Read Oku 2Kl 8 Bible Online

2Kl 8 - Oku bible

2Kl 8

¹Ghone-nyii, ghɛse kɛŋe ge ghɛn keele əbnəə wɛ Feyine chammen ɛysen se əbnchintene ghel ɛbeemene ghɛ ntaam Masedonia è nɛɛy se ghene.

²Chèmè lu ka ghene nè yɛnen ngɛk naa se ŋaŋ tetem ə ghene nè lô lun nɛ̀ ɛysaŋlee, ghene se lu naa ɛ məme kenfef, ki ɛghoo ɛyii se fo ɛyfô naa se ɛydio.

³Mɛ suuy əbluuy se ghɛn ge ghene nè fo ka nè lòó ghene fó, è fo naa è chia ka ghene nè kiin, è gese fo ɛ ghene ɛykoŋ.

⁴Ghene se beŋte ghɛs ge ghɛs fó nsan é ghene yɛ giamtene ghel ə Feyine ghɛ Judea.

⁵Ghene nè lô nɛɛy kenəə kɛ ghɛs nè báà se kwaate, ka ghene nè chian mbiy è fo ngeŋse ghen se Báàba, è se yionen sɛy se ghɛs ka Feyine kɛŋen.

⁶Ghɛs nè yɛn di, é me beŋte Taytus wɛ əb nè kɛɛten ɛyfɛl ɛyjuŋe nɛ̂ yin ge əb giamten ghɛn é ghɛn mɛyse ɛyfɛle ten.

⁷Ghɛne nduu ɛ mbiy əbnəə se ɛydio. Ghɛn lu nɛ ɛ́ loote fo ɛytem se Feyine, loote ke se fekte kenəə ə Feyin, ki ɛytof, ki shii ɛ kenəə ə Feyin, gese koŋe ghɛs naa se ŋaŋ. Ghɛse me se kɛŋe ge ghɛn yɛ loote nɛɛye ɛyfɛl ɛyjuŋ nɛ̂ yine sɛy.

⁸Mɛ báà se suuy lɛ ge mɛ foo nɛ lu nchil ɛylee se ghɛn. Mɛ kɛŋe ge ghɛn keele ɛykoŋe yɛ əbluuye yɛ ghel ɛlee kiin sɛy se ghɛs ka ghɛne yɛn ge ghɛn loote ki sɛ̂y ɛykoŋ se ghɛs se əbluuy.

⁹Ghɛn ke ka Báàba wɛsen Jesus Christ nè chammen ɛysen se ghɛsen. Əb nè lu wel əbghaken, è sɛɛ se wele ketan bek ghɛn ka ketane wene nɛɛy é ghɛn yɛ lu ghel ɛghakene.

¹⁰Ntef yɛ mɛ foon se ghɛn ɛ kenəə nɛ̂ fɛn lu ge: Ke lu kejuŋ ge ghɛn mɛyse kenəə kɛ ghɛn nè kɛɛten ɛ vəə leenen. Ghɛn nè báà se lu kɛn ghele ghɛ mbiye se fo, ghɛn nè lu sɛy ghele mbiy se yɛn ge ke jofe se fo.

¹¹Ke me se lu ge ghɛn mɛyse ɛyfɛl nɛ̂ yin, kɛn ghɛɛ-ghɛɛ ka ghɛne koŋen se nɛɛy. Ghɛn mɛyse è nɛɛy kɛn ka ghɛn luun kekwɛnten,

¹²bek ka wele koŋen se fo kefaa ka əb kiin, é Feyine fiisen keghene, nɛ lòó əb jia yɛ kiy ge wel fó kefaa kɛ əb báà se ki.

¹³Mɛ báà se kɛŋe ge ghɛn fó se nɛɛy ge əbnəə yɛ bonen se ghel ɛlee, taa se ghɛn. Mɛ kɛŋe ge əbnəə yɛ lu ɛyghɛl se wel əbjim.

¹⁴Ka ghɛn kiin əbfua se ɛydio ɛ leenen nɛ ghene tane, ghɛn fó ghene ka ghene nɛ̂y loo ki nɛ ghɛn tane é ghene fó ghɛn; ɛ jii nɛ̂ ghan é əbnəə yɛ lu ɛyghɛl se wel əbjim.

¹⁵Kɛn ɛyghɛl ka ɛ́ nyaken ɛ ŋwaale-Feyin ge: “Wel wɛ əb nè baaten əbfua-əbyíɛ́ne se ɛydio nè báà se ki nɛ əb dio se ŋaŋ, nɛ wel wɛ əb nè baaten se ɛylaay nè báà se ki nɛ əb laay se ŋaŋ.”

¹⁶Mɛ bɛ́ɛ̀lè Feyin ka əb nɛɛyen Taytus se ki shii se ghɛn kɛn ka mɛ kiin.

¹⁷Əb me se gwiye ɛ leenen nɛ báà se lu kɛn bek ka ghɛs kè suuyen se wen. Əb nè se ki shii se wene ngeŋ se gwiy se ghɛn.

¹⁸Ghɛse tume wen ghene wan-nyii wɛ əbnchintene ghel ɛbeemene əbjime benten wen kum ɛyfekte yɛ əb fekten sakghɛ əbjuŋ.

¹⁹Baa mɛy kii nɛ̂ kii, əbchintene ghel ɛbeemene nè chokmen wen ge ghɛse ghene liɛ ɛyfɛl ɛyjuŋe nɛ̂ yin yɛ ghɛse nduun so ɛ mbiy, è jɛl so, ka ɛykokse yɛ ndu se Báàba é ke yɛ din ge ghɛse koŋe se yɛ nɛɛy ɛyfɛl nɛ̂ yi.

²⁰Ghɛse toknen fɛ wel nɛ̂y gham ghɛs kum jii yɛ ghɛse ghalen ɛyfô nɛ̂ yin ɛ ten.

²¹Ghɛse luŋen se yɛ nɛɛye kenəə kɛ titiye ɛyshiɛ nə ghele, nɛ wiy kɛn ɛ ɛyshiɛ nə Báàba.

²²Ghɛse gese tume wán-nyii əblee ghene ghe Taytus, lu wel nɛ ghɛse mommen wen ɛ kaŋ ɛ kaŋ è yɛn ge əb loote ki shii se giamten, se lu ɛ leenene nɛ əb ki shii chia naa ka əb nè kiin bek ɛysamse yɛ əb samsen ghɛn.

²³Lu se Taytus nɛ əb lu wele ngoo nə mɛ wɛ ghɛse wen fɛ́len se giamtene ghɛn, nɛ lu se ghone-nyii ɛlee ghɛ ghene ghene gwiyen nɛ ghene lòò ntum əbnchintene ghel ɛbeemene, ka ɛykokse yɛ ndu se Christ.

²⁴Ghɛn din yi se ghel nɛ̂ ghine ge ghɛne koŋe ghene, ka əbnchintene ghel ɛbeemene əbjime yɛ ke se əbluuy, è gese yɛ ke ge ghɛs nè lu ɛ titiy se yɛ ndial kum ghɛn.