Read Oku 1Kl 2 Bible Online

1Kl 2 - Oku bible

1Kl 2

¹Mɛ nè gwiy se ghɛne ghone-nyii, se teefe ntum yɛ kum əbluuy ə Feyin, è jia se teefe nɛ lu nɛ̀ giɛ se lemene gese teefe wiy ka wel ŋwaale.

²Ke lu dî bek ka mɛ nè lô liɛ ge mɛ jia lɛm ɛytem ɛ kenəə kechine ɛ ghɛne məm buu kɛn Jesus Christ nɛ̀ ɛykuo yɛ əb nè kuon ɛ kentam.

³Mɛ nè lu ɛ ghɛne məm ka wel əbbol, lu lɛ ɛyfan-ɛyfan gese chiŋe.

⁴Se lu ka mɛ nè dinten gese fekten sakghɛ se ghɛn, mɛ nè báà se fekte nɛ lu nɛ̀ giɛse ɛytof se lemene. Mɛ nè fekte nɛ dine Keyioy Feyine kediak kɛ ke luun ɛ ten.

⁵Kii nɛ̂ kine nè lu se nɛɛy ge ghɛn fó ɛytem se Feyine nɛ lu bek əbtaawe ə wen, nɛ wiy bek ɛytof ə wele-mesoŋ.

⁶Ka ke chèmè luun dî nɛ mɛ loo fekte ɛ məm nə ghel ghɛ ɛ́ taanmen ɛ kenəə ə Feyin, mɛ yɛ fekte nɛ̀ əbfee, dî nɛ əbfee tene báà se lu wɛ́ mbi fɛne, nɛ gese wiy əbfee ə ghel ghɛ ɛ́ saken mbi ten ghɛ kɛ́ ghene se buu buun.

⁷Mɛ suuy kenəə kɛ kum chem əbfee nə Feyine yɛ əb nè leten, è lɛm se geese bome mbi ge lu jii yɛ əb yî siyse é ghɛsen yɛ ki əbjuŋ ə wen.

⁸Wel wiy ɛ məm nə ghel ghɛ ɛ́ saken mbi wɛ əb nè keelen kenəə ten. Ghene nè bóy se yɛ ke fene ghene nè báà yuy Báàba ɛ kentam, Báàba wɛ əb kiin ɛykokse.

⁹Ke lu kɛn ghɛɛ-ghɛɛ ka ŋwaale-Feyin suuyen ge: Wel nè bɛɛy ghàà yɛn, nɛ wel né bɛɛy ghàà yio, nè wel né bɛɛy ghàà kwaate ɛynkii kenəə kɛ Feyine bááten se ghel ghɛ ɛ́ koŋen wen.

¹⁰Dî nɛ Feyine nɛɛymen ghɛse keele əbnəə ten ka Keyioy Kelanene dinen; bek ge Keyioy Kelanene kaake əbnəə əbjim, naa nɛ̀ vii dii wɛ əb lelen ɛ məme kenəə nə Feyine.

¹¹Wel lɛ lu wɛ lòó əb yɛ ke ɛykwaate yɛ ɛy luun ɛ wel ɛytem buu kɛn keyioy ə wel nɛ̂ vi-a? Ghɛɛ ghɛɛ kɛn ka wel lòó əb jia yɛ ke ɛykwaate yɛ ɛy luun ɛ Feyine ɛytem buu kɛn Keyioy ə Feyin.

¹²Keyioy kɛ ghɛsen kiin báà lòò nɛ lu ɛ mbi fɛn, ke lòò nɛ lu se Feyine, ka ghɛsene yɛ ke əbnəə wɛ Feyine buken ghɛsen so.

¹³Dî nɛ əbnəə nɛ̂ vin wɛ ghɛse fektene báà se lu giɛse ɛytof yɛ yiɛken wele-mesoŋ ghɛs so. Ghɛse fekte nɛ lu nɛ̀ giɛ sɛ yiɛken Keyioy ə Feyin ghɛs so. Ghɛy ge ghɛse liɛ giɛ sɛ se lòòn se Keyioy ə Feyine sánse se ghel ghɛ ɛ́ kiin Keyioy ə Feyin.

¹⁴Wel wɛ əb báà se ki Keyioy ə Feyin lu nɛ lòó əb jia keele əbnəə wɛ əb lòòn se Keyioy ə Feyine, bek ge se wen lu nɛ lu əbnəə kengoo, nɛ lòó əb jia keele ge ə́b sɛ dine gee ghɛ-a? Ke lu dî bek ka lòó giamten kɛn Keyioy ə Feyin wel nɛ əb geese keele əbnəə nɛ̂ vin.

¹⁵Wel wɛ əb kiin Keyioy ə Feyin lu nɛ əb lóó əb yɛ ke se kaake əbnəə əbjim nɛ̀ wel wiy wɛ lòó əb kaake wen.

¹⁶Ke lu kɛn ka ŋwaale-Feyine dinen ge: “Wel wiy wɛ lòó əb keele kenəə kɛ ke luun ɛ Báàba ɛytem. Wel wiy wɛ əb kwaaten ge lòó yi tef wen tefen.” Dî nɛ ghɛsen ke kenəə kɛ ke luun ɛ Christ ɛytem.