Read Oku 2Kl 13 Bible Online

2Kl 13 - Oku bible

2Kl 13

¹Mɛ nɛ̂y yɛ gwiy se ghane ghɛn ɛ leenen ge kaŋe ghom ɛtal. Mɛ gwiy wele yɛ suuy ge lɛɛ kenəə kɛ wel əblee jasen, fene ŋwaale-Feyine dine ge əb yɛ suuy dì nɛ ghel ghɛ tokten kenəə kɛ əb suuyen lu ɛbaa kene ɛtal.

²Mɛ tefe ghel ghi ghɛ ɛ́ nè jasen se mbiy, gese mɛyse tefe ghel ɛjim; mɛ tefe ghene ɛ leenen wɛ mɛ wiyen ghɛsen, ghɛɛ-ghɛɛ ka mɛ nè tefen əbliy wɛ mɛ nè luun ghɛsen ɛ kenkumte ɛyghan nə mɛ, ge mɛ nɛ̂y gwiy é mɛ jia yɛ beŋte wel beŋten. Wele jia nɛ̂y yɛ lu nɛ əb nè lômen nɛɛy mbee wɛ mɛ jia nəkse.

³Ghɛne luŋe naa se ŋaŋ ge ɛ́ yɛn se əbluuy ge sɛ suŋnen Christ ɛ mɛ məm-a? Christ di baa se boolee, əb loo lu se kule ghɛn ghaa əb yɛ yiose ɛghoo yiòsen. Əb di loote dine kediak ə wen ɛ ghɛne məm.

⁴Ke lu se əbluuy ge əb nè báà din kediak əbliy wɛ ɛ́ nè banten wen se kentam. Dî nɛ əb chii ɛ leenen ɛ kediak nə Feyine. Ghɛs ka ghele wene boolee sɛy, dî ɛ kenəə nə ghɛn, ghɛs se lu se yɛ chii ghɛse ghe wen ɛ kediak kɛ kɛ́ Feyine.

⁵Ghɛn mom yi ngeŋ sɛn è yɛn ge ghɛn ko chii ka ghel ghɛ́ foon ɛytem se Feyine-a? Ghɛn kiynen yì ngeŋ sɛn. Ghɛn lɛ baa yɛn ge Jesus Christ lu ɛ ghɛne məm-a, buu yi ge ghɛn di mommen ngeŋ sɛn è yɛn nɛ ghɛne báà kok è chin fekɛɛy ə ghel ə Christ.

⁶Mɛ ke se əbluuy ge ghɛne yɛne ge lu se ghɛs nɛ ghɛse báà buu se chin ɛ fekɛɛy nɛ̂ fo.

⁷Ghɛse jeme se Feyine ɛ leenen ge ghaa wel se ghɛn jas kenəə. Shii ə wɛse báà me se lu dî ge fekɛɛy ə fɛse lu nɛ fe kok è chin. Shii wɛs di lu kɛn ge ghɛn ko yɛ nɛɛy kenəə kɛ ke luun ɛ titiy, ka ghɛse cheme yɛ yɛnsen ka fekɛɛy ə fɛse koke chine wiy.

⁸Ghɛs di lòó ɛ́ jia nɛɛy kenəə kɛ əbluuye wiyen ɛ ten. Ghɛse kɛŋe nɛ lu kɛn kɛ əbluuye.

⁹Ghɛse saŋle saŋlen əbliy wɛ ke yɛnsen ge ɛybeeme yɛse boolee nɛ yɛne taa. Nɛ ɛyjeme yɛ́se lu ge ghɛn yɛ loote taa.

¹⁰Mɛ nyak lɛ ka ghɛne kubsen nɛ mɛ bɛɛy ghaa gwiy, ɛ́ nɛ̂y yɛ lu ka mɛ gwiyen é mɛ jia yɛ chɛfke se dine əbtaawe ə wom; əbtaawe nɛ Báàba nè fo san ge mɛ yɛ bâklè ghɛn so baklen, nɛ wiy ge mɛ yɛ sakte ghɛn sakten.

¹¹Se yɛ ləysene ghone-nyii, é mɛ yɛ suuy ge, ɛ́ yɛ bɛɛse. Ghɛn yɛn ge ghɛn lu nɛ loote siyse əbnəə. Kiy ghɛn, ghɛn loote yio kenəə kɛ mɛ suuyen kin. Ghɛn yɛ ki ɛykwaate ɛymok. Ghɛn yɛ fəy kejuŋ. É Feyine Fɛ ɛykoŋe ghene əmnyiaŋe loon se wen yɛ lu ghɛne ghene.

¹²Ghɛn chakte ngeŋ ə sɛn è bamnen ka ghel ɛbeemene.

¹³Ghel ɛbeemene ghɛ ɛ́ luun fɛn ɛjime tinse ɛychakte ghen.

¹⁴Báàba Jesus ko cham ɛysen se ghɛn é Bay Feyin din ɛykoŋ se ghɛn, é Keyioy kelanene yɛ lu ɛ məm nə ghɛn wel əbjim.[1]