Read Oku 1Kl 9 Bible Online

1Kl 9 - Oku bible

1Kl 9

¹Ghɛn lɛ maanen ge mɛ ki sɛy əbtaawe se yɛ nɛɛy ka mɛ koŋen-a? Mɛ lɛ báà se lu wele ntum nə Jesus-a? Mɛ nè báà yɛn Báàba ə wɛsen wɛ Jesus-a? Ghɛn lɛ báà se lu keghoo ɛyfɛl nə mɛ se Báàba?

²Chèmè lu nɛ ghel ɛlee yɛne wiy ge mɛ lu ntum ə Jesus fene mɛ ko ke ge ghɛn ke ge mɛ lu ntum ə Jesus bek ge ghɛn lu əbchəysen ɛyfɛl nə mɛ se Báàba ka ntum ə wen.

³Mɛ suuy se ghel ghɛ ɛ́ chiɛyen mɛ ge:

⁴Ke chèmè lu ge ghɛs ki wiy əbtaawe ka loo ghɛn fo kefaa ɛ ghɛs yiɛ è nəə-a?

⁵Ghɛs lɛ ki wiy sɛy əbtaawe se kiile əbkiy ɛbeemene se yɛ ghan so ka ghɛ ntum nə Báàba ɛlee, nɛ̀ ghone-no ə wene, gese nɛ̀ Bita ghanen nɛ̀ ghɛ́ ghene-a?

⁶Lɛ lu kɛn ghɛse Balnabas ghɛ ɛ́ luun se yɛ fɛl nɛ̀ ɛghoo ə ghɛse se geese kiile kefaa se yiɛ-a?

⁷Lɛ lòó wel yɛ fɛl ka wel ɛyghoŋ nɛ kase lake wen ketuu wen-a? Lɛ lòó wel yɛ lem ɛylem nɛ lòó əb jia yiɛ əbfua wɛ́ ɛylem fo-a? Lɛ lòó wel yɛ chɛye nyamse nɛ lòó əb jia kam ɛghene ten è nəə-a?

⁸Mɛ baa se suuy əbnəə nɛ̂ vin nɛ lu ɛykwaate ə wel. Lu kɛn naa əbghene wɛ ɛ́ nè nyaken ɛ ŋwaale ɛysak nə Moses.

⁹Moses nè nyak ɛ ŋwaale-Feyin ge: Wel liɛ nyam ge ɛy yɛ jɛɛle ɛsaŋ, ghàà əb sum əbchio ə ten. Ɛ́ lɛ nè nyak bek ka Feyine kiin shii se nyamse-a?

¹⁰Əb lɛ nè báà suuy lɛ nɛ lu bek ghɛsen-a? Ɛ́ nè nyak bek ghɛsen bek ge wel wɛ əb lemen ɛylem loo lem; nɛ wel wɛ əb tɛlen ɛsaŋ tɛle; ghene ghel ɛjim yɛ lu se yɛ chiyte ge ɛ́ nɛ̂y kiile ghɛ́ ghene ghɛ ɛsaŋ.

¹¹Ghɛs yiɛtemen kenəə ə Feyin se ghɛn ə tetem, bef ghɛ ka lòó ghɛn yɛ foo əbfua se ghɛs?

¹²Ka ghel ɛlee kiin əbtaawe se yɛ kiile əbfua se ghɛn, ghɛs lɛ báà se ki əbtaawe wɛ əb chian əbghene-a? Dî nɛ ghɛs nè báà liɛ ge ɛ́ ko kiile ge yika luun keleŋe kɛs se yɛ kiile. Ghɛs sɛ́y nè kule nɛ lu ɛytem se yɛ chii naa ɛ jii ɛykɛ, fɛ ghɛs báà jefse sakghɛ wɛ kum Christ ge əb jia yɛ nduu ɛ mbiy.

¹³Ghɛn ke wiy ge ghel ghɛ ɛ́ fɛ́len ɛ ndaa-ɛykokse lóó ɛ́ kiile əbfua-əbyíɛ́ne nə ghen kɛn fo-a? Nɛ ghel ghɛ ɛ́ chiysen Feyin ɛ ketatan ɛychiyse kiile wɛ́ ghene nɛ lu fo-a?

¹⁴Lu ghɛɛ-ghɛɛ ka Báàba nè suuyenmen ge ghel ghɛ ɛ́ fekten sakghɛ əbjuŋ lu se yɛ kiile əbfua-əbyíɛ́ne nə ghene ɛ ten.

