Read Oku 1Kl 16 Bible Online

1Kl 16 - Oku bible

1Kl 16

¹Kenəə kɛ mɛ suuy ɛ leenen lu kum ɛyfô yɛ mɛ nè suuyen ge ghɛn yɛ foo se giamtene ghele Feyin. Ghɛn yɛ nɛɛy kɛn ɛ jii yɛ mɛ nè suuyen ge kenchintene ghele Feyine kɛ Galashia yɛ nɛɛy.

²Ɛ́ yɛ loo lu ɛ kechii kɛ́ mbiye se əbwɛy wel əbjim bɛs kefaa ɛ məme kefaa kɛ əb kiilen è bɛɛse, ka mɛ nɛ̂y gwiy é ghele jia yɛ luŋe baate əbfua kɛn se əbliy.

³Ɛ́ nɛ̂y loo lu əbliy wɛ mɛ gwiyen é mɛ nyak ŋwaale è tum ghel ghɛ ghɛn choken so é ghene ndu nɛ̀ kefaa kɛ ghɛn baaten se Jolesalem.

⁴Mɛ nɛ̂y yɛn ge ke lu kejuŋ ge mɛ ndu, è ghɛse ghɛne me ndu.

⁵Mɛ nɛ̂y loo shik ɛyghan se ghɛn è tosen jii Masedonia, bek ka mɛ kɛŋen se ghane Masedonia.

⁶Mɛ nɛ̂y chiite ghɛsen se keleŋ əbliy, ɛ lefelee se chin ka bèŋe chia, è me loo lòò, é ghɛn giamten mɛ é mɛ ndu è chin naa ghááy ghaa mɛ nduun.

⁷Mɛ báà se koŋe se yɛne ghɛn kɛn ɛyyio-ɛyyio. Mɛ koŋe se loote se chii ghɛsen se əbtəm ɛ lefɛ Báàba beemen.

⁸Nɛ mɛ nɛ̂y yɛ lu Ɛfesos se chin se əbliye Bentekost,

⁹bek ge mɛ kiilemen nsan yɛ lòó mɛ chia ɛ ten è loote nɛɛy ɛyfɛle Feyin fɛn, chèmè lu ka ghele əbbaanese nə mɛ luun fɛn se ɛydio dì.

¹⁰Timoti nɛ̂y gwiy naa ɛ leghɛ, ghɛn fiisen wen kejuŋ bek ge əb fɛle sɛy se Báàba ka mɛ fɛ́len.

¹¹Fɛ́ ghɛn bééme ge wel yɛ kiye wen lòlò. Ghɛn tinse wen kejuŋ é əb kase fiile se mɛ bek ge mɛ chiyte wen ghene ghone-nyii ɛlee.

¹²Kɛ kum wán no ə wɛsen wɛ Abollos lu nɛ mɛ lone wen naa ketaan ge əb gwiy ghene ghone-nyii ɛlee è ghan ghɛn, dî nɛ əb koŋe wiy se gwiy se ghane ghɛn ɛ leenen. Əb nɛy gwiy è ghan ghɛn naa leghɛ wɛ əb kiilen nsan.

¹³Ghɛn yɛ toknen, ghɛn yɛ tiy ketaan ɛ ɛytem yɛ ghɛn foon se Báàba. Ghɛn yɛ ki ɛytem ɛytaa è yɛ taa.

¹⁴Ghɛn yɛ nɛɛy əbnəə əbjim nɛ̀ ɛykoŋe.

¹⁵Ghone-nyii, ké ghɛn ke ge Stefanas ghene ɛykfəə wene nè lu ghele mbiy se fo ɛytem se kenəə ə Feyin ɛ Akaia. Ghene fomen əbliy ə ghen əbjim se yɛ fɛl se ghele Feyine.

¹⁶Mɛ me se lone ge ghɛn ko yɛ yionen se ghel ka ghii nɛ̂ ghine, è gese yɛ yionen se ghel ɛjim ghɛ ɛ́ fɛ́len ghene ghene.

¹⁷Mɛ chɛkle yio əbjuŋ ka Stefanas ghene Foltunatus, nɛ̀ Achaikus gwiyen se mɛ fɛn, bek ge ghene lu nɛ ɛ́ giamten mɛ ghɛɛ-ghɛɛ ka nè lòó ghɛn giamten.

¹⁸Ghene lu nɛ ɛ́ nɛɛy ge mɛ yɛ yio əbjuŋ ɛ mɛ ɛytem, kɛn ka ghene nɛ̀ɛ̀yen ge ghɛn yɛ yio əbjuŋ. Ghɛn yɛ ngvəmle ghel ka ghii nɛ̂ ghine.

¹⁹Əbnone ghel ɛbeemene wɛ əb luun ɛ ɛylake Asia chakte ghɛn. Akwuila nɛ̀ Blisilla gese nɛ̀ kenone ghel ɛbeemene kɛ ke chinten ɛ ghene ndaa chakte ghɛn naa kejuŋ ɛ ɛyghel nə Báàba wɛsen.

²⁰Ghone-nyii ghɛ́ fɛne ɛjime tinse ɛychakte se ghɛn. Ghɛn chakte ngeŋ ə sɛn è bamnen ka ghel ɛbeemene.

²¹Mɛ wɛ Bool, nyake yome yɛ ɛychakte fɛn nɛ̀ keghoo ə kome.

²²Wel lòò è yɛ lu ɛ ghɛne məm koŋe wiy Báàba, fene lòn lu ɛ wen ə ketuu. Báàba ə wɛs, ko gwiy.

²³Báàba ə wɛsen Jesus Christ ko cham ɛysen ə yɛn.

²⁴Mɛ koŋe ghɛn ɛjim ghɛ́ luun ghele Christ Jesus.