Read Oku 1Kl 7 Bible Online

1Kl 7 - Oku bible

1Kl 7

¹Se suŋnen kum əbnəə wɛ ghɛn nè nyaken, lu nɛ ke jofe ge ghàà əbluumen kum əbvii.

²Dî nɛ ka kenjaŋe ghakten ghakten lɛ, é ke yɛ jof ge əbluumen əbjim yɛ ki wiy ə wen nɛ̀ əbvii əbjim ki lum ə wen.

³Əbluumen lu se yɛ foo ngeŋ ə wen se wiy ə wen nɛ əbvii foo ngeŋ ə wen se lum ə wen.

⁴Əbghun ə əbvii bɛɛy wiy kɛn wɛ́ wene, lu sɛ̂y wɛ lum ə wene, ghɛɛ-ghɛɛ ka əbghun ə əbluumene bɛɛyen wiy kɛn wɛ́ wene, lu sɛ̂y wɛ́ wiy ə wene.

⁵Ghàà wel yɛ bene jim se əblee, buu ge lu kenəə nɛ ghɛne siyse siysen ka ghɛne jem se keleŋ əbliy. Kii nɛ̂ kii chia, ghɛn me kase konen, buu di é Satan gwiy nɛ̀ ɛymomse ɛ ghɛne məm é ghɛn jia yɛ ke se ghale ngeŋ ə sɛn.

⁶Mɛ báà se suuye kine ka ɛykwante, mɛ chio nɛ lu ntaŋ.

⁷Mɛ kè lòó mɛ yɛ koŋ ge wel əbjim yɛ lu kɛn wen nyiŋ ka mɛ luun, dî nɛ naa ndɛ ki fomɛ ə wen wɛ Feyine foon. Feyine fó kine se wele vin, əb gese fo kii dii se wele vii.

⁸Mɛ se suuye kine se ghɛne tekoye, nɛ̀ se ghɛne əbkiy-nkfə, ge ke lu kejuŋ ge ghɛn yɛ lu se ghɛne ngeŋse ka mɛ luun.

⁹Yɛ́ lu wɛ ge lòó ghɛn jia ghal ngeŋ ə sɛn, yɛ jof ge wel kiile wiy ə wen é wel kiile lum ə wen bek ge ke jofe ge wel yɛ ki wɛ̂ wen chia ka wel yɛ fuo fuon nɛ̀ nseemese.

¹⁰Se ghɛn ghɛ ɛ́ se kiin əbkiy kene ɛlum mɛ tefe ghɛn ge: Ke fɛ́ əbvii yî fəy lum, báà fo mɛ ɛysak yin, fo Báàba Jesus.

¹¹Dî nɛ əb fəy fene əb tiy se gok dì, buu dî ghene lum ə wen kase gwiy se əbchio əbmok, nɛ ghàà əbluumen yì jum wiy ə wen.

¹²Mɛ suuy kɛ́ leenene nɛ lu se ghel ghɛ ɛ́ bo bɛɛsen. Suuy mɛ kine, nɛ báà se suuy Báàba, ge: Wel əbbeemen lòò è yɛ ki əbvii nɛ wiy wel əbbeemen, nɛ əb bééme se yɛ chii ghene wen, ghàà əb jum.

¹³Əbvii əbbeemen yɛ́ ki lum nɛ báà se lu wel əbbeemen, nɛ əb bééme ge ghene wen yɛ chii, ghàà əb fəy.

¹⁴Ke lu dî bek ge Feyine nɛɛy nɛ əbluumen wɛ əb báà beeme lu əblanen bek wiy ə wen, nɛɛy nɛ əbvii wɛ əb báà beeme lu əblanen bek lum ə wen, buu dî é ghon ə ghene jia yɛ lu ɛlanen, dî nɛ ke wiy dî, ghene lu ɛlanen.

¹⁵Yɛ́ lu wɛ ge wel wɛ əb báà beeme yɛ koŋ ge ɛ́ giabsen, ɛ́ giabsen. Lu se kii nɛ̂ kii nɛ wan-nyii əbluumen kene əbkiy, ki wiy ɛygham bek ge Feyine koŋe ge ghɛsen yɛ chii əmnyiaŋ.

