Read Oku 2Kl 2 Bible Online

2Kl 2 - Oku bible

2Kl 2

¹Mɛ nè baa se kɛŋe se nɛɛy ge ghɛn yɛ yio ɛyyaf; ghɛy kenəə kɛ ke nè nɛɛy mɛ liɛ ge mɛ jia bo kase ghan ghɛn.

²Mɛ lɛ kè nɛɛy ge ghɛn yɛ yio ɛyyaf, é bo nɛ̂y nɛɛy ndɛ ge mɛ yɛ yio əbjuŋ buu ghɛn ghɛ mɛ kè nɛɛyen ge ɛ́ yɛ yio ɛyyaf.

³Mɛ nè nyak ɛynkii ŋwaale yɛ mɛ nè nyaken dî fɛ mɛ gwiy è yɛ yio nɛ lu ɛyyaf se ghel ghɛ ɛ́ kè luun se nɛɛy ge mɛ yio nɛ lu əbjuŋ. Mɛ ke se əbluuy ge mɛ loo è yɛ saŋle é ghɛsen yɛ saŋle ghel ɛjim.

⁴Mɛ nè nyake se ghɛn dî yio ɛylum nɛ ɛytem ə yome foo ngɛk san se ŋaŋ, nɛ̀ əmshiɛme ɛ mɛ ɛshiɛ. Mɛ nè báà se nyake dì se nɛɛy ge ghɛn yɛ yio nɛ lu ɛyyaf. Mɛ nè nyake se nɛɛy ge ghɛn keele ge mɛ koŋe ghɛn se ŋaŋ.

⁵Wel kè lòò è nɛɛy kenəə keyafene, fene əb báà nɛɛy kɛn se mɛ, fene əb ko nɛɛy naa se ghɛn ghel ɛjim sɛy. Mɛ báà se bɛmse bɛmsen kenəə nɛ̂ kin.

⁶Ngɛk yɛ ghel ɛdione foonmen se wen bek kenəə nɛ̂ kin lu ɛykwɛnen.

⁷Kenəə kɛ lòó ghɛn nɛɛy ɛ leenen sɛ́y bò lu se lɛyse kejas ə wen, se njiyse wen fɛ nkwaate báà yuy wen.

⁸Mɛ me se lone ge ghɛn ko nɛɛy é əb yɛ ke ge ghɛn bo koŋe yi.

⁹Kenəə kɛ ke nè nɛɛyen ge mɛ nyak ŋwaale yin se ghɛn nè lu se mom se yɛn ge ghɛn lɛ ko nɛɛye əbnəə əbjim wɛ mɛ dinen se ghɛn-a.

¹⁰Ghɛne lɛyse kejase wel, mɛ lɛyse sɛy se ŋwɛl. Naa kejas kekɛ kɛ mɛ lɛysemen ɛ lefɛ mɛ dì luun se lɛyse kejase wel lu nɛ mɛ lɛyse nɛ lu ɛyshiɛ nə Christ bek ghɛn.

¹¹Mɛ nɛ́ɛ̀y ɛ jii nɛ̂ ghan, ka Satane jia bó yɛ ki nsan yɛ chia ɛ ten è kiile ghɛsen; ghɛsen báà se maa ntaŋse ə wen.

¹²Nè lu ka mɛ nè gwiyen ɛ Tloas se fekte sakghɛ əbjuŋ wɛ kum Christ, Báàba nè lô din jii se mɛ.

¹³Se lu kɛn ge ɛyteme yome nè lô fo ngɛk san bek ka mɛ nè báà baksen wán-nyii wɛ Taytus. Mɛ me chakte ghel, è tosen è ndu se Masedonia.

¹⁴Mɛ loote bɛɛle Feyin, əb nɛɛy əbliy əbjim nɛ ghɛs tome ɛyghɛl chia ka ghel ghɛ ɛ́ yiɛn ɛyghoŋ, nɛ Christ nduu ɛ ghɛs ə mbiy. Əb giamtene nɛ ghɛs nɛɛye nɛ kenəə kɛ kum Christ saankene əblik əbjim ka keləm kejuŋe nɛ ghele keelee.

¹⁵Ghɛsen lu ka keləm kejuŋe kɛ Christ gwiyen so se Feyine nɛ ke nduu ɛ məm nə ghel ghɛ ɛ́ bóyèn gese nɛ̀ se məm nə ghel ghɛ ɛ́ lɛ́yèn.

¹⁶Keləme tene lu keləm ɛykuo se ghel ghɛ́ lɛ́yèn, nɛ se ghel ghɛ́ bóyèn lu nɛ lu keləm ɛychii. Lu ndɛ kekwɛnten se nɛɛy ɛynkii ɛyfɛl ka yine?

¹⁷Ghɛse báà se lu ka ghele ghii ghɛ ɛ́ shiken əbwɛy nɛ̀ kenəə ə Feyine. Ghɛse suuy kɛse nɛ lu kenəə kɛ́ əbluuye ɛyshiɛ nə Feyine ka ghel ghɛ ɛ́ fɛ́len se Christ bek ka tumen Feyin ghɛs.