Read Oku 2Kl 12 Bible Online

2Kl 12 - Oku bible

2Kl 12

¹Mɛ ko yɛ ndial kɛn ndialen, chèmè lu ka kendin əbghune báà se ki sɛk. Mɛ ndu ɛ mbiy se suŋnen kum kuumese gese nɛ̀ əbnəə kenlete wɛ Báàba nè dinen se mɛ.

²Mɛ ke wel əblee nɛ əb fó ɛytem se Christ, nɛ ngukse chiamen ɛ leenen njio-sekɛɛk ɛyvəm ka Báàba nè liɛn wen è kok è ndu è yim so se ɛyyio yɛ ɛyngaŋten è chia ghaa Feyine luun. Kene əb nè kok nɛ̀ əbghune wen əbjime, kene di nè kok keyioy wen, fene mɛ ke wiy, dì ke kɛn Feyin.

³Mɛ ke ge ɛ́ nè lô kok nɛ̀ wel nɛ̂ vin se ɛyyio, kene ɛ́ nè kok so əbghun əbjim, kene ɛ́ nè kok kɛn nɛ̀ keyioy ə wene; fene mɛ ke wiy; dì ke kɛn Feyin.

⁴Wel nɛ̂ vin nè kok dî è yio əbnəə nɛ wel lòó əb jia keele se fek, wele-mesoŋe báà se lu se yèŋte ɛynkii əbnəə di.

⁵Lu bek wel nɛ̂ vin é mɛ yɛ ndial, nɛ lòó mɛ jia yɛ ghaŋse əbghune kum ngeŋ ə yom se nkan buu yi kɛn ge mɛ boolee.

⁶Kè loo lu mɛ yɛ yio əbghun é jia yɛ lu ge mɛ ngoole ngoolen; bek ka mɛ yɛ suuy nɛ lu kɛn əbluuy. Se lu nɛ mɛ báà se yio əbghun fɛ wel yɛ kwaate kum mɛ chia kefaa kɛ mɛ luun keghene əbnəə wɛ mɛ suuyen gese nɛɛyen.

⁷Feyine nè din se mɛ ɛ jii ɛykanen ge ghaa mɛ yɛ yio əbghun ɛ əbnəə kenlete wɛ əb nè dinen san. Əb nè vəse ge mɛ yɛ yese yio ɛylum ɛ mɛ əbghun ka soo njoŋ mɛ, è buu ɛychoken, ngwan yɛ Satan nè liɛn se yɛ́ tɛle mɛ so.

⁸Mɛ nè lonmen se Báàba kaŋ ɛtal ge əb ko chuk yi ɛyyaf nɛ̂ yin se mɛ əbghun.

⁹Əb suuy san ge “Ɛycham ɛysen nə mɛ se wɛ̀ lu ɛykwɛnten, kediak ə kome di lòó ke yɛ loote yɛnsen nɛ lu əbghun nə wel əbbol.” Ke me se lu ge mɛ yɛ yio əbghun ɛ leenen nduu kɛn ɛ mbiy bek ka me taan wiy, ka kediak ə Christe yɛ fɛl ɛ mɛ məm.

¹⁰Bek Christ mɛ me se koŋe se yɛ boole, fii ndiyse, yɛne ngɛk, nɛ ɛ́ nəkse mɛ, nɛ mɛ kome bàbàŋ. Mɛ di loo boole mɛ sɛy me yɛ taa.

¹¹Mɛ loomen è ghaŋse əbghun ka kengoo nɛ ko nɛɛy ghɛn ge mɛ nɛɛy di bek ge nè lu ghɛn se yɛ bente mɛ. Chèmè lu ka mɛ wiyen kefaa; lu nɛ ghel ə ghɛn ghɛ ghɛne yɛ́nen ge lu ghɛ ntum ɛtaa ghii baa chia mɛ naa se nkan.

