Read Oku 2Kl 7 Bible Online

2Kl 7 - Oku bible

2Kl 7

¹Sun ə some, ka Feyine kakenmen əbnəə vin se ghɛsen, ghɛsen me suu ngeŋ ə sɛsen se əbnəə wɛ əb nɛɛyen nɛ kechak əbghune nɛ̀ keyioye laane wiy. Ghɛsen yɛ chii ɛychii ɛylanene se din ge ghɛsen vəme Feyin.

²Ghɛn din ɛykoŋ ə yɛn se ghɛs. Ghɛse báà jas se wel, è jia nɛɛy ge wel jas jii, è jia lɛɛse wel.

³Mɛ báà se suuy kine se din ge ghɛn lu nɛ ɛ́ jas. Mɛ nè suuymen se ghɛn ge ghɛse koŋe ghɛn naa se ŋaŋ ɛ jii yɛ lòó é ghɛs kuo kuon bek ghɛn.

⁴Mɛ lu nɛ mɛ samse ghɛn naa se ŋaŋ, è se ndiale kum ghɛn. Chèmè lu ka ghɛse yɛ́nen ngɛk, lu nɛ mɛ ndiale naa se ŋaŋ kum ghɛn ka ghɛne zəəsen ɛytem ə yom.

⁵Ghɛs ko nè lô ndu ɛ Masedonia, è jia se ki ɛyzəəte. Ngɛkse nè lu fo əblik əbjim, nɛ ghele kɛŋe əbchio se ghɛs, nɛ̀ ghɛs fane.

⁶Dî Feyin wɛ əb sɛɛ zəəse tetem ə ghel, me zəəse ɛytem ə yɛ́s nɛ̀ ɛygwiy Taytuse.

⁷Ghɛs nè ki sɛy ɛytem ɛyzəətene bek jii yɛ ghɛs nè yion ge ghɛn nè ghalen wen ɛ ten. Əb nè lô suuy se ghɛs ge ghɛne shii se yɛne mɛ naa se ŋaŋ, è suuy ge ghɛne koosen ɛysen se əbnəə wɛ ghɛn nè nɛɛyen, lu kebaaten se tɛɛke mɛ. Mɛ me se saŋle naa se ŋaŋ bek əbnəə nɛ̂ vin.

⁸Chèmè lu ge ŋwaale yɛ mɛ nè nyaken nè lô nɛɛy ghɛn se yafse ɛytem fene mɛ báà se diye əbghun ka mɛ nè nyaken, dî nɛ mɛ nè lô diy əbghun bek ka ŋwaale ten nè nɛɛyen ghɛn yio ɛyyaf se feleeŋese əbliy.

⁹Se lu ɛ leenen nɛ mɛ yio əbjuŋ, nɛ báà se lu bek ka ghɛn nè yion ɛyyaf. Mɛ yio əbjuŋ bek ka ghɛn nè lóó yio ɛyyaf è kubsen nchiine yɛn. Ghɛn nè yio ɛyyaf nɛ lu ɛ jii yɛ Feyine nè kɛŋen, dî nɛ ghɛs nè báà nɛɛy kenəə kebee se ghɛn.

¹⁰Wɛ̀ yio ɛyyaf nɛ lu ɛ jii yɛ Feyine kɛŋen é wɛ̀ me yɛ lu se kubsen se boy, è jia yɛ diy nɛ lu əbghun. Dî nɛ wɛ̀ yio ɛyyaf nɛ lu ɛ jii yɛ̂ mbi fɛn é wɛ̀ kuo kuon.

¹¹Ghɛn yɛn yi shii wɛ ghɛn se kiin bek ka ghɛn yionmen ɛyyaf ɛ jii nə Feyine! Ghɛn yɛn yi ka ghɛn se saayen njio ə yɛn! Ghɛn yɛn jii yɛ kenəə kɛ tene yafenmen ghɛn! Ghɛn yɛn jii yɛ ghɛne fanen ɛ ten! Ghɛn yɛn yi ka ghɛn se kɛŋen se yɛne mɛ! Ghɛn yɛn yi shii wɛ ghɛn se kiin se tiyse əbnəə! Ghɛn yɛn ka ghɛn se sooten ge ɛ́ ko lu se nəkse wel wɛ əb jasen. Ghɛn lu nɛ ɛ́ din ge njio wiy ɛ ghɛne keghoo ɛ məme əbnəə nɛ̂ ghan əbjim.

¹²Mɛ nè baa nyak ŋwaale ten nɛ lu kum wel wɛ əb nè jasen, ɛy gese nè wiy kum wel wɛ ɛ́ nè jasen se wen. Mɛ nè nyak bek ka mɛ nè kɛŋen ge Feyine nɛɛy é ghɛn keele ge ghɛn loote ki shii se ghɛs.

¹³Lu əbnəə nɛ̂ vin wɛ əb nɛɛyen ge tetem ə tɛse lumte. Se gise se ten, ghɛs nè yio əbjuŋ naa se ŋaŋ se yɛne jii yɛ Taytuse saŋlen ɛ ten nɛ nɛɛy ghɛn ge ghàà ɛytem ə wene gese yɛ buk.

¹⁴Mɛ nè lô bensen ghɛn se wen, se lu nɛ ghɛne báà choksen mɛ. Ka əbnəə əbjim wɛ ghɛs nè suuyen se ghɛn luun əbluuy, lu ghɛɛ-ghɛɛ ka ɛybensen yɛ ghɛs nè bensen ghɛn se Taytus lu nɛ ɛy yɛnsen ge lu əbluuy.

¹⁵Əb loo kuume jii yɛ ghɛn ghel ɛjim nè yionen se wen ɛ ten nɛ̀ ka ghɛn nè fiisen wen fane gese chiŋe, ɛykoŋ ə wene se ghɛn me yɛ kuye ndu kɛn ɛ mbiy.

¹⁶Mɛ me se saŋle naa se ŋaŋ bek ka mɛ keen ge lòó mɛ samse ghɛn ɛ əbnəə əbjim.