Read Oku 2Kl 11 Bible Online

2Kl 11 - Oku bible

2Kl 11

¹Mɛ lone ge ghɛn yióté é mɛ ngoo kome kɛ kenəə se ghɛn se ɛylaay. Kiy ghɛn, ghɛn ko yiote.

²Mɛ baŋe ɛshiɛ ə ghɛn nɛ̀ ke mbàŋe shiɛ kɛ ke lòòn se Feyine. Mɛ lu nɛ mɛ kakmen se foo ghɛn se wel əbmok ka lum ə wɛn, mɛ lu nɛ mɛ chaksemen ghɛn ka wán əbful è fo se Christ.

³Dî nɛ mɛ fane ge tame wel lɛɛse ghɛn kɛn ka Satan nè lɛɛsen Ev nɛ̀ kenlife wene, é tekwaate tɛne shiken è jia bo yɛ laane fɛ ghɛn loote lɛm ketuu ə kɛn se Christ.

⁴Mɛ suuy lɛ bek ka wele ndu se kwaysen kɛn kwaysen kenəə kechine kum Jesus ndun se kɛ ghɛs nè fekten, yɛ lu nɛ ghɛne beememen beemen; kene ŋwɛle suuye ge ghɛn kiile keyioy kechine ndun se Keyioy Kelanene kɛ ghɛn nè kiilen, kene sakghɛ əbchin ndun se sakghɛ əbjuŋ wɛ ghɛn nè fiisen se ghɛs.

⁵Mɛ báà se kwaate ge “Ghɛ ntum ɛtaa nə ghɛn nɛ̂ ghi” chia mɛ ɛ fenəətese naa se nkan.

⁶Mɛ chèmè kè loo è jia yɛ ke se suŋnen, fene baa me se lu ge mɛ ke wiy əbnəə. Ghɛs lu nɛ ɛ́ mommen əbliy əbjim ɛ jiise jiise se nɛɛy ge ghɛn keele kii nɛ̂ kine.

⁷Mɛ nè səkse ngeŋ ə yom è fekte kenəə ə Feyin se ghɛn se lólò ka mɛ lose ghɛn, se lu kejas-a?

⁸Mɛ nè fekte kenəə ə Feyin se ghɛn nɛ ɛygiamten ə yome lòò nɛ lu se əbnon əbchine, boo ghene ka mɛ giamten ghɛn.

⁹Nè lu ɛ əbliy wɛ mɛ nè luun ghɛsen, è tan kefaa ghàà mɛ yɛ foo ngɛk se wel. Ghone-nyii ghɛ Masedonia nè foo əbfua əbjim wɛ mɛ nè shiin. Mɛ nè lɛm lɛmen ge mɛ jia yî yɛ foo ngɛk se ghɛn ge ghɛn giamten mɛ, nɛ mɛ ko bo lɛme di.

¹⁰Kɛ əbluuy nə Christ wɛ ə́b luun ɛ mɛ məm, lòó mɛ jia yî gok ghàà yɛ ghaŋse əbghun ɛ ntaam Akaia fɛn naa ɛyjim.

¹¹Mɛ nɛɛye di é ke yɛ din ge mɛ bane ghɛn-a? Feyine ke ge mɛ koŋe ghɛn.

¹²Mɛ yɛ nɛɛy ndu kɛn nduun nɛ̀ kenəə kɛ mɛ nɛɛyen ɛ leenen, ka nsane jia yɛnsen se ghele ghii ghɛ ɛ́ kɛŋen jii yɛ əbnəə yɛ fəyke nɛ ghene ghaŋse əbghun ge ghene ko fɛle sɛy ɛ jii yɛ ghɛse fɛ́len.

¹³Ghel nɛ̂ ghine di lu ntumse əbbuam, fɛle ɛyfɛle nfefsese, sume tekek ka ɛ́ yɛ yɛnsen ge ɛ́ lu ntumse Christ.

¹⁴Ɛymaanene wiy kum kenəə kɛ ghene nɛɛyen bek ka Satane summen ɛykek əb yɛ yɛnsen ka nchiy-ndaa-Feyin yɛ ɛy kiin ɛyban.

¹⁵Me se lu nɛ lòó ke jia yɛ ghake ghɛsen ghaken ge ghel ɛyfɛl nə wene sume tekek ka ɛ́ yɛ yɛnsen ge ghene fɛle ɛyfɛle yɛ́ titiye. Ngɛk sɛ ghene yî kiile ɛ kenləysen yî yɛ lu kɛn ka əbnəə wɛ ghene nɛɛyen.

¹⁶Mɛ gese suuy kenəə nɛ̂ kin se ghɛn ge: Ghàà wel yɛ kwaate ge mɛ lu kengoo; dî nɛ ghɛn chèmè ke kwaate di, yɛ jof ge ghɛn liɛ yi mɛ ka kengoo ka mɛɛ-mɛ bóŋ è din əbghun se ɛylaay.

¹⁷Kenəə kɛ kum ɛydin əbghun nɛ̂ kin kɛ mɛ suuyen, lu nɛ ke baa lòò se Báàba. Mɛ suuy ka kengoo.