¹²Mɛ nè lô kul ɛytem è nɛɛy əbnəə ɛ ghɛne məm wɛ əb dinen ge mɛ lu nkante wele ntum nə Jesus, mɛ nè din əbchəyte, è nɛɛy əbnəə əbkanene, gese nɛ̀ əbnəə əbchio əbyúméné.

¹³Mɛ lɛ nè lô kiy ghɛn lolo ge ghɛne báà mɛy əbnone ghele Feyin əblee-a? Buu yi kɛn ge mɛ nè báà se foo ngɛk se ghɛn ge ɛ́ yɛ yíɛ́se mɛ. Ghɛn lɛyse yi kejas nɛ̂ kin se mɛ.

¹⁴Ke lu ɛ leenen nɛ mɛ kɛŋe se gwiy ge kaŋ ɛtal se ghane ghɛn. Mɛ nɛ̂y gwiy è jia yɛ foo ngɛk ge ghɛn giamten mɛ, bek ge mɛ báà se shii nɛ lu əbfua ə wɛn. Mɛ shii nɛ lu ghɛn. Di báà se lu ghon se yɛ bááte əbfua se yɛ liye ɛbaa ghen so, lu ɛbaa ghon se yɛ bááte əbfua se yɛ liye ghon ə ghen so.

¹⁵Ke me se lu ge, lòó mɛ yɛ saŋle se mɛyse əbfua wɛ mɛ kiin əbjim, se gese se mɛyse ngeŋ ə yom bek ghɛn. Mɛ koŋe ghɛn se ŋaŋ lɛ ghɛn se koŋe mɛ se ɛylaay bek ghɛ?

¹⁶Yɛn yi ka mɛ nè báà se foo ngɛk ge ghɛn giamten mɛ, ko se lu ge mɛ wɛ mɛ bɛɛne tofen lɛ, nè lô koo ghɛn se ɛytof.

¹⁷Ke cheme lu ge mɛ nè tume ghel di, əblee nɛ̂y gwiy è se səəke əbfua wɛn-a?

¹⁸Mɛ nè lô lam ge Taytus ndu baksen ghɛn, è tum wán-nyii əblee ge ghene wen gwiy. Taytus nè báà səəke əbfua ə wɛn. Moo əb nè lô səəke-a? Ghɛs lɛ nè báà ko se lu kɛn di-a; nɛɛy kɛn əbnəə ɛ jii ɛymok-a?

¹⁹Ghɛn chèmè nè lô se kwaate ge ghɛs nè taŋle nɛ lu ɛychio yɛ́s se ghɛn-a? Ghɛs dì nè suuy nɛ lu kɛn kenəə kɛ Christe kɛŋen ge ghɛs yɛ suuy ɛyshiɛ nə Feyine. Kenəə kejim kɛ ghɛse nɛɛyene ghone-nyii lu se giamtene ghɛn ka ghɛne yɛ taa.

²⁰Mɛ fane ge tame mɛ nɛ̂y gwiy è yɛn nɛ ghɛn wiy ka mɛ kɛŋen ge ghɛn yɛ lu, é ghɛn gese yɛn nɛ mɛ wiy ka ghɛne kɛŋen ge mɛ yɛ lu. Mɛ fane ge mɛ gwiy è yɛn nɛ ghɛn kume əbchio, ghɛke kenghɛk, yafse ɛytem, ŋwɛye keŋwɛy, kale əmnaŋ, make koghoŋ, yio əbghun, nɛɛy əbnəə nɛ̀ ɛybame.

²¹Mɛ fane ge mɛ nɛ̂y kase gwiy se yɛne ghɛn é Feyin Fɛ mɛ koksen nɛɛy é mɛ səkse ngeŋ ə yom ɛ ghɛn ɛyshiɛ. Lòó ke me yɛ lu ge mɛ nɛ̂y yɛ lu se yɛ diy diyen bek ghel ghi ghɛ ɛ́ nè nɛ́ɛ́yèn mbee se mbiy, dî se lu nɛ ghene bɛɛy ghàà kubsen se ghene jione, se kenjaŋ, nɛ̀ se ɛychii buose yɛ ghene nè kiin.