Read Oku 1Kl 4 Bible Online

1Kl 4 - Oku bible

1Kl 4

¹Ghɛn lu se yɛ liɛ ghɛs ka ghel ɛyfɛl nə Christ ghɛ Feyine viinmen əbnəə ə wen wɛ əb luun ɛ kenlete se ghene keghoo ge ghene yɛ toknen so.

²Ke me se lu nɛ ghel ghɛ ɛ́ foon əbfua ge ghene yɛ toknen so lu se fo ɛytem se yɛ loote fɛl se ba ɛyfɛl.

³Lu se mɛ, nɛ ghɛn, kene naa ndɛ suŋnen kum ɛyfɛl ə yom naa lɛɛy, é ke jia yɛ kume mɛ. Chèmè baa se sake mɛ ketuu ə kom ɛ ɛyfɛl yɛ mɛ fɛ́len.

⁴Mɛ lu lɛ nɛ ɛytem ə yome foo wiy ngɛk san kum kenəə ghɛy, nɛ kii nɛ̂ kine báà se dine ge mɛ lu ghàà kejas. Lu kɛn Báàba wɛ əb kiynen ge ɛyfɛl ə yome sɛ nduu lɛɛy-a?

⁵Ke me se lu ge ghàà ghɛn yɛ sake ghel nɛ əbliye nsake bɛɛy ghàà kwɛn, dii əbliy wɛ Báàba kase gwiyen se fəyse əbnəə wɛ əb lelen ɛ nfiine se lɛm ɛ ngɛngɛ, é chəm sɛ ghele kiin ɛ ghene tetem yɛnsen. Lu əbliy fo wɛ Feyine náà bente wel kɛn ka ɛyfɛl ə wene luun.

⁶Ghone-nyii, əbnəə vin wɛ mɛ feksen kum ghɛse Abollos lu se giamtene ghɛn ge ghɛn keele kenəə kɛ ŋwaale-Feyine suuyen ge: Ghɛn yɛ chii ka ŋwaale Feyine suuyen, è jia yɛ ghaŋse əbghun, toke wel əblee, bake əblee.

⁷Wɛ̀ kwaate ge wɛ̀ lu ndɛ? Lɛ nè báà fo Feyin əbfua əbjim se wɛ̀ wɛ wɛ̀ kiin-a? Ke ghan lɛɛy ge wɛ̀ yɛ ghaŋse əbghun di-a ka əbfua nɛ̂ vin lu nɛ ɛ́ nè báà fo foon se wɛ̀?

⁸Ghɛn lɛ kwaate ge ghɛn se ki əbfua əbjim wɛ ghɛne shiin-a? Ghɛn lɛ kwaate ge ghɛn shi ghel ɛghakene-a? Ghɛn lɛ kwaate ge ghɛn se sake ka tefon nɛ ghɛs wiy tefon-a? Wel liɛ ge ghɛn kè se sake əbfon se əbluuy, é ghɛsen yɛ sak.

⁹Ke fuosen san di-a ka Feyine sɛ́y liɛmen ghɛs ghɛ ghɛ́ ntum è lɛm naa ɛybam, ka ghel ghɛ ɛ́ chiasenmen ɛysak ge ɛ́ yúy ɛ ɛyshiɛ nə mbi, nchiyse-ndaa nə Feyine gese nɛ̀ ghel ɛjime me tam ɛshiɛ è se kiye ghɛs.

¹⁰Ghele yɛne ghɛs ka əbngoo bek ka ghɛs foon ɛytem se Christ, dî nɛ ghɛn kwaate ge ghɛne feesene ka ghele Christ. Ghɛne kwaate ge ghɛs lu ghel ɛbole nɛ ghɛn lu ghel ɛtaa. Ghele ngvəmlee ghɛn, dî ngvəmle wiy ghɛs.

¹¹Se chin ɛ leenen lu nɛ jeŋ yafe ghɛs nɛ kendoŋe moo yúme nɛ ghɛs make nɛ lu əbnsake ndəyse. Ghele nyable nɛ̀ ghɛs nyablen, nɛ ghɛs jɛle chii nduu ɛ yio.

¹²Ghɛse fɛle ketaan nɛ̀ ɛghoo ə ghɛse. Ghele loo tɛylee ghɛs, ghɛs yɛ lon ge Feyine bose ghene, ɛ́ loo nəkse ghɛs, ghɛs yɛ kul ɛytem.

¹³Ɛ́ loo suŋnen kebee kum ghɛs, ghɛs yɛ loolè ge wɛ̀ɛ̀. Se chin ɛ leenen lu nɛ ghɛs lu ɛ mbi fɛn ka yafse, gese lu ka əbfua lólò.

¹⁴Mɛ báà se nyake əbnəə vin se nɛɛy ge ghɛn yɛ ghuumen. Mɛ nyake nɛ lu se tefe ghɛn tefen ka ghon ə ghom ghɛ mɛ koŋen.

¹⁵Ghɛn chèmè ki ghel ghɛ ɛ́ toknen nɛ ghɛn ɛ ghɛn ɛychii ka ghele Christ ɛ nkamse ɛ nkamse fene ba ə wɛn lu kɛn əbmok. Lu mɛ ba ə wɛn wɛ mɛ nè gwiyen nɛ̀ sakghɛ əbjuŋ se ghɛn, ghɛn se lu se kefaa kemok ghɛne ghe Jesus Christ.

¹⁶Mɛ me se beŋte ghɛn ge ghɛn yɛ nɛɛye əbnəə ɛ jii yɛ mɛ nɛɛyen ɛ ten.

¹⁷Ghɛy kenəə kɛ ke nɛɛyen mɛ se tume Timoti se ghɛn. Əb lu wán ə wom wɛ əb luun ɛ mɛ ɛytem, yionene ka wel ə Báàba. Mɛ tume wen ge əb gwiy è tamte se ghɛn jii yɛ ɛychii ə yome luun ɛ ten ɛ məm nə Jesus Christ. Əb nɛ̂y tamte nɛ lu kɛn kenəə nɛ̂ kin kɛ mɛ dinten se ghele naa ghááy ɛ əbnone ghel ɛbeemene əbjim.

¹⁸Ghel ɛlee ɛ ghɛne məm se ghaŋse əbghun di-a ka mɛ bɛɛy wiy se gwiy se ghɛn.

¹⁹Mɛ nɛɛy gwiy ɛ lefɛ Báàba beemen, nɛ mɛ nɛ̂y gwiy è jia yɛ lu se keele kɛn kenəə kɛ ghɛ́ ɛyghaŋse əbghune suuyen, dî è keele kediak kɛ ghene kiin?

²⁰Ɛysak ə Feyine wiy kenəə kɛ wel yɛ kum se əbchio, ɛy yɛnsene ɛ kediak əbnəə wɛ wele nɛɛyen.

²¹Kɛ ghɛne koŋen lu kekɛ? Ge mɛ gwiy nɛ̀ ngwan moo, ge mɛ gwiy nɛ̀ ɛytem ɛyjuŋe ɛ jii yɛ ge wɛ̀ɛ̀-a?