¹⁸Ka ghel se ɛydio se dinen əbghun ɛ jii nə mbi, mɛɛ-mɛ yɛ bóŋe dine wome.

¹⁹Ghɛne yɛne ge ɛ́ tofe, è ko se saŋle se yiote se əbngoo-a!

²⁰Ke lu əbluuy ge ghɛn vəsemen ghel ɛ́ bense ghɛn se kekos, è lɛɛse ghen è fii əbfua wɛn, è koo ghɛn, è lose ɛyvəye ghen, è nyable nɛ̀ ghɛn.

²¹Mɛ ghuumen se suuy se ghɛn ge ghɛs nè sane naa se ŋaŋ se jia se nɛɛy sɛy əbnəə wɛ́ tene se ghɛn. Mɛ ndu ɛ mbiy se gese se suŋnen se ghɛn ka kengoo ge, wele dine əbghun kum naa ghɛ, fene mɛ ko lòó mɛ din sɛy əbghun ɛ kenəə nɛ̂ fo.

²²Ghene chèmè dine ge ghene lu ghele Heblu fene mɛ ko lu wele Heblu, è yɛ din ge ɛ́ lu ghele Islael fene mɛ ko lu wele Islael, è yɛ din ge ɛ́ lu ghon ə Ablaham, fene mɛ ko lu wan ə Ablaham.

²³Ghene chèmè kè suuy ge ɛ́ lu ghel ɛyfɛl nə Christ fene mɛ chia ghene ɛyfɛl nə Christ. (Mɛ se suŋnen ka lɛ̀y ɛytof mɛ.) Mɛ liimen nchak ɛ ɛyfɛl nə Christ è chia wel əbjim è ndu nɛ̀ əbtəme, ɛyfɛle yome chia yɛ wel əbjime, ɛ́ tɛlmen mɛ nɛ̀ ngwanse ɛkaŋ nɛ lòó wel jia bo taŋ. Mɛ sòymen ɛykuo ɛ kaŋ ɛ kaŋ.

²⁴Ghele Juus lu nɛ ɛ́ tɛlmen mɛ kaŋ ɛtan; loo lu naa ɛ leghɛ ɛ́ ko tɛl mɛ ngwanse njiose-buumok əmmtal.

²⁵Ɛ́ tɛlmen mɛ kaŋ ɛtal nɛ̀ mbàŋse. Ɛ́ təmlemen mɛ nɛ̀ ɛtiye ge ɛ́ yúy kaŋ ɛymok. Kenəke nè saktemen nɛ̀ mɛ ɛ jio ɛyghuy kaŋ ɛtal, mɛ nè chiimen ɛ məme jio, è bvəs è yese ɛ məme jio.

²⁶Mɛ nè jɛle naa se ŋaŋ, jio boy se liɛ mɛ ɛ kaŋ ɛ kaŋ, ɛchoŋe boy se yuye mɛ ɛ kaŋ ɛ kaŋ. Ghel ghɛ ghome ko nè bume mɛ bumen se yuy. Ghele əbtume boy se yuye mɛ ɛ kaŋ ɛ kaŋ. Nè lu ɛ məm ɛylak ɛykuo soy mɛ, è ko soyle mɛ ɛ əbkwak. Se lu ka mɛ nè jɛ́len ɛ jio ɛyghuy, ɛykuo ko nè soyle kɛn mɛ soylen. Ghel ghɛ ɛ́ nè fəfsen ge ɛ́ lu ghel ɛbeemene ko nè soyle se yuye mɛ yúyén.

²⁷Mɛ nè kome bàbàŋ, yɛne ngɛk, chii ɛyyio əbchii se ɛydio, lu se jeŋ, nè kefaa wiy se nəə; tane əbfua-əbyíɛ́ne ɛ kaŋ ɛ kaŋ, chii əmnton, ghàà ndəyse, ghàà ndaa.

²⁸Se gise se əbnəə nɛ̂ ghan, se lu kechii, nɛ̀ kechii nɛ ɛyfɛle yiike mɛ ka mɛ luŋen ge əbnchintene ghel ɛbeemene yɛ lu kejuŋ

²⁹Mɛ yɛn nɛ wele bol se ɛybeeme, əbghune ko bol sɛ̂y mɛ; yɛ lu wɛ wel nɛɛy é wel diamten è nɛɛy mbee, kenəə tene fo ngɛk se me se ŋaŋ.

³⁰Lu ge mɛ yɛ yio əbghun é mɛ yɛ yio nɛ lu əbnəə wɛ əb dinen ge mɛ boolee.

³¹Feyin, Bay se Báàba ə wɛsen Jesus, wɛ ghɛsen koksen əbliy əbjim ke ge mɛ báà se yia yian.

³²Nè lu ɛ Damaskus, kebɛ̂y ə əbfon wɛ Aletas kɛ ke nè saken fo, lam ghɛ nchiye tɛk mɛ jii sejim ɛ ntɛk nɛ̂ fo ge ɛ́ sɛ koo-a?

³³Dî ɛ́ lete mɛ è səkse ɛ nkaa, ɛ nsan ɛ əbghune ndaa, ɛ kengɛy; mɛ lɛk fɛ əb koo mɛ.