Read Oku 1Kl 5 Bible Online

1Kl 5 - Oku bible

1Kl 5

¹Mɛ lootemen yio ge kenjaŋe lu ɛ ghɛne məm, naa nɛ lu ɛynkii kenjaŋ kɛ chèmè luun ghel ghɛ ɛ́ báà beeme Feyin, é ɛ́ jia yɛ jaŋ. Mɛ yiomen ge wel əblee ɛ ghɛne məm liɛ wiy ə ba ə wen.

²Ghɛne ko se yio əbghun-a? Ghɛn kè lu se yɛ diy diyen. Ghɛn fəyse wel wɛ əb momen ɛynkii kenəə nɛ̂ ghan se ghɛne məm.

³Chèmè lu ka mɛ báà se lu ghɛsen nə əbghune, lu nɛ mɛ ko lu ghɛsen se keyioy. Mɛ tenenmen nsak ə wel wɛ əb momen kenəə kin di-a ka mɛ lu ghɛsen.

⁴Mɛ tenen əbtaawe nə Báàba Jesus. Ghɛne nɛ̂y loo ghal ɛydiom é me yɛ lu ghɛsen se keyioy, nɛ kediake Báàba ə wɛsen Jesus, gese lu,

⁵é ghɛn vii wel nɛ̂ vin se keghoo nə Satan é Satan bese kechak əbghun nə wen ka keyioy ə wene yî boy ɛ əbliy wɛ Báàba Jesus kase gwiyen.

⁶Ke báà se lu ɛ titiy ge ghɛn yɛ ghaŋse əbghun. Ghɛne báà se ke ge ɛ́ liɛ feshik se ɛylaay è vii se keban fene ntone keban ten ɛyjime kok-a?

⁷Ghɛn fəyse nchiine ɛybee nɛ̂ yin se ghɛne məm yɛ ɛy luun ka feshik, ka ghɛne yɛ loote lu ghel ɛlanene kɛn ka ghɛn shiin, bek ge Jesus Christ wɛ bvəy ntaŋle yɛ ɛy boysen ghɛsen lu nɛ ɛ́ sɛɛmen.

⁸Ghɛsen me yɛ yiɛ kechii ɛybose nə ghɛsen nɛ wiy nɛ̀ keban kɛ ɛ́ viin feshik se ten kɛ luun nchiine sebee nɛ̀ tekwaate tebee, dî è yɛ yiɛ nɛ lu keban kɛ ɛ́ báà tese vii feshik se ten kɛ ke dinen ge ghɛsen lu ghel əbluuy, yia wiy əbbuam.

⁹Mɛ nè lô nyak ŋwaale se ghɛn è din ge ghàà ghɛn yɛ chinten ghɛne ghel ghɛ ɛ́ jaŋen kenjaŋ.

¹⁰Mɛ nè báà se suŋnen kum ghele mbi fɛne ghɛ ɛ́ jaŋen kenjaŋ, ŋwɛye keŋwɛy, choŋe əbchoŋ, kokse əmnyin. Ke loo è yɛ lu di, fene ke dine ge ghɛn lu se vəse mbi yin vəsen.

¹¹Kenəə kɛ mɛ nè nyaken lu ge, fɛ́ ghɛn yɛ chinten ghɛne ghe wel wɛ əb been ge yi lu wán-nyii, dî jaŋe kenjaŋ, kene ŋwɛye keŋwɛy, kene kokse əmnyin, kene tɛylee ghel, kene lɛme ketuu ɛynəə əmnduk, kene choŋe əbchoŋ. Fɛ́ ghɛn cheme yɛ yiɛ ghɛne ghe ɛynkii wel nɛ̂ vi.

¹²Ke lu dî bek ge mɛ wiy se yɛ sake ghel ghɛ ɛ́ báà se lu ɛ ghɛsen ə kenon. Ghɛn lɛ báà se lu se yɛ sak nɛ lu ghele ngoo nə ghɛn-a?

¹³Feyine náà sak ghel ghɛ báà se lu ghele ngoo nə ghɛsen. Lu keghene kɛ ɛ́ nyaken ɛ ŋwaale-Feyin ge: Ghɛn jum wel wɛ əb kiin nchiine ɛybee se ghɛne məm.