¹⁶Wɛ̀ wɛ əbvii, wɛ̀ keele se ghɛ ge lòó wɛ̀ jia náà boyse lum ə viɛ, nɛ wɛ̀ wɛ əbluumen, wɛ̀ keele se ghɛ ge lòó wɛ̀ jia náà boyse wiy ə viɛ?

¹⁷Wel əbjim yɛ chii kɛn ka Báàba nè lɛmen ge əb yɛ chii, gese lu kɛn ka əb nè luun nɛ Feyine geese choke wen. Kii nɛ̂ kine lu nchil yɛ mɛ foon se əbnchintene ghel ə Feyine.

¹⁸Feyine chok wel ge wel ə vi nɛ ɛ́ nè nɛytemen wen ghàà əb gese yɛ luŋ ge yi buuse əblase ɛynɛyte nɛ̂ vi, yɛ lu ge Feyine chok wel ge wel ə vi nɛ ɛ́ nè bɛɛy ghàà nɛyte wen, ghàà əb yɛ luŋ ge ɛ́ nɛyte yi.

¹⁹Kene ɛ́ lu nɛ ɛ́ nɛyte wel, kene ɛ́ báà nɛyte, kii nɛ̂ kine wiy ɛ shii. Kɛ ke luun ɛ shii lu ge wel yɛ lɛme nchilse Feyin.

²⁰Wel əbjim yɛ lu ka əb nè luun nɛ Feyine geese choke wen.

²¹Loo lu nɛ Feyine nè chok wɛ̀ nɛ wɛ̀ lu kekos, ghàà kii nɛ̂ kine yɛ foo ngɛk se wɛ̀, dî nɛ nsan yɛnsen yɛ wɛ̀ chia ɛ ten è boy, wɛ̀ momse.

²²Ke lu dî bek ge kekos kɛ Báàba chokenmen shi wel əboyen nə Báàba, ghɛɛ-ghɛɛ ka wel wɛ nè wiyen kekos ɛ əbliy wɛ Báàba nè choken wen shi kekos se Christ.

²³Feyine nè yunmen ghɛn è lak. Ghàà ghɛn yɛ fɛle kekos se wele-mesoŋ.

²⁴Ke me se lu ɛ ghone-nyii ge wel yɛ lu kɛn ɛ jii yɛ əb nè luun ɛ ten ɛ əbliy wɛ Feyine nè choken wen ɛ ten ge wel ə vi.

²⁵Mɛ suŋnen ɛ leenen kum ghel ghɛ ɛ́ bɛɛy ghàà yɛ chii ka əbvii ghene lum. Mɛ báà se ki ɛysak yɛ ɛy lòòn se Báàba, dî nɛ mɛ fo ɛykwaate ə yom se ghɛn ka wel wɛ Báàba koosen ɛysen se wen è nɛɛy ghele se yɛne ge lu wel.

²⁶Lu ɛ jii yɛ ngɛkse luun ɛ ten ɛ leenen, mɛ kwaate ge ke jofe ge wel gok kɛn ka əb luun.

²⁷Lu nɛ wel se ki əbvii, ghàà əb yɛ kɛŋ se jum. Yɛ́ lu nɛ wel bɛɛy kɛn dî, ghàà əb yɛ kɛŋ se yɛ ki əbvii.

²⁸Dî nɛ wel kooy əbvii, fene əb báà nɛɛy mbee. Wándɛ ngon kooy lum, fene əb báà nɛɛy sɛy mbee. Dî nɛ ngɛk se dione lu mbi fɛn se ghɛ ɛ́ kiin ɛlum kene əbkiy, nɛ mɛ koŋe wiy ge ghɛn yɛ ki ɛynkii ngɛkse nɛ̂ ghan.

²⁹Ghone-nyii, kenəə kɛ mɛ suuyen lu ge əbliye təmsemen, nɛ kɛɛte se leenen lu nɛ ghel ghɛ ɛ́ kiin əbkiy lu se yɛ chii dì ka ghene nè báà se ki əbkiy.

