Read Oku 2Kl 9 Bible Online

2Kl 9 - Oku bible

2Kl 9

¹Shii báà se lu wɛ mɛ yɛ nyak nyaken se ghɛn kum ɛygiamten yɛ ɛ́ fó se ghel ə Feyine ɛ Judea.

²Mɛ ke ge ghɛn ki shii se giamten, nɛ mɛ nè se ndiale kum ghɛn se ghele Masedonia, suuye se ghene ge: Ghone-nyii ghɛ́ Akaia nè se bááte se giamten se kɛ̀ɛ̀tè se nguk wɛ əb nè chian. Shii wɛ ghɛn kiin se giamten lu nɛ əb nɛɛy ndio ghel ɛ ghene məm se ki shii se giamten.

³Mɛ me se tinse ghone-nyii ghin se nɛɛy ge ɛyndial yɛ ghɛs nè ndialen kum ghɛn ɛ kenəə nɛ̂ ghan jia yɛ lu kenəə keyume. Mɛ tume ghene ka ghɛne loote baate ka mɛ nè se suuyen;

⁴fɛ lóó lu é ghele Masedonia ɛlee gwiy ghɛse ghene, è yɛn ge ghɛne báà se lu kebaaten, é kenghuumene koo ghɛs kum kenəə kɛ ghɛs nè se suuyen kum ghɛn. Ghɛs loo ghuumen, é ghɛn yɛ ghuumen sɛy naa se ŋaŋ.

⁵Ghɛy kenəə kɛ ke nɛɛyen ge mɛ tinse ghone-nyii ghin se mbiy ge ghɛne ghene baate fomɛ wɛ ghɛn nè kaken. Ghɛn nɛɛy dì é ke yɛ din ge lu kefaa nɛ ɛ́ foo nɛ̀ ɛyteme nɛ ɛ́ báà kan ghɛn kanen.

⁶Ghɛn yɛ kuume ge wel vii ngos se ɛylaay, é əb nɛ̂y kaa se ɛylaay, əb vii se ɛydio, é əb nɛ̂y kaa se ɛydio.

⁷Wel yɛ fo ka ke loolen ɛ wen ɛytem, koosen wiy nken, foo wiy ka ɛ́ kan wen kanen bek ge Feyine koŋe wel wɛ əb fóon nɛ̀ ɛysaŋlee.

⁸Lòó Feyine bose ghɛn nɛ̀ əbfua nɛ əb dio naa se ŋaŋ, ka ghɛne yɛ ki əbfua əbjim wɛ ghɛne shiin se nɛɛy naa ghɛ ɛ leghɛ loote nɛɛye ɛyfɛl ɛyjuŋe yɛ ghɛn kiin se nɛɛy ɛyjim.

⁹Kɛn ka ŋwaale-Feyine suuyen ge: Keghoo ə wele titiye lu keyii se ghele ketane, əmngiɛl ə wene mɛye wiy.

¹⁰Feyin wɛ əb fóon ngos se ghɛ ɛyleme, foo keban ge ɛ́ yɛ yiɛ, náà fo ngos sejim sɛ ghɛne shiin, è nɛɛy ɛ́ se kuuy ka ghɛne náà loote kaa əbfua se ɛydio bek keghoo keyii kɛ ghen kiin.

¹¹Feyine nɛ̂y bose ghɛn nɛ̀ əbfua ɛ jiise ɛ jiise əbliy əbjim ka ghɛne yɛ fo, é ghel se ɛydio yɛ bɛ̀ɛ̀lè Feyin bek ɛyfô ə yɛn yɛ ghene kiilen se ghɛs.

¹²Fomɛ nɛ̂ vin wɛ ghɛne fóon báà se giamten kɛn ghel ə Feyin, əb nɛɛye nɛ ghel se ɛydio foo keyioŋen se Feyine naa se ŋaŋ.

¹³Ghel se ɛydio náà yɛ foo ɛykokse se Feyine bek kenəə nɛ̂ kin kɛ ghɛn nɛɛyen kɛ ke dinen ge ghɛn tiy ketaan ɛ kenəə nə Jesus Christ, nɛɛye ghɛɛ-ghɛɛ ka ke luun. Ghene nɛ̂y yɛ fóó sɛy ɛykokse se Feyine bek keghoo keyii kɛ ghen kiin se ghene gese nɛ̀ se ghel ɛlee.

¹⁴Ghene nɛ̂y me yɛ jem se ghɛn nɛ̀ ɛyteme, bek ka Feyine chammenmen ɛysen se ghɛn naa se ŋaŋ.

¹⁵Ghɛsen yɛ bɛ̀ɛ̀lè Feyin se fomɛ əbchio əbyúméné wɛ əb foon se ghɛsen.