əbliy wɛ ghɛne loote ghalen giɛ sɛ mɛ nè fekten se ghɛn, buu yì ge ghɛn nè beeme kenəə nɛ ke wiy.

³Kenəə kɛ mɛ nè fekten se ghɛn, loote lu kenəə ketaa kɛ ke luun, nɛ lu kenəə kɛ ɛ́ nè fekten sɛy se mɛ, ge Christ nè lô kuo bek mbee ə sɛsen kɛn ka ŋwaale-Feyine suuyen,

⁴ge ɛ́ nè lô gvəəme wen, əbchii chin əbtal, Feyine kase lose wen se ɛykuo kɛn ka ŋwaale-Feyine suuyen,

⁵ge əb nè lô loole se ɛykuo dì, è din ngeŋ wen se Bita gese nɛ̀ ghɛ́ ntum ghɛ njio-sebaa ɛyvəm.

⁶Se lu se ɛybame ten əb din ngeŋ wen se ghone-nyii chia ɛyviɛ ɛytan əbliy əbmok. Ndio ghel nɛ̂ ghan ko bo bɛɛy lan vin, chèmè lu ka ɛlee kuonmen.

⁷Əb me gese din ngeŋ ə wen se Jɛms, è gese din se ghɛ́ ntume naa ɛjim.

⁸Əb nè ləysen è din ngeŋ ə wen se mɛ, chèmè lu ka mɛ luun ka wel wɛ ɛ́ nè biin nɛ̀ jii.

⁹Mɛ lu kenləysene wel ɛ məme ghɛ́ ntum nə Jesuse, nɛ mɛ chèmè báà se lu kekwɛnten ge ɛ́ yɛ toŋte mɛ ge wele ntum, bek ɛynəkse yɛ mɛ nè nəksen kenchintene ghel ə Feyin.

¹⁰Di lu bek ɛycham yɛ Feyine chamen mɛ, nɛ mɛ geese yɛ lu wel wɛ mɛ luun əbghen. Ɛycham yɛ Feyine nè chamen mɛ dì nè wiy se lólò, mɛ nè lô fɛl naa ketaan è chia ghene naa ghel ɛjim. Dî nɛ chèmè nè báà se fɛle mɛ, nè cham Feyin è me nɛɛy mɛ fɛl ɛyfɛl ə wen.

¹¹Nè lu əbliy nɛ̂ fo, kene nè fekte mɛ, kene nè fekte ghɛ́ ntum ɛlee, fene ghɛse ghene nè fekte kɛn kenəə nɛ̂ ki kemok. Nè lu kɛn kenəə nɛ̂ ki kɛ ghɛn beemen.

¹²Ghɛs lɛ fekte sakghɛ ge Jesus Christ nè loole se ɛykuo, é ke ghan lɛɛy nɛ ghel ɛlee geese yɛ din ge ghele jia yî loole se ɛykuo?

¹³Kè lòò è yɛ lu ge ghele jia yî loole se ɛykuo fene Christ nè báà loole se ɛykuo.

¹⁴Loo lu ge Christ nè báà loole se ɛykuo fene ghɛse fekte nɛ lu kenəə lólò, nɛ ghɛne fo ɛytem ɛ kenəə keyume.

¹⁵É kenəə ketaa ɛ məme ten me yɛ lu ge ghɛse yia əbbuam kum Feyin, bek ka ghɛs lu nɛ ɛ́ suuymen ge Feyine nè lô lose Christ se ɛykuo.

¹⁶Loo lu ge ghel ghɛ ɛ́ nè kuonmene jia yî loole se ɛykuo, fene Feyine dì nè báà lose sɛy Christ se ɛykuo.

¹⁷Lòò è yɛ lu ge Feyine nè báà lose Christ se ɛykuo fene ghɛne foo ɛytem se kenəə keyume, nɛ ghɛn ko bo bɛɛy ɛ ghɛn ə mbeese.

¹⁸Ke loo lu dì, fene ghel ghɛ ɛ́ nè foon ɛytem se Christ è kuo, lɛymen se lólò.

¹⁹Lòò è yɛ lu ge ghɛsen foo ɛytem se Christ nɛ lu kɛn bek ɛychii yɛ́ ketuu ntiɛ fɛne, fene ghɛsen lu ghel ghɛ lòó ɛ́ koosen ɛysen se ghene è chia ghel ɛjim ɛ mbi fɛn.

²⁰Dî nɛ əbluuye lu ge Feyine nè losemen Christ se ɛykuo, nɛ lu wen wele mbiy se loole se ɛykuo ɛ məme ghel ghɛ ɛ́ yi lose se ɛykuo.

²¹Ka nè nɛɛyen wel ge ghele yɛ kuo ɛ ketuu ntiɛ fɛn lu nɛ nɛɛy sɛy wel ge ghele náà kase loole se ɛykuo, nɛ ghele náà loole se ɛykuo bek kenəə kɛ wel nè nɛɛyen wen nyiŋ.

²²Kɛn ka ghel ɛjime kuon bek ka ghene luun kelamte Adam, lu nɛ ghel ɛjime ghɛ ɛ́ luun kefaa kemok ghene ghe Christ yî loole se ɛykuo.

