Read Oku 1Kl 3 Bible Online

1Kl 3 - Oku bible

1Kl 3

¹Ghone-nyii, mɛ nè báà se suŋnen se ghɛn ka mɛ suŋnen nɛ lu se ghel ghɛ ɛ́ kiin Keyioy ə Feyin. Mɛ nè suŋnen ka mɛ suŋnen nɛ lu se ghel ghɛ ɛ́ ko bo lɛmen ketuu əbnəə wɛ́ mbi fɛne, suŋnen ka mɛ suŋnen se ghel ghɛ ɛ́ bo bɛɛyen ghon ɛ ghene ɛychii ghene ghe Christ.

²Mɛ nè kiile ghɛn ka ghon ghɛ ɛ́ bo nyoŋen nɛ lu ɛyghen, nɛ wiy ka ghel ghɛ ɛ́ se yiɛn əbfua əbtaa bek ka ghɛn nè bɛɛy ghàà tese kuy è kwɛn. Se lu ɛ leenen nɛ ghɛn chèmè bɛɛy ghàà kuy è kwɛn;

³Ghɛn nè bo chii ka ghele ghɛ́ mbi fɛne. Kenghɛke ghene əbnoo lii è gok se ghɛne məm fene ghɛne chii ka ghele ghɛ́ mbi fɛne, nɛ ndee ə sɛne lu ka sɛ ghele ghɛ́ mbi fɛne.

⁴Lɛ loo lu wele yɛ suuy ge: Mɛ tiy kome ghɛse Bool, nɛ əblee suuy ge: Mɛ tiy kome ghɛse Abollos, fene ghɛn lɛ báámen se nɛɛy ka ghele ghɛ́ mbi fɛne-a?

⁵Abollos lu ndɛ, nɛ Bool lu ndɛ? Ghɛs lu kɛn ghel ɛyfɛl nə Feyine ghɛ ɛ́ nè fɛ́len əb nɛɛy ghɛn fo ɛytem se Jesus, nɛ naa ndɛ fɛle kɛ́ wene kɛ Báàba dinen ge əb yɛ fɛl.

⁶Mɛ nè lô vii ngos, Abollos se səytee, dî nɛɛy Feyin ɛy se kuye.

⁷Wel wɛ əb maken ngos nɛ̀ wel wɛ əb səyten cheme wiy se kenəə. Lu kɛn Feyin wɛ nɛɛyen wen nɛ ngose ten kuye.

⁸Wel wɛ əb maken ngos nɛ̀ wel wɛ əb səytene fɛle kum kenəə kemok nɛ nɛ̂y fo Feyin əbmakte se ghene kɛn ka wel fɛlen.

⁹Ghɛs dì lu kɛn ghel ka ɛ́ chinten è se fɛle se Feyine, nɛ ghɛn lu ɛylem ə Feyin, gese lu kebakle ə Feyin.

¹⁰Feyine lu nɛ Fe fo mɛ nè ɛytofe, mɛ loote vii ketiɛ-ndaa ka wel wɛ əb loote keen kebakle, ka mɛ viin di, wel əblee gwiy è me se bakle nduu nɛ̀ ndaa ɛ ten. Ke me se lu ge naa ndɛ wɛ əb baklen yɛ toknen ge yi sɛ baklé ɛ jii ɛykɛ-a?

¹¹Lòó wel jia bo vii ketiɛ-ndaa kechine nɛ kɛ ke shiin lu Jesus Christ.

¹²Ke me se lu ge naa ndɛ wɛ əb bâklen ɛ ketiɛ-ndaa nɛ̂ fɛn, kene əb bâklè nɛ̀ kekas əbkaa ketaa, kene əb bâklè nɛ̀ ɛytiane, kene əb bâklè nɛ lu nɛ̀ ɛtiy ɛjuŋe, kene əb bâklè nɛ̀ əmkakme, kene əb bâklè nɛ̀ əbghuye, kene əb bâklè nɛ̀ əbgiake,

¹³fene Kechii Nsak náà kwɛn ɛ́ mom ɛyfɛle yɛ́ tene nɛ̀ əbvəse se yɛn ge sɛ lu ɛynkii ɛyfɛl ɛykɛ yɛ əb nè fɛ́len-a, é ɛy fəy gwiy ɛ əmlanen.

¹⁴Ɛ́ mom, yɛ lu ge kebakle ə ndɛ kɛ əb baklen ɛ ketiɛ ə ndaa nɛ̂ fɛn teem, é əb kiile əbmakte ə wen.

¹⁵Yɛ lu ge ke fuo, əb me lɛy lɛyen, dî è boy kɛn nɛ̀ ketuu ə wene ka wel ɛ əbliy wɛ ɛ́ boysen se əbvəs.

¹⁶Ghɛn ke wiy ge ghɛn lu ndaa-ɛykokse Feyin nɛ Keyioy ə Feyine chii ɛ ghɛne məm-a?

¹⁷Loo lu bese ndɛ ndaa-Feyin nɛ̂ yin, fene Feyine nɛ̂y bese wen, bek ka ndaa-Feyin lu kelik kelanene, nɛ̀ ghɛn se ghɛne kenon lu ndaa nɛ̂ yi.

¹⁸Ke fɛ wel yɛ lɛɛse ngeŋ ə wen. Loo lu wel se ghɛn yɛ kwaate ge yi ki ɛytof ɛ jii yɛ ghele ghɛ́ mbi fɛne kɛŋen ɛ ten, yɛ jof ge əb sɛy benle è yɛ lu kengoo, ka əb me yɛ lu wel əbtofen ɛshiɛ nə Feyine.

¹⁹Mɛ suuy di bek ge ɛytofe yɛ́ mbi fɛne lu kengoo ɛyshiɛ nə Feyine. Nɛ ke lu kɛn ghɛɛ-ghɛɛ ka ŋwaale-Feyine suuyen ge: Feyine koo wel əbfeesen kɛn ɛ ketam kɛ wel nə vi maken nɛ̀ əbfee wene.

²⁰Nɛ ɛy gese suuye ge: Bay ke ge tekwaate ghel ghɛ ɛ́ feesen lu tekwaate teyume.

²¹Ke me se lu ge ghàà wel gese yɛ ghaŋse əbghun bek wel əblee, bek ge əbfua əbjime shi wɛne.

²²Kene lu Bool, kene lu Abollos, kene lu Bita, kene lu mbi yin, kene ghɛne taa taan, kene ghɛne kuo kuon, kene kooye ghɛ lan, kene bvəse se kooy ghɛ ɛ likebvəchi, fene əbjime lu wɛne;

²³kɛn ka ghɛn luun ghɛ́ Christe nɛ Christ lu wɛ̂ Feyin.