Read Oku 2Kl 3 Bible Online

2Kl 3 - Oku bible

2Kl 3

¹Ke chèmè dine ge ghɛs lòòmen è se dine nɛ lu əbghun-a? Ghɛs dì báà se shii se gwiy nɛ̀ ŋwaale se ghɛn, kene se fii ŋwaale sɛ se dinen ghel ghɛ ghɛs luun ɛghene ka ghel ɛlee nɛɛyen.

²Ghɛn se ghɛne ngeŋse lu yɛ̂s yɛ ŋwaale nɛ ɛ́ nyak nɛ lu ɛ ghɛse tetem, ghel ɛjime se jaŋe keele kenəə kɛ ɛy dinen.

³Ke lu kelaanen ge ghɛn lu ŋwaale yɛ Christ nè nyaken, yɛ ɛy dinen ɛyfɛl ə yɛ́s. Əb báà nyak nɛ lu nɛ̀ ketiɛ ŋwaale, əb nyak nɛ lu nɛ̀ Keyioy ə Feyin fɛ fe kiin ɛychii, è jia nyak nɛ lu əbwaŋ ɛytiy, è nyak nɛ lu ɛ ghele tetem.

⁴Ghɛse suuy kii nɛ̂ kine maanen wiy maanen ka ghel ghɛ Christ nɛɛyen ɛ́ fó ɛytem se Feyine se geese fɛl ɛyfɛl nɛ̂ yin.

⁵Ghɛs di báà se suuy ge ghɛs lu kekwɛnten se nɛɛy ɛyfɛl nɛ̂ yin. Kediak ə kɛse dì lòò nɛ lu se Feyine.

⁶Nɛɛy wen ge ghɛs yɛ lu kekwɛnten se yɛ fɛl ɛ kenəə kelek kefɛɛ, kelek nɛ̂ kine wiy tesak tɛ ɛ́ nyaken nyaken. Lu kelek kɛ luun kɛ́ keyioy ə Feyine. Tesak tɛ ɛ́ nyaken nyaken gwiye nɛ̀ ɛykuo dî nɛ keyioy ə Feyine foo ɛychii.

⁷Ɛysak yɛ Moses nè gwiyen so lu nɛ ɛ́ nè nyak nɛ lu əbwaŋ ɛytiy nɛ ɛy dine nɛ lu ɛykuo, di ko nɛɛye nɛ ɛykeke Mosese bane nɛ ghele Islaele ghaa se yɛ kiy wen ɛ ɛykek. Ɛy nè bane dì, ko liime nduu nduun.

⁸Ɛysake lɛ nè gwiy nɛ̀ ɛykuo ki əbtaawe ɛ jii nɛ̂ ghan, é ɛyfɛl ə keyioy ə Feyine yɛ ɛy gwiyen nɛ ɛychii jia me taa è chia ɛyghene-a?

⁹Ɛysake lɛ kè gwiye se nɛɛy ge ɛ́ sak, è bese ghel besen, è yɛ taa ɛ jii ghan, é yɛ ɛy nɛɛy ka ghele yɛ lu ɛ titiy jia me taa è chia ɛyghene-a?

¹⁰Ke me se lu se əbluuy ge ɛysak yɛ ɛy nè taan se mbiy bo taa wiy, bek ka yɛ ɛybame nè taan chian.

¹¹Ɛysak yɛ ɛy nè taan dî boole nduu, lɛ nè taa ɛ ŋaŋ dî, é yɛ ɛy jia yî boole se nkan jia yɛ taa chia ɛyghene-a?

¹²Ghɛs lu se yɛ fekte bo fane wiy bek ka ghɛsen yɛkten ɛ əbghun ɛykwaate ka yii nɛ̂ yine.

¹³Ghɛse báà se lu ka Moses wɛ əb nè summen ɛykek ə wen nɛ kembale fɛ ghele Islael baa yɛ kiy ka ɛyban yɛ ɛy nè luun ɛ wen ɛykeke liimen nduun.

¹⁴Se lu nɛ ghene nè chiile se əbluuy. Se kok se chin lan, lu nɛ naa ɛ leghɛ wɛ ɛ́ jaŋen kelek keməə, kembale kɛ tene kɛ ke nè summen tekek ə ghen ko jefse fɛ ghene keele; nɛ loo lu əbliy wɛ wel shiin kefaa kemok ghene Christ, kembale tene me lòò se wen ɛykek.

¹⁵Se lu nɛ se kok se chin ɛ leenen nɛ loo lu ɛ leghɛ wɛ ɛ́ jaŋen ɛysake Moses, kembale ko sum tetem ə ghen fɛ ghene keele kenəə ten.

¹⁶Dî nɛ loo lu ɛ leghɛ wɛ wel benlen se wɛ̂ Báàba, ɛ́ me chakse kembale kɛ tene.

¹⁷Báàba wɛ ghɛse suŋnen kum wen lu Keyioy ə Feyin nɛ loo lu ghááy ghaa Keyioy ə Feyine luun, ghele yɛ lu keyayten.

¹⁸Ghɛsen ghɛ kembale báà sum tekek ə tɛsen yɛne ɛyban ə Báàba, ɛ́ loo yɛn ɛ́ me yɛ njante me bane ketaan ketaan yɛnsen nduu ka wen. Nɛɛy Báàba wɛ luun Keyioy ə Feyin kii nɛ̂ kine.