²³Dî nɛ wele yî loole se ɛykuo kɛn əbliy wɛ Feyine nè siysenmen. Christ lu wele wɛ́ mbiy wɛ əb nè loolen se ɛykuo, nɛ ghel ghɛ luun ghɛ́ wene yî loole se ɛykuo ɛ əbliy wɛ əb kase gwiyen ɛ ten.

²⁴É loo lu nɛ əb taamen è chia əbtaawe tesak tejim gese nè kediak ɛyfim yɛ ɛy luun ɛ mbi fɛn, è kase chiase kediak əbfon nə wen se Bay Feyin, é mbi me mɛy.

²⁵Ke lu dî bek ge əb tiy se nɛy se yɛ sak se ndu se chin ka Feyine nɛ̂y səkse ghel ghɛ ɛ́ banen wen è lɛm é əb tom ɛvəə ə wen ɛ ghene əbtuu.

²⁶Wel əbbaanese wɛ Feyine nɛ̂y mɛyse se kenləysen lu ɛykuo.

²⁷Ŋwaale-Feyine suuy ge əbfua əbjime lu nɛ ɛ́ lɛmmen ɛ ɛyshaa ɛysak nə wen. Ɛ́ loo suuy ge əbfua əbjim lɛ, yɛ lu nɛ ɛ́ vii wiy Feyin se ten, bek ge Feyine lu wel wɛ əb lɛmen əbfua əbjim ge Christ yɛ sak.

²⁸Ɛ́ náà loo lu əbliy wɛ əbfua əbjime shiin ɛ wene ɛyshaa ɛysak é wen wɛ Christ wɛ luun wán ə Feyin me vii ngeŋ ə wen ɛ ɛyshaa ɛysak nə Feyine, é Feyin wɛ əb nè foon əbfua əbjim se wen me sak əbfua əbjim, nɛ əbfua əbjime yionen se wen.

²⁹Ke lɛ lòò è yɛ lu ge ghele jia yî loole se ɛykuo, é ghel ghɛ ɛ́ fiin moo ɛ kelik nɛ ghel ə ghene ghɛ nè kuonmen jɛl lɛɛy, é shii yɛ lu ghɛ wɛ ghele fiin moo ɛ kelik nə ghel ghɛ ɛ́ nè kuonmen?

³⁰Lòò è yɛ lu ge ghele jia yî loole se ɛykuo, é ghɛs yɛ yɛne ngɛk əbliy əbjim lɛ bek ghɛ?

³¹Ghone-nyii, mɛ tiy ɛ ɛyshiɛ ɛykuo əbchii əbjim. Mɛ suuy lɛ bek ge mɛ saŋle ka ghɛsen nɛ̀ ghe Jesus Christ wɛ Báàba wɛsen tiyen se kefaa kemok.

³²Nè lu əbliy wɛ mɛ nè luun ɛ Ɛfesos ghele se nəkse mɛ dì ka ghene lu nyamse əbkwak. Loo yɛ lu ge ghele jia yî loole se ɛykuo, fene mɛ nè beeme se yɛ yɛne ngɛk dì nɛ sɛk ə ten lu ghɛ se mɛ? É ke me yɛ jof ge ghɛsen yɛ yiɛ gese nəə ka loo lu likebvəchi é ghɛsen kuo é ke mɛy dî.

³³Ghàà ghɛn beeme ge wel lɛɛse ghɛn. Wel chinten ngoo ɛybee, é ɛy bese ndee ə wen.

³⁴Ghɛn kase yɛ kwaate ɛ jii ɛyjuŋ, è buuse ɛynɛɛye mbee. Mɛ yɛne ge ghel ɛlee ɛ ghɛne məm chèmè ke wiy Feyin se nkan. Mɛ suuy lɛ se nɛɛy ge ghɛn yɛ ghuumen.

³⁵Dî nɛ lòó wel bif ge: Ghele yî loole se ɛykuo lɛɛy? Ghene yî yɛ ki ɛynkii ɛyghun ɛykɛ?

³⁶Lu ɛykwaate kengoo! Ɛ́ vii ngose kefaa se ntiɛ, buu ge ɛy kuo, ɛy jia fəy.

³⁷Nɛ ngos yɛ wɛ̀ viin ɛ ntiɛ báà se lu kefaa nɛ̂ ki kɛ ke nɛ̂y fəy è yɛ kuy, kene lu ngose ɛysaŋ kene ngose kefaa kelee.

³⁸Feyine di foo əbghun ndun ndun se ngose əbfua, ɛ jii yɛ əb koŋen ɛ ten.

³⁹Əbfua wɛ əb yioyen ki ɛyghun ndun ndun. Əbghune wele lu ndun nɛ wɛ́ nyame lu ndun nɛ wɛ́ fenəne lu ndun nɛ wɛ́ səə lu ndun.

⁴⁰Əbfua lu ɛyyio nɛ əblee lu ɛ ketuu ntiɛ, nɛ ɛyjof əbfua wɛ əb luun ɛ ɛyyio lu jii ɛymok, nɛ ɛyjof əbfua wɛ əb luun ɛ ketuu ntiɛ lu ɛ ghene jii ndun.

