Read Oku 1Kl 6 Bible Online

1Kl 6 - Oku bible

1Kl 6

¹Wel se ghɛn lɛ lòò è yɛ ki əbchio ghene wan-nyii, é əb liɛ è ndu so se ghel ə Feyine é ɛ́ sak moo é əb sɛ́y liɛ è ndu so nɛ lu se ghel ghɛ ɛ́ báà se ke Feyin-a?

²Ghɛne báà se ke ge ghel ə Feyine náà sak ghele ghɛ́ mbi fɛn-a? Ke lɛ lu ge ghɛne yî sak ghele ghɛ mbi fɛne, fene ghɛn lɛ báà me se lu kekwɛnten ka lòó ghɛn yɛ siyse əmnəətese-a?

³Ghɛne báà se ke ge ghɛsene náà sak nchiyse-ndaa nə Feyine-a? Ka ke luun dî, é ghɛsen sɛy jia me yɛ loote siyse əbnəə wɛ̂ leenen-a?

⁴Əbnəə lɛ loo kooy ka vii nɛ̂ vine, é ghɛsen sɛy yɛ liɛ, ndu so nɛ lu se ghel ghɛ kenone ghele ɛbeemene báà se ke ghene-a?

⁵Ghɛne ghuumen wiy-a? Lɛ lu ge wel əbfeesen wiy ɛ ghɛne məm əbmok wɛ lòó əb mɛyse əbchio wɛ wel kiin ghene wan-no ə wen-a?

⁶Wele lóò əb liɛ wán-nyii è ndu so nɛ lu ɛyshiɛ ɛysak, naa nɛ lu ɛysake ghel ghɛ ɛ́ báà beeme Feyin.

⁷Ka wel se ghɛne liɛn nsak əb ndu so nɛ lu se ɛysake dî lu nɛ ke dine ge kɛne lootemen buu buun. Lɛ jofe wiy ge wel jas nɛ lu se wɛ̀-a? Lɛ jofe wiy ge wel choŋ nɛ lu wɛ̀-a?

⁸Se lu nɛ lu ghɛn ghɛ ɛ́ jasen gese choŋen, naa nɛ lu se ghone-ɛnoo ə ghɛne.

⁹Ghɛne báà se ke ge ghel ghɛ ɛ́ nɛɛyen mbee jia yî lii se ɛysak nə Feyin-a? Ghàà ghɛn lɛɛse ngeŋ ə sɛn. Ghel ghɛ ɛ́ jaŋen kenjaŋ, kene ghɛ ɛ́ koksen əmnyin, kene ghɛ ɛ́ liɛn əbkiye ghel, kene əbkiy ghɛ ɛ́ liɛn əbkiy, kene ɛluumene ghɛ ɛ́ liɛn ɛluumen,

¹⁰kene ghel ghɛ ɛ́ choŋen, kene ghɛ ɛ́ ŋwɛyen keŋwɛy, kene ghɛ ɛ́ lɛmen ketuu ɛynəə əmnduk, kene ghɛ ɛ́ besen teghel ə ghel, kene ɛchoŋ ghɛ fáàsen əbfua se ghele; fene wel se tene jia yî yɛ ki kelik ɛ məme ɛysak nə Feyine.

¹¹Ghel ɛlee ɛ ghɛne məm nè lu kɛn naa ɛ jii nɛ̂ ghan, se lu nɛ ɛ́ nè suumen mbee ə sɛn, è nɛɛy ghɛn se lu ɛlanen, è nɛɛy ghɛn se lu ghele ghɛ́ titiye əbtaawe ɛyghel nə Báàba Jesus Christ gese nɛ̀ əbtaawe Keyioy nə Feyine Fɛsene.

¹²Lòó wel əblee me suuy ge yi ki əbtaawe se nɛɛy naa ghɛ, dî nɛ əb lu se yɛ ke ge báà se lu əbnəə əbjim wɛ əb giamten. Lòó mɛ ko suuy ge mɛ ki əbtaawe se nɛɛy əbnəə əbjim dî nɛ mɛ jia yɛ lu kekos se kelee.

¹³Wele lóó əb ko gese suuy ge: Əbfua-əbyíɛ́ne lu ge ɛ́ yɛ yiɛ nɛ əb lii se əblɛɛ, nɛ əblɛɛ lu ge ɛ́ yɛ yiɛ əbfua-əbyíɛ́ne nɛ əb lii se ten. Lu əbluuy dî nɛ Feyine yî buuse əbfua nɛ̂ vin əbjim. Əbghun ə wele báà se lu ge wel yɛ jaŋ nɛ lu kenjaŋ so; əb di lu ge wel yɛ fɛl so se Báàba, nɛ Báàba toknen so.

¹⁴Feyine ko nè lô lose Báàba se ɛykuo nɛ ə́b nɛ̂y lose sɛy ghɛsen nɛ̀ əbtaawe ə wene.

¹⁵Ghɛn ke wiy ge ɛyghun ə yɛne lu əblik əbghun nə Christ-a? Lɛ lòó ke ghan lɛɛy ge wel liɛ əblik əbghun nə Christ è chinten se wɛ́ kejɛle. Lòó ke jia gan dî.

¹⁶Ghɛn ke wiy ge wel liɛ kejɛl fene ɛyghun ə ghene shi kefaa kemok-a? Kɛn ka ŋwaale-Feyin suuyen ge: Əbvii ghene lume yî yɛ lu kefaa kemok.

¹⁷Dî nɛ naa ndɛ chinten ghene Báàba fene ghene wen shi kefaa kemok se keyioy.

¹⁸Ghɛn maay kenjaŋ. Naa mbee ɛykɛ yɛ wele nɛɛyen lu nɛ ɛy báà se kume əbghun ə wen, dî nɛ wele jaŋe kenjaŋ, yɛ lu nɛ əb nɛɛy mbee nɛ lu se əbghun ə wene.

¹⁹Ghɛn ke wiy ge ɛyghun ə yɛne lu ndaa yɛ Keyioy Kelanene chiin ɛ ten-a, Keyioy kɛ ke luun ɛ ghɛne məm, kɛ Feyine nè foon se ghɛn-a? Di baa se ki ghen ngeŋ sɛn.

²⁰Feyine nè lômen yun ghɛn è lak. Ghɛn me yɛ kokse Feyin nɛ̀ ɛyghun ə yɛne.