¹⁵Dî nɛ mɛ báà liɛ ge mɛ ko kiile əbfua se ghɛn ge yika luun keleŋe kom se yɛ kiile. Mɛ báà se nyake lɛ kwaate ge ghɛne nɛ̂y yɛ foo kefaa se mɛ. Shi ge mɛ bif kefaa, yɛ jof ge mɛ kuo fɛ wel yi suuy ge mɛ ghaŋse əbghune lólò.

¹⁶Mɛ báà se lu se yɛ ghaŋse əbghun ge bek kɛn ka mɛ fekten sakghɛ əbjuŋ, bek ge lu kenəə kɛ mɛ luun se yɛ nɛɛy. Mɛ tɛn se yɛ fekte sakghɛ əbjuŋ fene mɛ liɛ lòn.

¹⁷Mɛ nè bóy se yɛ fɛl ɛyfɛl yin lɛ ge koŋ mɛ, é mɛ yɛ shii əbmakte, se lu nɛ nè vii Feyin ɛyfɛle yɛ́ tene se mɛ keghoo nɛ lòó mɛ jia tun.

¹⁸Əblaame ə wome lu naa ghɛ? Lu nsan yɛ mɛ kiin se yɛ fekte sakghɛ əbjuŋ se ghele bife wiy kefaa, liɛ wiy ge mɛ ki əbtaawe se yɛ kiile kefaa bek ɛyfɛle ten.

¹⁹Chèmè lu ka mɛ luun se mɛ ngeŋ wiy kekos se wel; mɛ lu nɛ mɛ liɛ ngeŋ ə yom ka kekos se wel əbjim ka mɛ kiile ghel se ɛydio se Christ.

²⁰Mɛ nè loo lu ɛ ghele Juuse məm, mɛ yɛ chii ka ghene, nɛɛye di ka mɛ kiile ghene se Christ. Mɛ loo lu ghɛse ghel ghɛ kɛ́ ghene luun se yɛ lɛm nɛ lu tesak ə Moses mɛ yɛ lɛm sɛy tesake tɛ́ tene (dî nɛ tesak nɛ̂ tine ghale wiy mɛ), nɛɛye di ka mɛ kiile se Christ ghel ghɛ kɛ́ ghene luun se lɛm nɛ lu tesak.

²¹Mɛ nè loo lu ghɛse əbtum wɛ ɛ́ chèmè keen wiy ɛysak ə Moses, mɛ yɛ chii ka wel wɛ əb báà se ke ɛysak nɛ̂ yin (dî ko ke ge ɛysak ə Feyine báà vəse mɛ, bek ka mɛ luun ɛ ɛyshaa ɛysak nə Christ) nɛɛye dì ka mɛ kiile ghene se Christ.

²²Mɛ nè loo lu ɛ məm nə ghel ghɛ ɛybeeme ə ghene boolen, mɛ yɛ lu ka ghene, nɛɛye dì ka mɛ kiile ghene se Christ. Ghele loo lu naa lɛɛy, mɛ benle è yɛ lu kɛn ka ghene, luŋe naa jii sejim se boyse ɛlee ɛ ghene məm.

²³Mɛ nɛɛy əbnəə vin əbjim ge kenəə kɛ kum sakghɛ əbjuŋ ndu kɛn ɛ mbiy, é mɛ nɛ̂y kiile sɛy ɛybose yɛ sakghɛ əbjuŋe gwiyen so.

²⁴Ghɛne báà se ke ge ghele sɛɛnen kenyiŋen, nɛ̂y liɛ kɛn wel əbmok əbmakte-a? Ghɛn yɛ nyiŋ yi ɛ jii yɛ ghɛne nɛ̂y kiile əbmakte.

²⁵Naa ndɛ wɛ əb bááten se sɛɛnen kensɛɛnen sɛɛ mom se loote se ghale ngeŋ wen. Wele lóó əb baaté di se kiile əbmakte wɛ əb mɛyen, dî nɛ ghɛsen sɛɛnen se kiile əbmakte wɛ əb jia yî mɛy.

²⁶Lu se mɛ nɛ mɛ báà se nyiŋe se nchɛk se nchɛk. Mɛ báà se lu ka wele fenkam wɛ əb loo əb yɛ fun nɛ lu əbfiɛf.

²⁷Mɛ wefte ngeŋ ə yom gese ghale ketaan buu dî é ke yɛ lu ge mɛ fekte kenəə ə Feyin se ghele, è lɛy se lólò se mɛ ngeŋ.