⁴¹Chuye bane liake ɛ wene jii nɛ njoŋ bane liake ɛ wene jii, nɛ əmnjesme liake ndun ndun.

⁴²Lu sɛy jii yɛ ghele náà loole se ɛykuo ɛ ten. Wele kuo, əb foy, nɛ əb yî loole se ɛykuo è jia bo yî kuo.

⁴³Ɛ́ loo gvəəme wel yɛ lu nɛ əbghune wene jofe wiy, nəse wiy, nɛ ɛ́ yî lose se ɛykuo é əb yɛ jof, gese ki kediak.

⁴⁴Ɛ́ loo gvəəme wel yɛ lu nɛ əb ki əbghun ka wɛsene. Ɛ́ lose wen se ɛykuo é əb me yɛ ki əbghun nɛ lu wɛ́ keyioye. Ke me se lu ge, ka əbghun wɛ luun wɛ̂ kechake luun, əbghun wɛ luun wɛ́ keyioye ko lu sɛy.

⁴⁵Ɛ́ nyak ɛ ŋwaale-Feyin ge: Feyine nè bom Adam wɛ wele mbiy əb se ki ɛychii, dî nɛ Adame wɛ̂ kenləysen lu keyioy kɛ ke fóon ɛychii se ghele.

⁴⁶Nè báà kɛɛte gwiy əbghun wɛ luun wɛ́ keyioye, nè kɛɛte gwiy əbghun wɛ luun kechak, nɛ wɛ́ keyioye geese gwiy.

⁴⁷Feyine nè bom wele wɛ̂ mbiy: Adam, nɛ̀ əmntiɛme, nɛ kenkumtene wel: Christ lòò nɛ lu ɛyyio.

⁴⁸Ghel ghɛ ɛ́ luun ɛ ketuu ntiɛ fɛn lu ka wel wɛ ɛ́ nè bomen nɛ̀ əmntiɛme, nɛ ghel ghɛ ɛ́ luun ɛ́ ɛyyio lu ka wel wɛ əb nè lòòn nɛ lu ɛyyio.

⁴⁹Ka ghɛsen luun ɛ mbom nə wel wɛ ɛ́ nè bomen nɛ̀ kebvəle, lu ghɛɛ-ghɛɛ ka ghɛsene yî yɛ lu ɛ mbom nə wel wɛ əb nè lòòn ɛ ɛyyio.

⁵⁰Ghone-nyii, mɛ suuy se ghɛn ge əbghune njiase vine jia yî lii se məm ɛysak nə Feyine, nɛ kefaa kɛ lòó ke foy jia yî yɛ ki ɛychii yɛ ɛy jia yî mɛy.

⁵¹Ghɛn yióté é mɛ suuy kenəə se ghɛn kɛ ghɛn nè bɛɛy ghàà yɛ ke. Ghɛsen ɛjime jia yî kuo, dî nɛ Feyine náà kubsen ghɛsen ɛjim,

⁵²Ke yi gan kɛn ge kwɛs, kɛn dî ka wel bɛbɛ ɛshiɛ, yi yɛ lu əbliye kenləysen wɛ ɛyshoŋe suŋnen. Ɛy náà suŋnen é ghel ghɛ ɛ́ nè kuonmen loole se ɛykuo è jia bo yî kuo, é Feyine kubsen ghɛsen ɛjim.

⁵³Ghɛn yɛ ke ge əbghune wɛsen vin wɛ əb kuon gese foyen tiy se náà se kubsen se yɛ lu se əbghun wɛ əb jia bo yî kuo è foy.

⁵⁴Ɛ́ náà loo lu əbliy nɛ̂ ghan nɛ Feyine kubsenmen ɛyghun ə yɛ́sen yin ɛy se lu kefaa kɛ lòó ke jia bo yî kuo è foy, é ke me kwɛn ka ɛ́ nè nyaken ɛ ŋwaale-Feyin ge: Ɛ́ taamen è chia ɛykuo, ɛy bvəəle.

⁵⁵Ɛɛy, ɛykuo, ŋaŋ ə viɛ waay? Ɛɛy, ɛykuo, əbfiŋele viɛ waay?

⁵⁶Əbfiŋele ɛykuo lu mbee, nɛ̀ kediake ɛykuo lu nchil.

⁵⁷Dî nɛ ghɛsen yɛ bɛ̀ɛ̀lè Feyin wɛ əb nɛɛyen ghɛsen ghak ɛykuo bek kenəə kɛ Báàba ə wɛsen Jesus Christ nè nɛɛyen se ghɛsen.

⁵⁸Ke me se lu ghone-nyii ge, ghɛn yɛ tiy ketaan, fɛ́ ghɛn yɛ shikle. Ghɛn yɛ fɛl se Báàba Jesus Christ nɛ̀ ɛytem ə yɛne əbliy əbjim, bek ge kenəə kejim kɛ ghɛne fɛ́len se Báàba Jesus Christe jia yî lɛy se lólò.