Read Oku 2Kl 1 Bible Online

2Kl 1 - Oku bible

2Kl 1

¹Ŋwaale yin lòò se mɛ Bool; nè chok Feyine mɛ se wele ntum nə Jesus Christ. Lu ghɛse wan-nyii Timoti. Mɛ nyake ŋwaale yin se kenchintene ghel ə Feyin kɛ ke luun ɛ Kolɛn, nɛ̀ se ghel ə Feyin naa ɛjim ghɛ ɛ́ luun ɛ ntaam Akaia naa ɛyjim.

²Feyin wɛ Ba ə wɛsen ghene Báàba Jesus Christ ko cham ɛysen ə yɛn è fo əmnyiaŋ se ghɛn.

³Ghɛsen yɛ kokse Feyin. Əb lu Bay se Báàba ə wɛsen Jesus Christ. Lu wen wɛ əb koosen ɛysen se ghele, lu wen Feyin wɛ əb njiysen ghel jii sejim.

⁴Əb njiyse ghɛsen ɛ ngɛk sejim sɛ ghɛsen yɛ́nen ka ghɛsene keele ka lòó ɛ́ njiyse sɛy ghel ghɛ ɛ́ yɛ́nen ngɛk, njiyse ghene kɛn ɛ jii yɛ Feyine njiysen ghɛsen.

⁵Ka ghɛsen yɛ́nen ngɛk ka Christ nè yɛnen, lu kɛn ghɛɛ-ghɛɛ ka Feyine loote njiysen ghɛsen bek Christ.

⁶Ghɛse yɛne ngɛk fene ghɛse yɛne ka ghɛne kiile ɛygiamten è boy. Yɛ lu wɛ ge ɛ́ njiyse ghɛs fene ɛ́ kò njiyse nɛ lu ghɛn ka ghɛne kiile kediak se kul ɛytem se yɛne ngɛk sɛ ghɛse yɛ́nen sɛy.

⁷Ghɛs ki ɛykwaate se ghɛn, maanen wiy ge ghɛne yɛne ngɛk kɛn ka ghɛs nè yɛnen nɛ lu ghɛɛ-ghɛɛ ka Feyine nɛ̂y njiyse ghɛn ka əb njiysen ghɛs.

⁸Ghone-nyii, ghɛse kɛŋe ge ghɛn ko keele ɛynkii ngɛk sɛ ghɛs nè yɛnen ɛ ntaam Asia. Kediile kɛ ghɛs nè bɛɛyen fo nè chia əbtaawe ə wɛs ɛ jii yɛ ghɛs nè yɛnen ge shi kɛn ɛykuo lɛ.

⁹Ghɛs nè yɛne kɛn naa ge ghɛs kuomen kuon. Dî nɛ kii nɛ̂ kine nè gan se nɛɛy ge ghàà ghɛs yɛ samse ngeŋ ə sɛs, è yɛ samse nɛ lu Feyin, wen wɛ əb losen ghel se ɛykuo.

¹⁰Lu wen wɛ əb nè boysen ghɛs se ngɛk yɛ nè lòó ɛy gwiy nɛ̀ ɛykuo, nɛ əb nɛ̂y boyse ghɛs, se lu nɛ ghɛse lɛmen ɛykwaate ə yɛ́s ɛ wen əbghun ge lu wen wɛ əb yî boyse ghɛs.

¹¹Ghɛn yɛ giamtene jɛm se ghɛs sɛ̂y. É Feyine náà me bose ghɛs bek ɛyjem yɛ ghel se ɛydio jemen se ghɛs, é ghel se ɛydio me yɛ foo ɛykokse se wen bek ghɛs.

¹²Ghɛse ndiale ka ghɛs keen kelaanen ɛ ghɛse tetem ge ɛychii ə yɛ́s ɛ mbi fɛn naa nɛ̀ se ghɛne məm, nè laane gese lu ɛ titiy ka Feyine nè giamten. Nè báà nɛɛy ghɛs nɛ̀ ɛytofe yɛ̂ ketuu ntiɛ, dì nè nɛɛy Feyin bek ɛycham ɛysen nə wen.

¹³Əbnəə wɛ ghɛse nyaken se ghɛn lu kɛn wɛ lòó ghɛn jaŋ è keele ge ɛ́ sɛ suuye gee ghɛ-a, nɛ mɛ kwaate ge ghɛne yî loote keele kenəə kɛ ghɛse nyaken,

¹⁴kɛn ka ghɛn kɛɛtenmen se yɛ ke ka ɛ náà loo lu ɛ kechii kɛ Báàba Jesus kase gwiyen é ghɛn yɛ ndial kum ghɛs ghɛɛ-ghɛɛ ka ghɛse ndialen kum ghɛn.

¹⁵Se lu nɛ mɛ nè loote ke ge ke lu di, è me se kɛŋe ge mɛ chia mbiy è ghan ghɛn ka ghɛne saŋle, é mɛ ndu kase lóó gwiy è ghan ghɛn é ghɛn gese saŋle.

¹⁶Mɛ nè lɛm ge mɛ loo ndu ɛ Masedonia, è tosen è ghan ghɛn, è nɛ̂y kase loo fiile è gese tosen é ghɛn me giamten mɛ é mɛ ndu se Judea.

¹⁷Mɛ nè báà se chiile chiilen ɛ əbliy wɛ mɛ nè baaten ɛyjɛl nɛ̂ yin. Nɛ mɛ loo baate kenəə ə kom, ghàà mɛ yɛ baate ka wele-mesoŋe wɛ əb beemen ɛ leenen ge ɛɛn, è loo benle əb kase tun ge aay.

¹⁸Ka ke luun ge Feyine sɛɛ suuy kɛn əbluuy lu nɛ əbnəə wɛ ghɛs nè suuyen se ghɛn lu nɛ báà se lu wɛ beeme ge ɛɛn, è ko gese tun ge aay.

¹⁹Jesus Christ, dii wan Feyin wɛ ghɛse Silas, nɛ̀ Timoti nè fekten kum wen se ghɛn dì nè báà se lu wel wɛ bééme kenəə ge ɛɛn, è ko gese tun ge aay. Di lu kɛn naa wen əbluuy se kii dii ke Feyine kɛŋen.

²⁰Lu wen wɛ əb nè lunsen tekak tejim tɛ Feyine nè kakenmen. Ghɛy kenəə kɛ ghɛsen loo ɛ́ suuy ge: Amen, ɛ ɛyghel nə Jesus Christ se kokse Feyin.

²¹Lu Feyin wɛ əb nɛ́ɛ́yèn nɛ ghɛsen tiy ketaan ka ghel ə Christ. Əb nè chok ghɛsen ge ghel ə ghi,

²²è chəysen nɛ̀ əbchəysene wene, əb nè vii Keyioy Kelanene ɛ ghɛsene tetem se din ge yi tiy se nɛɛye kenəə kɛ yi nè kakenmen se ghɛsen.

²³Feyine ke ɛytem ə yom ge mɛ nè báà kase gwiy se Kolɛn bek ka mɛ nè babten ghɛn.

²⁴Ke báà me se lu ge ghɛse kɛŋe se kane ghɛn ge ghɛn ko lu se beeme kenəə kɛ ghɛse suuyen kum ɛytem yɛ ghɛn foon se Feyine. Ghɛs ke ge ghɛn tiy ketaan ɛ ghɛn ɛybeeme. Ghɛs dì mome nɛ lu ge ghɛsen yɛ fɛl se kefaa kemok ka ghɛne yɛ saŋle.