Read Oku 2Kl 4 Bible Online

2Kl 4 - Oku bible

2Kl 4

¹Ka Feyine chammen ɛysen ə yɛ́s, è fo ɛyfɛl yin ge ghɛs yɛ fɛl, ghɛse me se fɛle bo koosen wiy nken.

²Ghɛs lu nɛ ɛ́ maaymen əbnəə kenghuumen wɛ ghele lóó ɛ́ yɛ lele nɛɛy. Ghɛse báà beeme se yɛ fefse ghel kene se yɛ file kenəə ə Feyin. Ghɛs dî fekte nɛ lu əbluuye kenəə ə Feyin ɛ tɛtɛ, nɛ lu jii yɛ ghɛse dinen se wel əbjim ge əb keele ɛ wen ɛytem ge ghɛs lu ghel əbluuy ɛ ɛyshiɛ nə Feyine.

³Yɛ lu wɛ ge kefaa chite sakghɛ əbjuŋ wɛ ghɛse fekten fene ke chite kɛn se ghel ghɛ ɛ́ lɛ́yèn.

⁴Se lu ɛ ghene kenəə nɛ Satane chitemen ɛshiɛ ghel ghɛ ɛ́ báà beeme, fɛ ghene yɛn sakghɛ əbjuŋ wɛ əb luun kum ɛyban ə Christ wɛ ghene Feyine luun kefaa kemok.

⁵Ghɛse báà se fekte nɛ lu ngeŋ ə sɛs, ghɛse fekte ge Jesus Christ lu Báàba, nɛ ghɛs lu ghel ɛyfɛl nə ghɛn bek Christ.

⁶Lu Feyin wɛ əb nè làmen əblike ban ɛ məme nfiine, wɛ əb nɛɛyen ɛyban ə wene se bane ɛ ghɛsene tetem, ɛyban yɛ ɛy gwiyen nɛ̀ ɛytof yɛ ɛy foon ɛykokse se Feyine, ka ɛy yɛnsen ɛ ɛykek nə Jesus Christ.

⁷Se lu nɛ ghɛs ghɛ ɛ́ kiin əbghaake nɛ̂ vin lu kɛn ka ntonse kechak. Kii nɛ̂ kine dine ge kediak kɛ ke chian lu kɛ́ Feyine nɛ wiy kɛse.

⁸Ngɛkse gwiye se ghɛs jii sejim nɛ lòó ɛ́ se jia me fiaksen ghɛs fiaksen, fəmse ghɛs dî nɛ lòó ghɛs jia me maay maayen ɛyfɛl ə yɛ́s,

⁹nəkse ghɛs dî nɛ Feyine maay wiy ghɛs, mayle ghɛs dî nɛ lòó ɛ́ jia me yuy ghɛs yúyén.

¹⁰Ghɛse yɛne nduu nɛ̀ ngɛk yɛ Jesus nè yɛnen è kuo, dî goke ɛyghun ɛytaa ka ɛychii ə wene yɛnsen ɛ ghɛse məm.

¹¹Ka ghɛse chiin, lu nɛ ɛ́ ko lu kɛn ge ɛ́ yúy ghɛs bek Jesus, nɛɛy di nɛ ɛychii ə wene me yɛnsene ɛ ghɛse kechak əbghune kɛ ke kuon kin.

¹²Kii nɛ̂ kine dine ge ghɛs lu ɛyshiɛ ɛykuo əbliy əbjim ka ghɛne yɛ ki ɛychii yɛ ɛy jia yî mɛy.

¹³Ŋwaale-Feyin suuy ge: “Mɛ fo ɛytem se Feyine, è me fekte.” Lu ghɛɛ-ghɛɛ se ghɛs, ghɛs lu nɛ ɛ́ fó ɛytem se Feyine, è me se fektee.

¹⁴Ghɛs ke ge Feyin wɛ əb nè losen Báàba Jesus se ɛykuo nɛ̂y lose sɛy ghɛsen è liɛ ghɛsen ɛ́ yɛ lu ɛ wen ɛyshiɛ.

¹⁵Ngɛk nɛ̂ shin se jime gane se ghɛs lɛ kɛn se giamtene ghɛn, ka Feyine loo cham ɛysen ə ghel se ɛydio se ɛydio, é ghene yɛ keele ndu nɛ̀ wen foo ɛykokse se wen.

¹⁶Se lu nɛ ghɛse jia yî koosen nken chèmè lu ka kechak əbghune boolen nduun dî nɛ keyioy ko kiile nduu nɛ̀ kediake kechii kejim.

¹⁷Se lu nɛ ngɛk shin sɛ ghɛse yɛ́nen lu kɛn se ɛylaay, nɛ se kó chia kɛn ɛ leenen, se siyse ghɛs ka ghɛse kiile əbghaake wɛ əb jia yî mɛy wɛ əb dion chian ngɛk nɛ̂ shin, nɛ lòó wel jia keele se fek.

¹⁸Ghɛse lɛme wiy ketuu ə kɛs nɛ lu əbfua wɛ əb yɛnsen, ghɛse lɛme nɛ lu əbfua wɛ əb yɛnsen wiy. Əbfua wɛ əb yɛnsen lu nɛ əb loo ghàà əb moote nɛ wɛ əb yɛnsen wiy lòó əb jia yî mɛy.