Read Oku 1Kl 8 Bible Online

1Kl 8 - Oku bible

1Kl 8

¹Kɛ kum əbfua-əbyíɛ́ne wɛ ɛ́ chiysen əmnyin so lu nɛ ghɛsen ke ge ghɛsen ghel ɛjim ki ɛytof. Ɛytofe lóó ɛy nɛɛy wel yɛ ghaŋse əbghun, dî nɛ ɛykoŋe bâklè wel baklen.

²Wel lòò è yɛ kwaate ge yi ke kenəə fene əb bɛɛy ghàà yɛ ke ka kè lòó əb yɛ ke.

³Dî nɛ wel lòò è yɛ koŋe Feyin, é Feyine yɛ ke wen.

⁴Se lu se ɛyyiɛ yɛ wel yíɛ́ əbfua-əbyíɛ́ne wɛ ɛ́ chiysemen əmnyin so, lu nɛ ghɛsen ke ge əmnyinme lu əbfua lólò, gese ke ge Feyine lu kɛn femok ɛ mbi.

⁵Chèmè lu ka ghele toŋte əbfua əblee ge əmnyin, kene lu wɛ əb luun ɛyyio, kene lu wɛ́ ketuu ntiɛ, ka əmnyinme ten nɛ̀ báàba sɛ́ tene chèmè dion lɛɛy,

⁶fene ghɛsen ke ge Feyine lu femok Fɛ luun Bay Mbom, nɛ əbfua əbjime lòò se wen, nɛ ghɛsen chii se yɛ kokse wen. Báàba lu əbmok nɛ lu Jesus Christ, nɛ Feyine nè bomen əbfua əbjim ə́b chia nɛ lu ɛ wene keghoo, nɛ nɛɛye wen ge ghɛsen yɛ chii.

⁷Dî nɛ báà se lu wel əbjim wɛ əb keen əbluuy nɛ̂ vin. Ghel ɛlee nè keentenmen se kwaate kum əbnfeksen əbfua ɛ jii yɛ ge ghene lóó yiɛ əbfua-əbyíɛ́ne nɛ̂ vin ghene yɛ kwaate ge ghene yiɛ nɛ lu njemte əmnyin nɛ̂ ghan, teteme ghene loo sake ghene bek ka te boolen, ghene me yɛ yɛn ge ɛ́ jasmen.

⁸Báà se lu əbfua-əbyíɛ́ne wɛ əb siysen ɛylu ə yɛ́sen nɛ̀ Feyine. Ghɛsen tɛn se yiɛ é ke jia cheme bef naa se ɛylaay, è yiɛ é ke jia cheme jof naa se ɛylaay.

⁹Ghɛn yɛ toknen fɛ ghɛn yɛ chii ɛychii yɛ ɛy dinen ge ghɛn ki əbtaawe se nɛɛy naa ghɛ ə wen, fɛ ɛy nɛɛy é ghel ghɛ ɛybeeme ghene boolen diamten è fɛy ɛ məme mbee.

¹⁰Lɛ loo lu wel wɛ ɛytem ə wene boolen yɛn wɛ̀ wɛ wɛ̀ keen əbnəə nɛ̂ vin, nɛ wɛ̀ yiɛ ɛ ndaa ɛychiyse əmnyin é kii nɛ̂ kine jia nɛɛy ge əb bééme se yɛ yiɛ njemte əmnyin nɛ̂ min-a?

¹¹É ke me yɛ din ge wan-nyii wɛ Jesus Christ nè kuon bek wene me bef nɛ bese ɛytof ə yiɛ nɛ̂ yin.

¹²Loo lu wɛ jas se wan-no ə viɛ ɛ jii nɛ̂ ghan ge wɛ̀ mɛyse tik tiken ɛykwaate ə wen yɛ ɛyboolen naa dì, fene wɛ̀ jas nɛ lu se Jesus Christ.

¹³Ke me se lu ge mɛ ke ge mɛ yiɛ nyam ɛy nɛɛy é wan-nyii nɛɛy mbee, é mɛ jia bo yiɛ nyam naa se nkan fɛ mɛ báà nɛɛy ge wan-nyii nɛɛy mbee.