Read Oku 2Kl 6 Bible Online

2Kl 6 - Oku bible

2Kl 6

¹Ka ghɛse ghe Feyine se fɛ́len se kefaa kemok, ghɛse lone ghɛn ge ghàà ghɛn nɛɛy é ɛycham ɛysen yɛ Feyine chammen ghɛn lɛy se lólò.

²Feyine suuye ge: “Əbliye nè kwɛn wɛ mɛ giamten wɛ̀, mɛ yiote ɛytoŋe yiɛ; Kechii kwɛn kɛ mɛ boyse wɛ, mɛ giamten wɛ̀. Yɛn-a! Leenen lu əbliy ten. Lan lu kechii kɛ Feyine boyse ghel.”

³Ghɛse báàmè kenəə kɛ ke nɛɛy é wel diamten; ka kejase jia yɛ lu ɛ ghɛse ɛyfɛl.

⁴Ghɛse loo nɛɛye naa ghɛ, ɛ́ yɛ nɛɛy se din ge ghɛse nɛɛye ka ghele Feyin, bek ka ghɛse loolen ge wɛ̀ɛ̀, kule ɛytem ɛ məme ngɛkse, nɛ̀ əbliy wɛ əbnəə taan, gese kule ɛytem əbliy wɛ əbnəə əbbɛɛmene ganen.

⁵Ɛ́ nè lô tɛl ghɛs, è tinse se nchak, è kaay ghɛs. Ɛ́ nè nɛɛymen ghɛs se fɛle naa se ŋaŋ, è nɛɛy ghɛs se chii keke, gese chii se jeŋ.

⁶Ghɛs dinmen ge ghɛs lu ghel ə Feyin bek nchiine ə yɛs ɛylanen. Ghɛs ke kenəə ə Feyin, loole ge wɛ̀ɛ̀, dine ɛytem ɛyjuŋe, koŋe ghel ɛlee se əbluuy, gese yio se Keyioy Kelanene,

⁷suuye kenəə nɛ lu kɛ luun əbluuy ɛ əbtaawe nə Feyine. Nchiine yɛ́ titiy yɛ ghɛs kiin lu ka əbfua ɛyghoŋ wɛ ghɛse noon so gese tɛɛke ngeŋ ə sɛs so.

⁸Ghele ɛlee vəme ghɛs, nɛ̀ ɛlee choksen ghɛs, nɛ̀ ɛlee tɛyle ghɛs, nɛ̀ ɛlee bente ghɛs. Ɛ́ lóó ɛ́ yɛ liɛ ge ghɛs lu ghel əbbuam, dî nɛ ghɛs suuy nɛ lu əbluuy.

⁹Ghel ɛlee lóó ɛ́ yɛ nɛɛy dì ka ɛ́ ke wiy ghɛs, dî nɛ wel əbjim ke ghɛs. Ɛ́ lóó ɛ́ yɛ liɛ ge ghɛs shi əbfua əbkuone, dî nɛ ghɛs chii nduu. Ɛ́ nəkse ghɛs naa lɛɛy nɛ ghɛs kuo wiy;

¹⁰ɛ́ lóó nɛɛy ge ghɛs yɛ soo ketuu, ghɛs yɛ saŋle saŋlen. Ghɛse yɛnsen ka ghele ketan, dî kuyse ghel se ɛydio. Ghɛse yɛnsen ka ɛ́ ki wiy kefaa, dî ki əbfua əbjim.

¹¹Sun ə sɛs sɛ́ Kolɛne, ghɛs suŋnenmen se ghɛn ɛ dɛɛne è se dine ɛykoŋ se ghɛn.

¹²Ghɛse koŋe ghɛn naa se ŋaŋ, nɛ lu ghɛn ghɛ ɛ́ báà se loote koŋe ghɛs.

¹³Mɛ suŋnen ɛ leenen di-a ka ghɛn lu ghon ə ghom, ghɛn yɛ koŋe ghɛs ɛ jii yɛ ghɛse koŋen ghɛn ɛ ten.

¹⁴Ghàà ghɛn yɛ chinten ghɛne ghel ghɛ ɛ́ báà beeme Feyin, bek ge njuŋ né bɛɛy ghaa yɛ lu kefaa kemok ghene mbee. Lòó ɛybane ghene nfiine yɛ lu lɛɛy se kefaa kemok?

¹⁵Lòó Christ ghene Satan yɛ lu lɛɛy se əbchio əbmok? Lòó wel əbbeemen yɛ ki ghɛ se nɛɛy ghene wel wɛ əb báà beeme?

¹⁶Lòó ndaa-ɛykokse Feyin yɛ ki ghɛ se nɛɛy nɛ̀ əmnyinme? Ghɛsen lu ndaa-ɛykokse Feyin fɛ fe kiin ɛychii; kɛn ka Feyine nè suuyen ge: “Mɛ nɛ̂y yɛ chii ɛ ghel ə ghome məm, jɛle ghɛse ghene. Mɛ nɛ̂y yɛ lu Feyin ə ghen, nɛ̀ ghene lu ghel ə ghom.”

¹⁷Báàba me se suuye ge: “Ghɛn fəy se məm nɛ ghele mbee, è yɛ lu ndun. Ghɛn yɛ ke se kume kefaa kɛ ke kiin ɛyliŋ, é mɛ nɛ̂y fiisen ghɛn.

¹⁸Mɛ nɛ̂y yɛ lu Ba ə wɛn, nɛ ghɛn lu ghon ə ghom, suuye Báàba Wɛ Ba-Əbtaawe-Əbjim.”