³⁰Ghel ghɛ ɛ́ diyen yɛ lu ka ghene nè báà se diye, nɛ ghel ghɛ ɛ́ saŋlen lu ka ghene nè báà se saŋlee, nɛ ghel ghɛ ɛ́ yunen əbfua lu ka ghene nè báà se ki kefaa.

³¹É ghel ghɛ ɛ́ fɛ́len ɛ əbnəə wɛ́ mbi fɛne yɛ lu dî ka ghene báà vii əbfee ə ghen ɛ əbnəə nɛ̂ ghan. Ke lu dî bek ge mbi yin, ɛ jii yɛ ɛy luun ɛ ten, se nduu mɛye.

³²Mɛ báà se kɛŋe ge əbnəə yɛ jefse ghɛn. Wel wɛ əb báà se ki əbvii vii ɛytem ə wen se əbnəə wɛ kum Báàba è yɛ mom se nɛɛy əbnəə wɛ Báàba koŋen.

³³Dî nɛ wel wɛ əb se kiin əbvii ki shii nɛ lu se əbnəə wɛ́ mbi fɛne bek ka əb lóó əb yɛ mom se nɛɛy nɛ lu kenəə kɛ wiy ə wene koŋen.

³⁴Loo lu dî, ɛykwaate ə wene yɛ lu ɛygiabsen. Nɛ əbvii wɛ əb báà se ki lum, kene wándɛ ngon lóó əb vii ɛytem ə wen se əbnəə wɛ kum Báàba. Əb nɛɛy dì se fo ɛytem ə wen nɛ̀ əbghun ə wene se Báàba. Dî nɛ əbvii wɛ əb kiin lum ki shii nɛ lu se əbnəə wɛ́ mbi fɛne nɛ əb lóó əb yɛ mom se nɛɛy nɛ lu əbnəə wɛ lum ə wene koŋen.

³⁵Mɛ suuy əbnəə vin lɛ se giamtene ghɛn, nɛ wiy se fene jii se ghɛn. Mɛ kɛŋe ge ghɛn yɛ nɛɛy əbnəə ɛ jii ɛyjuŋ, gese fɛle ɛyfɛl ə Báàba nɛ̀ ɛyteme.

³⁶Wel lòò è yɛn ge yi báà se nɛɛy kejuŋ se wándɛ ngon wɛ ghene wen nè kaknenmen ge yɛ lu wiy ə wen, yɛ lu nɛ əbliye se chia, nɛ əb yɛne ge ghene wen chinten, ɛ́ chinten. Mbee wiy ɛ kii nɛ̂ kii.

³⁷Dî nɛ wel loote lɛm ɛ wen ə ɛytem ge yi gok kɛn dì, əb gok é lefɛ kenəə wiyen kɛ ke jefsen wen, nɛ əb gese ke se ghale ngeŋ ə wen. Əb gok dì, è jia chinten ghene wándɛ ngon wɛ ghene wen nè kaknenmen vi, fene əb nɛɛy ɛ titiy.

³⁸Ke me se lu ge naa ndɛ wɛ əb chinten ghene əbvii wɛ ɛ́ nè kakenmen ge nɛy yɛ lu wiy wen, nɛɛy kenəə kejuŋe, nɛ naa ndɛ wɛ əb báà chinten ghene əbvii nɛɛy nɛ lu kenəə kɛ ke jofen chian.

³⁹Əbvii wɛ ghene əbluumen chintenmen lu se yɛ chii kɛn ghene lum ə wen se chin ka ɛykuo naa giabsen ghene wen. Lûm ə wene kuo fene lòó əb chinten naa ghene əbluumen əbkɛ wɛ əb koŋen, nɛ lu əbluumen nɛ əb fó ɛytem se Báàba.

⁴⁰Dî nɛ mɛ kwaate ge əb loo lu gok kɛn wen nyiŋ é əb yɛ yio əbjuŋ. Mɛ kwaate ge kenəə kɛ mɛ suuyen lòò nɛ lu se Keyioy ə Feyine.